Բարերարուհի Անահիտ Պաղտատլեան-Օհաննէսեան Պարգեւատրուեցաւ «Կիլիկեան Ասպետ» Շքանշանով

0822Anahid Baghdadlian6

ԼԱ ՔՐԵՍԵՆԹԱ.- Արեւմտեան թեմի պատմութիւնը հարուստ է իր իրագործումներով եւ նուիրեալ ու ծառայասէր ազգայիններով, որոնք իրենց նիւթաբարոյական ներդրումով մեծապէս կը նպաստեն ու կը զօրակցին Ազգային առաջնորդարանին առաքելութեան եւ շրջանի հաւաքական կեանքին։

Այս հոյլին մէջ յիշատակելի են հանգուցեալ Կայծակ Օհաննէսեանի եւ անոր կնոջ՝ Անահիտ Պաղտատլեան-Օհաննէսեանի անունները։

Հինգշաբթի, 15 Օգոստոսի երեկոյեան, նախաձեռնութեամբ առաջնորդ Մուշեղ արք. Մարտիրոսեանի, Կրօնական ժողովին ու Ազգային վարչութեան, Ազգային առաջնորդարանի «Տիգրան եւ Զարուհի Տէր Ղազարեան» սրահին մէջ տեղի ունեցաւ յատուկ ձեռնարկ մը՝ ի պատիւ Անահիտ Պաղտատլեան-Օհաննէսեանի։

Երեկոյին մասնակցեցան Ազգային Կեդրոնական վարչութեան անդամներ Վահէ Եագուպեան եւ Կայծակ Զէյթլեան, Կրօնական ժողովի ու Ազգային վարչութեան, հոգեւորականաց դասու, Տիկնանց օժանդակ մարմինի ներկայացուցիչներ, ինչպէս նաեւ մեծարեալի ընտանեկան պարագաները եւ հարազատները, որոնց շարքին՝ ՀՕՄի Շրջանային վարչութեան, անցեալի Ազգային վարչութեանց, «ՐաՖՖի» հայրենակցական միութեան անդամներ եւ հիւրեր։

Ձեռնարկին բացումը կատարուեցաւ աղօթքով։ Բացման ու բարի գալուստի խօսքը արտասանեց Քնար Գորթոշեան, որ նաեւ վարեց երեկոն։ Յանուն Ազգային վարչութեան սրտի խօսք փոխանցեց ատենապետ Կարօ Էշկիեան, որ գնահատելով մեծարեալը՝ նշեց, թէ ան իր ընտանիքի վաստակին կարեւոր մէկ բաժինը իրեն վերապահելու փոխարէն, նախընտրած էր նուիրել եկեղեցաշէն եւ ազգային նպատակներու, ապա ան առողջութիւն մաղթեց տիկին Անահիտին ու վստահութիւն յայտնեց, որ այս պարգեւատրումը առիթ պիտի հանդիսանայ, որ ան վերանորոգէ իր յանձնառութիւնը եւ զօրակցութեան ուխտը։

Սրբազանը իր պատգամը ուղղելէ ետք կատարեց պարգեւատրումը։ Ողջունելով տիկին Անահիտը եւ անոր դուստրը՝ Սիլվին, եւ բոլոր ներկաները, վեր առաւ ու գնահատեց Օհաննէսեան ամոլին զօրակցութիւնը Մեծի Տանն Կիլիկիոյ կաթողիկոսութեան եւ Ազգային առաջնորդարանին։ Ապա ան աղօթք բարձրացուց հանգուցեալ Կայծակի հոգիի խաղաղութեան համար եւ օրհնեց անոր յիշատակը։ Սրբազանը նաեւ երախտագիտութեամբ յիշեց մեծարեալին հանգուցեալ եղբայրը՝ համբաւաւոր երգիչ Փօլ Պաղտատլեանը։

Առաջնորդը յայտնեց, թէ ընդառաջելով Արամ Ա. կաթողիկոսին կոչին՝ Օհաննէսեան ամոլը, օրին, հանդիսացած էր Սիսի կաթողիկոսական կալուածներու դատին ի նպաստ Արեւմտեան թեմի առաջին նուիրատուութիւն կատարողը, գործնապէս քաջալեր հանդիսանալով մեր եկեղեցապատկան ու ազգային կալուածներուն եւ իրաւունքներուն վերատիրացման։

Այնուհետեւ, ընտանիքը շարունակ նուիրատուութիւններ կատարած է Ազգային առաջնորդարանին, երկու անգամ հիւրընկալած է առաջնորդ սրբազան հօր Նոր Տարուան եւ Ս. Ծննդեան ընթրիքը ու զօրակցած է զանազան նախաձեռնութիւններու, ինչպէս նաեւ թեմի եկեղեցիներուն, «Թռչնոց Բոյն»ին եւ գաղութի այլ կազմակերպութիւններու։

Նշենք, որ առ ի գնահատանք՝ իրենց եկեղեցանուէր նկարագիրին եւ առատաձեռն նուիրատուութիւններուն, Կայծակ եւ Անահիտ Օհաննէսեանները Մայիս 2015ին, ձեռամբ առաջնորդ սրբազան հօր, արժանացան Արեւմտեան թեմի բարձրագոյն պատիւին՝ «Ս. Տրդատ եւ Ս. Աշխէն» շքանշաններուն։

Առաջնորդ սրբազանը գոհունակութեամբ յայտարարեց, որ վեհափառ հայրապետը, գնահատելով Օհաննէսեան ամոլին բարերարութիւնները, ինչպէս նաեւ հիմնուելով իր ու իրերայաջորդ Ազգային վարչութիւններու խնդրանքին վրայ՝ «Կիլիկեան Ասպետ» շքանշանը կը շնորհէ Աշխէն Օհաննէսեանին։ Կաթողիկոսը օրին, տիկին Անահիտի խնդրանքին ընդառաջելով, օրհնած էր սիրուած երգիչ Փօլի յիշատակը։

Առաջնորդական փոխանորդ Թորգոմ եպս. Տօնոյեան ընթերցեց վեհափառ հայրապետին սրբատառ կոնդակը, որմէ ետք առաջնորդ սրբազանը մեծարեալը եւ անոր դուստրը Սիլվին զարդարեց շքանշանով եւ շքանշանին խաչ զարդասեղով։

Շնորհակալութեան եւ երախտագիտութեան խօսք արտասանեց մեծարեալը։ Ան երախտագիտութիւն յայտնեց վեհափառ հայրապետին՝ զինք այս պատիւին արժանացնելուն համար եւ շնորհակալութիւն՝ առաջնորդ սրբազանին եւ Ազգային վարչութեան գնահատանքին եւ ձեռնարկը նախաձեռնենլուն, ինչպէս նաեւ ներկաներուն՝ այս հանդիսաւոր պահուն մասնակից ըլլալնուն համար։ Ան հաստատեց, որ զօրակից է ու պիտի մնայ կաթողիկոսարանին եւ Ազգային առաջնորդարանի առաքելութեան։

Երեկոն աւարտեցաւ «Պահպանիչ»ով եւ «Կիլիկիա»ով, որմէ ետք ներկաները առիթ ունեցան անձամբ շնորհաւորելու մեծարեալը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top