ՀՄԸՄի Արցախի Մասնաճիւղի Հիմնադրութեան Պաշտօնական Արարողութիւն՝ Ստեփանակերտի Մէջ

0824hmem9

 

Հինգշաբթի, 22 Օգոստոսի առաւօտեան ժամը 9ին, Արցախի Հանրապետութեան մայրաքաղաք Ստեփանակերտի մէջ, պաշտօնական արարողութեամբ մը տեղի ունեցաւ ՀՄԸՄի 111րդ մասնաճիւղին հիմնադրութիւնը՝ հայրենի աշխարհի պատմական ու հերոսական շրջանին մէջ:

Արարողութիւնը իրենց ներկայութեամբ պատուեցին Արցախի նախագահ Բակօ Սահակեան, պետական նախարար Գրիգորի Սահակեան, արտաքին գործոց նախարար Մասիս Մայիլեան, մշակոյթի, երիտասարդութեան հարցերու եւ զբօսաշրջութեան նախարար Լեռնիկ Յովհաննիսեան, կրթութեան, գիտութեան, մշակոյթի եւ մարմնամարզի փոխնախարար Գէորգ Լոռեցեան, Արցախի թեմի առաջնորդ Պարգեւ արք. Մարտիրոսեան, Արցախի Հանրապետութեան Մերձաւոր Արեւելքի ներկայացուցիչ Կարօ Քէպապճեան, ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան եւ Կեդրոնական կոմիտէի անդամներ, Համազգային Հայ Կրթական եւ Մշակութային Միութեան Արցախի գրասենեակի տնօրէն Հերմինէ Աւագեան, ինչպէս նաեւ բազմաթիւ հիւրեր եւ հրաւիրեալներ: ՀՄԸՄի ընտանիքը ներկայացուցին ՀՄԸՄի Կեդրոնական վարչութեան ատենապետ Գառնիկ Մկրտիչեան եւ Կեդրոնական վարչութեան անդամ Բագրատ Եսայեան:

Նորաստեղծ մասնաճիւղին հրաւէրով, պաշտօնական արարողութեան ներկայ գտնուեցաւ ՀՄԸՄի Հայաստանի քոյր շրջանի սկաուտական պատուիրակութիւնը՝ սկաուտական շեփորախումբին ընկերակցութեամբ:

 

ԲԱՑՈՒՄ ԵՒ ՊԱՐԳԵՒ ՍՐԲԱԶԱՆԻՆ ՈՂՋՈՅՆԻ ԽՕՍՔԸ

 

Պաշտօնական արարողութիւնը տեղի ունեցաւ Ստեփանակերտի «Վերածնունդ» հրապարակին վրայ: Նախ, սկաուտական շեփորախումբի առաջնորդութեամբ հրապարակ մուտք գործեցին դրօշները Արցախի, Հայաստանի եւ 25 երկիրներու, ուր ՀՄԸՄը կը գործէ իր 110 մասնաճիւղերով: Հնչեց Արցախի օրհներգը, որմէ ետք շեփորախումբը նուագեց ՀՄԸՄի «Յառաջ նահատակ» քայլերգը:

Տեղի ունեցաւ ՀՄԸՄի, սկաուտական դրօշի եւ միութեան կանոնագիրի յանձնում՝ նորաստեղծ մասնաճիւղի վարչութեան: Դրօշները օրհնեց Արցախի թեմի առաջնորդ Պարգեւ արք. Մարտիրոսեան, որ այս առիթով արտասանեց ողջոյնի եւ օրհնութեան խօսք մը: Ան ըսաւ, որ ՀՄԸՄը համաշխարհային եւ համահայկական կազմակերպութիւն մըն է, որ 100 տարիէ ի վեր կը գործէ՝ ազգին համար կրթելով հայրենասէր ու ծառայասէր երիտասարդներ, որոնք միշտ պատրաստ են յաղթահարելու որեւէ դժուարութիւն:

«Չափազանց ուրախ եմ, որ վերջապէս ՀՄԸՄը կը գործէ հայրենի Արցախ աշխարհին մէջ», ըսաւ Պարգեւ սրբազանը՝ մաղթելով ամենայն բարիք, հայրենասիրութիւն, հաւատք եւ ազգային միասնութիւն՝ յօգուտ մեր ազգին, այն կարգախօսով, զոր մեզի կտակած են Վարդանանք, ապրելու եւ գործելու «Վասն հաւատոյ եւ վասն հայրենեաց»:

Իր խօսքին աւարտին, Պարգեւ սրբազանը «Տէրունական ա-ղօթք»ով օրհնեց ՀՄԸՄի նորաստեղծ մասնաճիւղը եւ արտասանեց «Պահպանիչ»ը:

 

ԱՐՑԱԽԻ ՀԱՆՐԱՊԵՏՈՒԹԵԱՆ ՊԵՏԱԿԱՆ ՆԱԽԱՐԱՐԻՆ ԽՕՍՔԸ

 

Այնուհետեւ, խօսք առաւ Արցախի Հանրապետութեան պետական նախարար Գրիգորի Մարտիրոսեան, որ ըսաւ, թէ ՀՄԸՄի պատմութիւնը հարուստ եւ բովանդակալից է: ՀՄԸՄը ունի համահայկական կառոյց եւ հայկական աւանդոյթներով կը միաւորէ աշխարհի 25 երկիրներու մէջ գործող իր 110 մասնաճիւղերը: Արցախի մասնաճիւղը կը հանդիսանայ Արցախ-Հայաստան-Սփիւռք եռամիասնութեան հանդիպման գօտին:

Մարտիրոսեան մեծապէս գնահատեց աշխարհի տարածքին սփռուած հայ երիտասարդութիւնը միաւորելու ՀՄԸՄի պատասխանատուութիւնը եւ մաղթեց, որ Արցախի նորաստեղծ մասնաճիւղը ըլլայ այդ առաքելութեան շարունակողը, մարզական եւ սկաուտական զանազան միջոցներով Արցախի երիտասարդութեան մօտ վառ պահելու համար ազգային դիմագիծի համապատասխան հայրենասիրական ոգին:

 

ՀՄԸՄԻ ԿԵԴՐՈՆԱԿԱՆ ՎԱՐՉՈՒԹԵԱՆ ԽՕՍՔԸ

 

Յաջորդ խօսքը արտասանեց ՀՄԸՄի Կեդրոնական վարչութեան ատենապետ Գառնիկ Մկրտիչեան:

Իր խօսքին սկիզբը, Մկրտիչեան ըսաւ, որ 101 տարեկան ՀՄԸՄի համար սովորական իրադարձութիւն մը չէ Արցախի մէջ մասնաճիւղի մը հիմնադրութիւնը, որովհետեւ մասնաճիւղը սովորական մասնաճիւղ մը չէ, ինչպէս աշխարհի տարածքին հայկական որեւէ համայնքի մէջ ստեղծուող մասնաճիւղ: «Արցախը աշխարհագրական վայր ըլլալէ առաջ, մեզի համար պատմութիւն է, հերոսական հայրենիք է եւ դարաւոր հպարտութիւն: Հայրենիքի այս հատուածը պահելու եւ պահպանելու համար ազգովին վճարած ենք շատ սուղ գին», ընդգծեց ան:

«Անցնող 30 տարիներուն, Արցախը եղած է կիզակէտը համայն հայութեան։ Հայութիւնը ոչինչ խնայած է Արցախը հզօր, իսկ արցախահայութիւնը ամուր տեսնելու համար: Հայ Մարմնակրթական Ընդհանուր Միութիւնը, իր կարգին, Արցախը դարձուցած է մնայուն ուշադրութեան առարկայ: Արցախը իր կարեւոր տեղը ունեցած է միութեան դաստիարակչական ծրագիրներուն մէջ: ՀՄԸՄականներ հասակ առած են Արցախի սէրով, Արցախին ծառայելու եւ ի հարկին Արցախին համար զոհուելու պատրաստակամութեամբ: Ու չմոռնանք, որ ՀՄԸՄը իր նահատակները ունի Արցախեան պայքարին. Վարդան Բախշեանը, Վաչէ Ռոստմեանը, Վիգէն Զաքարեանը եւ ուրիշներ իրենց արեամբ գրեցին Արցախի նորօրեայ մեր պատմութիւնը:

«Ու երբ միութիւն մը դաստիարակութեամբ, զոհաբերութեամբ Արցախի հետ կ՛ըլլայ, բնական է, որ անիկա նաեւ Արցախի մէ՛ջ ըլլայ. կազմակերպական ներկայութիւն եւ միութենական գործունէութիւն ունենայ: Բան մը, որ երկար տարիներ կարելի չէր իրագործել զանազան պատճառներով», յայտնեց Մկրտիչեան:

Ապա, նորաստեղծ մասնաճիւղին առաքելութեան մասին խօսելով՝ Գառնիկ Մկրտիչեան ըսաւ. «ՀՄԸՄը իր քայլերգին բառերով, մեր ժողովուրդին կամաւոր բանակն է: Բանակ մը, որ ահա, այսօր կու գայ իր բոլոր կարելիութիւնները ի սպաս դնելու Արցախի մեր պետականութեան եւ բանակին, իր շարքերուն մէջ հասակ առնող արի ու կայտառ երիտասարդութիւնը ուղղելով դէպի հայրենիքի ծառայութեան նուիրական դաշտը»:

Շարունակելով, Գառնիկ Մկրտիչեան յայտնեց, որ այսօր բոլորին հայեացքները ուղղուած են այստեղ, արցախցի իրենց քոյր-եղբայրներուն: Բոլորը յաջողութիւն կը ցանկան նորաստեղծ մասնաճիւղին եւ անխտիր բոլորը իրենց բովանդակ կարելիութիւնները կը դնեն մասնաճիւղին տրամադրութեան տակ, որպէսզի անիկա ամրանայ, հզօրանայ, իրմով մեր ժողովուրդը եւ պետականութիւնը ամրանան ու հզօրանան:

Աւարտին, յանուն ՀՄԸՄի Կեդրոնական վարչութեան, Գառնիկ Մկրտիչեան շնորհակալութեան խօսք յայտնեց Արցախի պետական պատասխանատուներուն եւ յատկապէս նախագահ Բակօ Սահակեանին, որոնք անվարան գնահատեցին ՀՄԸՄի մասնաճիւղ մը ունենալու միութեան առաջարկը եւ կարելի ամէն աջակցութիւն ցուցաբերեցին:

Խօսքը եզրափակելով, Կեդրոնական վարչութեան ատենապետը ընդունեց նորաստեղծ մասնաճիւղի սկաուտներուն երդումը:

 

ՀՄԸՄ-Ի ԱՐՑԱԽԻ ՆՈՐԱՍՏԵՂԾ ՄԱՍՆԱՃԻՒՂԻՆ ԽՕՍՔԸ

 

Խօսք առաւ ՀՄԸՄի Արցախի նորաստեղծ մասնաճիւղի ատենապետ Վրէժ Էսմէրեան: Ան ըսաւ, որ Արցախի մէջ ՀՄԸՄի մասնաճիւղի մը հիմնադրութեամբ՝ կ՛իրականանայ հայութեան երազներէն մէկը: ՀՄԸՄի նշանաբանը «Բարձրացի՛ր, բարձրացուր» է եւ, ինչպէս աշխարհասփիւռ բոլոր մասնաճիւղերը, Արցախի մասնաճիւղը եւս պիտի գործէ նոյն սկզբունքով եւ նախանձախնդրութեամբ:

Էսմէրեան իր խօսքին մէջ շնորհակալութիւն յայտնեց Հայաստանի քոյր կազմակերպութեան, որ պատուիրակութեամբ մը կը մասնակցի Արցախի մասնաճիւղի հիմնադրութեան պաշտօնական արարողութեան: Ան ըսաւ, որ ինչպէս Արցախի ազգային-ազատագրական պայքարի օրերուն ամբողջ հայութիւնը թեւ ու թիկունք կանգնեցաւ Արցախին, այսօր եւս բոլորը հրաւիրուած են աջակցելու ՀՄԸՄի Արցախի մասնաճիւղին գոյատեւման ու զարգացման՝ իբրեւ երաշխիք հզօր եւ ամուր Արցախի մը կերտման:

 

ՀՅԴ ԱՐՑԱԽԻ ԿԵԴՐՈՆԱԿԱՆ ԿՈՄԻՏԷԻՆ ԽՕՍՔԸ

 

Պաշտօնական արարողութեան վերջին խօսքը արտասանեց ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան: Ան ըսաւ, որ մինչեւ օրս ՀՄԸՄ Արցախի մէջ ներկայ էր անպաշտօն կերպով: Ներկայ էր իր նահատակներով, որոնք իրենց գարուն կեանքերը զոհաբերեցին Արցախի հայութեան պաշտպանութեան եւ երկրի սահմաններու ապահովութեան համար:

Իշխանեան նկատել տուաւ, որ մասնաճիւղի հիմնադրութեան պաշտօնական արարողութիւնը տեղի կ՛ունենայ խորհրդանշական հրապարակի մը վրայ, ուր 30 տարի առաջ սկիզբ առաւ ազգային-ազատագրական մեր պայքարը: Հրապարակ մը, ուրկէ տարիներ ետք մարտի մեկնեցան քաջարի մեր մարտիկները: Ան մաղթեց, որ հրապարակին վրայ ծածանող դրօշներու ներկայութեամբ եւ բոլորին վկայութեամբ, նորաստեղծ մասնաճիւղին անդամները պատասխանատու ըլլան ՀՄԸՄական իրենց խոստումին եւ ընդառաջեն հայրենի կանչին՝ Արցախին եւ արցախահայութեան ծառայութեան հրաւէրին:

Պաշտօնական խօսքերու աւարտին, արարողութիւնը փակուեցաւ ՀՄԸՄի սկաուտական շեփորախումբին ազգային-հայրենասիրական եղանակներով:

 

ՏԵՍԱԿՑՈՒԹԻՒՆ ԱՐՑԱԽԻ ՆԱԽԱԳԱՀԻՆ ՀԵՏ

 

ՀՄԸՄի Արցախի մասնաճիւղի հիմնադրութեան պաշտօնական արարողութենէն ետք, ՀՄԸՄի Կեդրոնական վարչութեան ատենապետ Գառնիկ Մկրտիչեան, Կեդրոնական վարչութեան անդամ Բագրատ Եսայեան եւ ՀՅԴ Արցախի Կեդրոնական կոմիտէի ներկայացուցիչ Դաւիթ Իշխանեան այցելութիւն մը տուին նախագահ Բակօ Սահակեանին եւ շնորհակալութիւն յայտնեցին ՀՄԸՄին ցուցաբերած իր աջակցութեան համար:

Իր կարգին, նախագահ Սահակեան մեծապէս գնահատեց ՀՄԸՄի դերը երիտասարդութեան հայեցի դաստիարակութեան, ֆիզիքական եւ մտային կարողութիւններու զարգացման մէջ՝ նշելով, որ ան մեծ ակնկալութիւններ ունի միութեան Արցախի գործունէութենէն:

 

ԱՐՑԱԽԻ ԱՌԱՋՆՈՐԴԻՆ ԵՒ ՀՅԴ ԿԵԴՐՈՆԱԿԱՆ ԿՈՄԻՏԷԻՆ ՄՕՏ

 

ՀՄԸՄի պատուիրակութիւն մը՝ բաղկացած Կեդրոնական վարչութեան անդամներէ եւ Արցախի մասնաճիւղին ատենապետէն, այնուհետեւ այցելեց Արցախի Հայոց թեմի առաջնորդարան եւ տեսակցութիւն մը ունեցաւ առաջնորդ Պարգեւ արք. Մարտիրոսեանի հետ:

Առաջնորդը յայտնեց, որ այցելութիւններու բերումով ինք ծանօթ է զանազան շրջաններու  ՀՄԸՄի կառոյցին եւ գործունէութեան: ՀՄԸՄը հայանուէր եւ հայրենանուէր կազմակերպութիւն է, որ կը զբաղի նոր սերունդի դաստիարակութեան գործով, նշեց ան եւ յաջողութիւն մաղթեց Արցախի նորաստեղծ մասնաճիւղի աշխատանքներուն:

Այցելութիւններու շարքին վերջինը եղաւ ՀՅԴ Ստեփանակերտի «Նիկոլ Դուման» կեդրոնը, ուր ՀՄԸՄի պատուիրակութիւնը տեսակցեցաւ ՀՅԴ Արցախի Կեդրոնական կոմիտէի ներկայացուցիչին եւ անդամներուն հետ: Տեսակցութեան ներկայ գտնուեցաւ ՀՅԴ Բիւրոյի գործիչ Հրաչ Թադեւոսեան:

Տեսակցութեան ընթացքին քն-նարկուեցան ՀՄԸՄի Արցախի գործունէութեան վերաբերող կազմակերպական հարցեր եւ ան-միջական գործակցութեան ծրագիրներ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top