Թրամփ «Անարդար» Կ՛որակէ Թուրքիոյ «Էֆ. 35» Օդանաւեր Չծախելու Պահանջները

ՈՒԱՇԻՆԿԹԸՆ, «Ռոյթըրզ».- Շարունակելով մնալ Թուրքիոյ անպաշտօն պաշտպան փաստաբանի իր դերին մէջ՝ Միացեալ Նահանգներու նախագահ Տանըլտ Թրամփ 16 Յուլիսին յայտարարեց, որ թէ՛ Թուրքիոյ համար եւ թէ ամերիկեան ընկերութիւններուն համար «անարդար» պիտի ըլլայ միլիառաւոր տոլար արժող «Էֆ. 35» ռազմական օդանաւերը Թուրքիոյ չյանձնելու որոշումը, կացութիւնը «շատ դժուար» համարելով։

Նոյն օրը, պաշտպանութեան նախարարի պաշտօնին նշանակուած Մարք Էսփըր Ծերակոյտին  առջեւ իր վկայութեան ընթացքին յայտարարեց, թէ Թուրքիա չի կրնար նոյն ժամանակ ռուսական «Էս. 400» հակաօդային պաշտպանութեան համակարգեր եւ «Էֆ. 35» ռազմական օդանաւեր ունենալ։

Նշենք, որ անցեալ շաբաթ սկսած «Էս.400»ներու մասերուն Թուրքիոյ մատակարարման հոլովոյթը կը շարունակուի եւ թրքական աղբիւրներ կը գրեն, որ մօտաւորապէս 100 թուրք մասնագէտներ մեկնած են Ռուսիա, որպէսզի մասնագիտանան «Էս. 400» համակարգերը բանեցնելու գործին մէջ։ Հաւանական է, որ վերապատրաստութեան համար յաւելեալ մասնագէտներ ուղարկուին։

Միւս կողմէ, Ռուսիոյ փոխվարչապետ Եուրի Պորիսով յայտարարեց, որ Ռուսիա պատրաստ է Թուրքիոյ նաեւ ռազմական օդանաւեր վաճառելու:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top