Ռոհանի Ուաշինկթընի Հետ Բանակցութիւնները Կը Կապէ Պատժամիջոցներու Վերացման

0716iran

0716iran

ԹԵՀՐԱՆ, «Ռոյթըրզ».- Իրանի նախագահ Հասան Ռոհանի յայտարարեց, որ Թեհրան պատրաստ է Ուաշինկթընի հետ բանակցելու, եթէ պատժամիջոցները ջնջուին, վերջ դրուին տնտեսական ճնշումներուն եւ Ամերիկա վերադառնայ հիւլէական համաձայնագիրին:

«Իրան յանձնառու է հիւլէական համաձայնագիրին այնքան, որքան ուրիշներ յանձնառու են անոր», շեշտեց ան՝ կրկնելով, որ Իրան հիւլէական զէնք ունենալու մտադրութիւն չունի։

Միւս կողմէ, Ֆրանսայի արտաքին գործոց նախարար Ժան Իվ Լը Տրիան յայտնեց. «Թեհրանի հետ կնքուած հիւլէական համաձայնագիրէն Միացեալ Նահանգներու հեռանալէն ետք Իրանի իւրանիոմի հարստացման սահմանափակումը ոտնակոխելը վատ որոշումի մը վատ հակազդեցութիւն է եւ պատերազմի յանգելու մտավախութիւններ կը ստեղծէ»:

Նշենք, որ Միացեալ Նահանգներու Ներկայացուցիչներու տունը 12 Յուլիսին վաւերացուց բանաձեւ մը, որ նախագահին կ՛արգիլէ առանց Քոնկրեսի արտօնութեան պատերազմ սկսիլ Իրանի դէմ:

Մինչ այդ, Իրանի արտաքին գործոց նախարար Մոհամմետ Ճաւատ Զարիֆ հեռաձայնային զրոյց մը ունեցաւ Բրիտանիոյ իր պաշտօնակից Ճերըմի Հանթի հետ՝ պահանջելով, որ Լոնտոն անմիջապէս ազատ արձակէ Ճիպրալթարի մէջ կալանքի տակ մնացող իրանեան քարիւղատար նաւը։ «Եւրոպական Միութիւնը, որ միշտ դէմ արտայայտուած է Միացեալ Նահանգներու արտասահմանեան պատժամիջոցներուն, չի կրնար նման գործողութիւն կատարել», աւելցուց Զարիֆ։ Ռուսական «ՌԻԱ Նովոսթի» լրատու գործակալութիւնը Շաբաթ օր հաղորդած էր, թէ նաւուն անձնակազմի չորս անդամները գրաւի դիմաց ազատ արձակուած են, սակայն չեն կրնար Ճիպրալթարէն հեռանալ:

Վերջապէս, Եւրոպական Միութեան արտաքին քաղաքականութեան գերագոյն յանձնակատար Ֆետերիքա Մոկերինի յայտնեց, որ Պրիւքսէլ կ՛աջակցի Իրանի հարցով շրջանային խորհրդաժողով մը գումարելու Իրաքի նախաձեռնութեան, շեշտելով, որ ներկայ հանգրուանին առաջնահերթ է խուսափիլ լարուածութեան սրումէն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top