Դոկտ. Յովհաննէս Ահմարանեանի «Հայը Եւ Հայաստանը Աստուածաշունչին Մէջ» Գիրքին Ներկայացումը

0000Ahmaranian1

ԱՐԱ ԱՀԱՐՈՆԵԱՆ

 

0000Ahmaranian2

Դոկտ. Յովհաննէս Ահմարանեան

Կիրակի, 14 Յուլիսի յետմիջօրէին, «Թէքէեան» Մշակութային Միութեան Ալթատինայի «Պէշկէօթիւրեան» կեդրոնի սրահը ժամադրավայրն էր գրասէր եւ միութենական ընտրանիի մը, որ եկած էր ներկայ գտնուելու դոկտ. Յովհաննէս Ահմարանեանի հեղինակած եւ վերջերս լոյս տեսած՝ «Հայը Եւ Հայաստանը Աստուածաշունչին Մէջ» հատորին ներկայացման ու գինեձօնին:

Բացման խօսքով հանդէս եկաւ, յանուն կազմակերպիչ ԹՄՄ Կլենտէյլ-Փասատինայի վարչութեան՝ Աստղիկ Խանճեան, որ հանգամանօրէն ներկայացուց հատորին հեղինակը՝ դոկտ. Յովհաննէս Ահմարանեանը:

Յայտագիրը ընթացք առաւ Վահան Թէքէեանի «Եկեղեցին Հայկական» քերթուածի ասմունքով, զոր կատարեց հայերէնի դասատու Նորայր Տատուրեան, որ յայտագիրի աւարտէն առաջ նաեւ ասմունքեց Յովհաննէս Թումանեանի «Լուսաւորչի Կանթեղը»:

Մեներգով հանդէս եկաւ կազմակերպիչ վարչութեան անդամներէն Խաչիկ Նահապետեան՝ ներկայացնելով Ռոպերթ Ամիրխանեանի «Երկիր Հայրենին» եւ Արմէն Տիգրանեանի «Դաւիթ Բէկ» օփերայէն «Գուսանի Արիա»ն:

0000Ahmaranian4

Նորայր Տատուրեան

«Հայը Եւ Հայաստանը Աստուածաշունչին Մէջ» հատորի ներկայացման համար հրաւիրուեցաւ ԹՄՄի Միացեալ Նահանգներու եւ Գանատայի Կեդրոնական վարչութեան անդամ Գէորգ Քէօշկէրեան, որ ուսումնասիրած էր հատորին մէջ գտած Աստուածաշունչին ակնարկած թուականները, ինչպէս նաեւ պատմական տեղերն ու վայրերը, որոնք աշխարհագրականօրէն կը վերաբերին Արեւմտեան Հայաստանի տարածքին ու անոր ուրարտական արմատներուն, ինչպէս նաեւ հոն ակնարկուած դրախտին մասին, որ պատմական Հայաստանի չորս գետերուն միջեւ գտնուած տարածքն է: Քէօշկէրեան ակնարկեց նաեւ հատորին մէջ տեղ գտած կարգ մը անուններու, որոնք ըստ Աստուածաշունչին, Հայաստան տարածաշրջանին մէջ օգտագործուած արիական անուններ եղած են:

0000Ahmaranian3

Գէորգ Քէօշկէրեան

Հատորի գինեձօնէն ետք, որուն ընթացքին յայտագիրին մասնակցողները ընկերակցեցան հեղինակին, դոկտ. Ահմարանեան իր շնորհակալութեան խօսքով հանդէս եկաւ, շեշտելով պատմական կարեւորութիւնը՝ «հայ» արմատին, որ տեղ գտած է Աստուածաշունչին մէջ:

Միջոցառման աւարտին տեղի ունեցաւ աւանդական դարձած հիւրասիրութիւնը, որուն ընթացքին հեղինակը մակագրեց վաճառուած հատորները:

 

0000Ahmaranian1

Պահ մը գինեձօնէն

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top