Աւստրալիոյ Նոր Հարաւային Ուելզ Նահանգի Վարչապետ Կլատիս Պէրէճիքլեան Երեւան Ժամանեց

0719armensarkissian

0719armensarkissian

ԵՐԵՒԱՆ.- Հանրապետութեան նախագահ Արմէն Սարգսեան եւ վարչապետ Նիկոլ Փաշինեան Հինգշաբթի, 19 Յուլիսին հիւրընկալեցին անձնական այցելութեամբ Հայաստան ժամանած Աւստրալիոյ Նոր Հարաւային Ուելզ նահանգի վարչապետ Կլատիս Պէրէճիքլեանը:

Նախագահ Սարգսեան ողջունեց տիկին Պէրէճիքլեանի այցելութիւնը հայրենիք եւ բարձր գնահատեց անոր գործունէութիւնը յանուն Հայոց Ցեղասպանութեան ճանաչման եւ Արցախի ինքնորոշման իրաւունքին:

Պէրէճիքլեան իր կարգին ըսաւ, որ ըլլալով Հայոց Ցեղասպանութիւնը վերապրած անձի մը թոռնուհի եւ այցելելով Հայաստան՝ ինք հպարտ է իր հայկական ծագումով ու արմատներով: Ան յայտնեց, թէ յոյս ունի, որ իւրաքանչիւր այցելութեան Հայաստանը կը տեսնէ աւելի զարգացած:

Զրուցակիցները միտքեր փոխանակեցին Հայաստանի եւ Նոր Հարաւային Ուելզի միջեւ համագործակցութեան զարգացման հեռանկարներու շուրջ:

Վարչապետ Նիկոլ Փաշինեան, իր կարգին, հիւրընկալելով Պէրէճիքլեանը՝ ըսաւ. «Ուրախ եւ հպարտ ենք Աւստրալիայում ձեր գործունէութեամբ: Այսօր դուք աշխարհում ամենաազդեցիկ հայ կանանցից մէկն էք եւ հաճելի է հանդիպելու հնարաւորութիւնը»:

Փաշինեան յայտնեց, թէ յոյս ունի, որ Պէրէճիքլեանի գործունէութեան շնորհիւ առաւել կը զարգանան Հայաստանի եւ Աւստրալիոյ յարաբերութիւնները ու կ՛ընդլայնին փոխադարձ հետաքրքրութիւնները:

Պէրէճիքլեան վարչապետը շնորհաւորեց Հայաստանի մէջ տեղի ունեցող դրական զարգացումներուն համար եւ նշեց, որ հայրենիքի իրադարձութիւններուն ուշադրութեամբ կը հետեւին նաեւ Աւստրալիոյ հայ համայնքի ներկայացուցիչները: Ան ընդգծեց, որ ի տարբերութիւն նախորդ տարիներուն՝ այս անգամ հանրութեան մօտ կը նկատուի մեծ ոգեւորութիւն եւ ապագային նկատմամբ հաւատք:

Նշենք, որ Նոր Հարաւային Ուելզը Աւստրալիոյ 8 նահանգներէն մէկն է՝ շուրջ 8 միլիոն բնակչութեամբ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top