Հիւլէական Համաձայնագիրին Շուրջ Նոր Բանակցութիւններ Պիտի Չկատարենք. Զարիֆ

0717zarif

 

0717zarif

ՆԻՒ ԵՈՐՔ, «Էն.Պի.Սի.».- ՄԱԿի տնտեսական եւ ընկերային խորհուրդի ժողովին մասնակցելու համար, Միացեալ Նահանգեր այցելող Իրանի արտաքին գործոց նախարար Մոհամմետ Ճաւատ Զարիֆ պատկերասփռուած հարցազրոյցի մը ընթացքին յայտնեց, որ Իրան հիւլէական միջազգային համաձայնագիրին շուրջ նոր բանակցութիւններ պիտի չկատարէ: Նախարարը նաեւ յայտարարեց. «Ի վերջոյ մեր քարիւղը պիտի ծախենք, սակայն երբեք՝ մեր արժանապատուութիւնը: Որեւէ ճնշումի դիմաց Իրանի ընտրանքը դիմադրութիւնն է, սակայն եթէ Միացեալ Նահանգները ներկայ կացութենէն պատիւով դուրս գալու միջոց կը փնտռէ, պարզապէս անիկա գոյութիւն ունի», ըսաւ Զարիֆ:

Իրանի արտաքին գործոց նախարարը նաեւ շեշտեց, որ «եթէ մեր դէմ յարձակում կատարուի, երբեք պիտի չտատամսինք մենք մեզ պաշտպանելու»:

Ան աւելցուց, որ իր արարքներով, Միացեալ Նահանգերը ինքզինք դուրս կը պահէ իրանեան շուկայէն, սակայն ան շեշտեց, որ «իրանեան շուկային դռները ամերիկեան ընկերութիւններուն համար բաց են»:

Լրագրողի մը այն հարցումին, թէ Իրան մտավախութիւն չունի՞, որ կրակի հետ կը խաղայ, Զարիֆ պատասխանեց, «Իսկապէս կրակի հետ կը խաղա՞նք արդեօք: Ո՛չ: Միացեալ Նահանգներն է, որ կրակի հետ կը խաղայ՝ ինքզինք դուրս բերելով հիւլէական համաձանութենէն»՝ յիշեցնելով, որ ընդունուած իրողութիւն է, որ եթէ համաձայնագիրի մը պայմանները զայն ստորագրողներէն մէկը խախտէ, այլ կողմեր եւս ազատ են մասնակիօրէն դադարեցնել իրենց պարտաւորութեանց կատարումը»:

Միւս կողմէ, «Պի.Պի.Սի.»ն հաղորդեց, որ ՄԱԿի ընդհանուր քարտուղարի բանբեր Ֆարհան Հաք լրագրողներու հետ հանդիպումի մը ընթացքին յայտնեց, թէ ՄԱԿը մտահոգ է Նիւ Եորքի մէջ Իրանի արտաքին գործոց նախարարի տեղաշարժին սահմանափակումով:

Ան յայտնեց, թէ ՄԱԿի քարտուղարութիւնը ամերիկեան իշխանութիւններուն որոշումին վերաբերեալ իր մտահոգութիւնը յայտնած է ամերիկեան կողմին, եւ հարցը կը քննարկէ ամերիկացի ու իրանցի դիւանագէտներու հետ:

Նշենք, որ Միացեալ Նահանգներու՝ Զարիֆի դէմ պատժամիջոցներ հաստատելու սպառնալէն ետք, Միացեալ Նահանգներու արտաքին գործոց նախարար Մայք Փոմփէօ յայտարարեց, թէ Ուաշինկթըն Զարիֆին արտօնած է Նիւ Եորք մեկնիլ՝ մասնակցելու ՄԱԿի տնտեսական եւ ընկերային խորհուրդի տարեկան ժողովին, սակայն արգիլած էր անոր դուրս գալ ՄԱԿի մօտ Իրանի դեսպանատան 6 թաղերու սահմանէն:

Յիշեցնենք, որ Միացեալ Նահանգները՝ իբրեւ ՄԱԿը հիւրընկալող երկիր, համաձայնութիւն ունին ՄԱԿի գործերու արտասահմանցի դիւանագէտներուն մուտքի արտօնագիր տրամադրելու մասին, սակայն հազուադէպօրէն զանոնք կը մերժէ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top