«Էֆ. 35»ներու Ծրագիրին՝ Թուրքիոյ Մասնակցութիւնը Կասեցուեցաւ

ՈՒԱՇԻՆԿԹԸՆ, ԱՆԳԱՐԱ, «Ռոյթըրզ».- 17 Յուլիսի յետմիջօրէին, Սպիտակ տունը պաշտօնապէս յայտարտարեց, թէ «Էֆ. 35» արդիական ռազմական օդանաւերու ծրագիրին՝ Թուրքիոյ մասնակցութիւնը պիտի կասեցուի, Ռուսիայէն «Էս. 400» հակաօդային համակարգեր գնելու Անգարայի որոշումին իբրեւ հետեւանք։

Աւելի ուշ, պաշտպանութեան նախարարութիւնը յայտարարեց, թէ Թուրքիա վերջնականապէս դուրս ձգելու գործընթացը պիտի սկսի 31 Յուլիսին, փոքր չափով բաց պահելով Թուրքիոյ վերադարձին հաւանականութիւնը, ռուսական համակարգերը Թուրքիայէն հեռացնելու որոշումի մը պարագային։

Ամերիկացի պաշտօնակատարներ վստահեցուցին, որ Թուրքիոյ մասնակցութեան կասեցումը յատկանշական վնաս պիտի չհասցնէ ծրագիրին, որովհետեւ Ուաշինկթըն արդէն 2018ին իսկ սկսած էր արտադրութեան այլընտրանքային տարբերակներ փնտռելու:

Մօտաւորապէս 35 թուրք օդաչուներ, որոնք «Էֆ. 35»ներու օգտագործման նպատակով յատուկ մարզումներու կը հետեւէին Միացեալ Նահանգներու մէջ, մինչեւ 31 Յուլիսին պիտի վերադառնան Թուրքիա:

Կ՛ակնկալուի, որ ծրագիրէն դուրս մնալուն իբրեւ հետեւանք, Թուրքիա մօտաւորապէս 9 միլիառ տոլարի կորուստ պիտի կրէ, որովհետեւ թրքական շարք մը ընկերութիւններ օդանաւին համար մասեր կ՛արտադրէին, սակայն Մարտ 2020էն սկսեալ, այդ արտադրութիւնները պիտի կատարուին ամերիկեան կամ եւրոպական ընկերութեանց կողմէ։

Թուրքիոյ արտաքին գործոց նախարարութիւնը քննադատեց այս որոշումը՝ պնդելով, որ «այդ միակողմանի քայլը կը հակասէ դաշնակցութեան ոգիին եւ որեւէ արդարացի հիմնաւորում չունի՝ աւելցնելով. «Կոչ կ՛ընենք Միացեալ Նահանգներուն, որ հրաժարի այս սխալէն, որ կրնայ անուղղելի վնաս հասցնել մեր ռազմավարական յարաբերութիւններուն»։

Նախարարութեան յայտարարութեան մէջ նաեւ կոչ կը կատարուի Ուաշիկթընին՝ «հաւատարիմ մնալու Օսաքայի մէջ Քսանի խմբակի գերաստիճանի ծիրին մէջ տեղի ունեցած նախագահներ Էրտողանի եւ Թրամփի միջեւ հանդիպման ընթացքին ձեռք բերուած համաձայնութիւններուն», առանց մանրամասնելու, թէ ի՛նչ էին անոնք։

Յիշեցնենք, որ Օսաքայի հանդիպումէն ետք տրուած մամլոյ ասուլիսին ընթացքին Թրամփ տագնապին պատասխանատու նկատած էր Օպամայի վարչակազմը, փորձելով արդարացնել Անգարայի կեցուածքը։

Նշենք, որ Թրամփ Սպիտակ տան նշեալ յայտարարութենէն մէկ օր առաջ եւս «անարդար» որակած էր Թուրքիոյ «Էֆ. 35» օդանաւեր չծախելու որոշումը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top