Աշխատանքի Ոլորտի Հարցերու Համակարգային Լուծումները Պէտք Է Ըլլան Հետագայ Բարեփոխումներու Հիմնական Օրակարգը

0719labor

0719labor

Հայ Յեղափոխական Դաշնակցութեան Բիւրոյի Տնտեսական հետազօտութիւններու գրասենեակը Չորեքշաբթի, 17 Յուլիսին նախաձեռնած էր կլոր սեղան-քննարկում՝ «Հայաստանի մէջ աշխատանքային իրաւունքներու պաշտպանութիւն. բացայայտուած խնդիրներ եւ մտահոգիչ դրսեւորումներ. հնարաւոր լուծումներ» նիւթով: Քննարկումին ներկայ էին ՀՅԴ վերոնշեալ գրասենեակի մասնագէտներ, Հայաստանի նախագահի, վարչապետի, մարդու իրաւունքներու պաշտպանի աշխատակազմերէն  ներկայացուցիչներ, պատգամաւորներ, փաստաբաններ եւ այլ հիւրեր:

Գրասենեակին կատարած հետազօտութիւնը ներկայացուց ՀՅԴ Բիւրոյի Տնտեսական հետազօտութիւններու գրասենեակի համակարգող, տնտեսագէտ Թադեւոս Աւետիսեան: Անոր ելոյթէն ետք մասնակիցները հարցում-պատասխանի ձեւաչափով ծաւալեցին քննարկում, որ անցաւ բաւական կառուցողական մթնոլորտի մէջ:

Նշենք, որ ՀՅԴ Բիւրոյի Տնտեսական հետազօտութիւններու գրասենեակը Հայաստանի աշխատանքային օրէնսդրութեան մասնագիտական համակողմանի ուսումնասիրութիւններու արդիւնքներուն հիման վրայ առանձնացուցած է առարկայական շարք մը հարցներ՝ անոնց հաւանական լուծումներով: Այդ հարցերը ուղղակիօրէն կը վերաբերին աշխատանքի ոլորտի շարք մը բնագաւառներու մէջ Հայաստանի ստանձնած միջազգային պարտաւորութիւններու թերի կատարման, աշխատողներու եւ գործատուներու իրաւունքներու եւ պարտականութիւններու ոչ-հաւասարակշիռ ապահովման, օրինական եւ արժանապատիւ աշխատանքի համար անհրաժեշտ նուազագոյն պայմաններու բացակայութեան:

Վեր հանուած հարցերը կը ներառեն աշխատանքային իրաւունքներու պաշտպանութեան ոլորտին մէջ օրէնսդրական լուծման բացերը:

Ըստ գրասենեակին ներկայացուցած վերլուծութեան՝ նախկին զինուորներու եւ անոնց ընտանիքներու անդամներուն, ինչպէս նաեւ զոհուած զինուորներու ընտանիքներու անդամներուն համար, Աշխատանքային օրէնսգիրքով նախատեսուած չեն լուծման անհրաժեշտ առանձնայատկութիւններ (արտօնութիւններ), որոնք կը գործեն, օրինակ, Ռուսիոյ, Պելոռուսի, Թուրքմենիստանի եւ Տաճիկիստանի մէջ: Անվիճելի է նման լուծման առարկայական անհրաժեշտութիւնը նաեւ մեր երկրին մէջ:

Իր ելոյթին մէջ Աւետիսեան անդրադարձաւ Հայաստանի մէջ օտարերկրացիներու աշխատանքին:

Անդրադառնալով աշխատանքային ժամերուն եւ դրութեան՝ ան նշեց, որ 2014ին օրական 24ժամեայ աշխատանքը արգիլող օրէնքի նախագիծ դրուած էր շրջանառութեան մէջ, սակայն հետագային անիկա չընդունուեցաւ, ու գերադասուեցաւ գործատուներու շահը: Բայց միջազգային իրաւունքի չափանիշներով՝ որեւէ պարագայի օրական աշխատանքային ժամանակը պէտք չէ գերազանցէ 16 ժամը:

ՀՅԴ Տնտեսական հետազօտութիւններու գրասենեակի առաջարկուող լուծումները միտուած են աշխատանքի ոլորտին մէջ Հայաստանի վաւերացուցած միջազգային պարտաւորութիւններու կատարման, ներքին օրէնսդրական առկայ հակասութիւններու վերացման, միջազգային դրական փորձով ապացուցուած արդիւնաւէտ լուծումները մեր երկրին մէջ տեղայնացնելուն, ինչպէս նաեւ աշխատանքային յարաբերութիւններու մէջ ընկերային երկխօսութեան եւ գործընկերութեան կայացման ու զարգացման համար անհրաժեշտ հիմքերու ամբողջականացման:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top