Հայ Դատը Ուաշինկթընի Հետ Կը Քննէ Արցախի Տագնապին Խաղաղ Լուծում Մը Գտնելու Կարելիութիւնները

ANCA Dem Peace bw Arts Azer

ANCA Dem Peace bw Arts Azer

ՈՒԱՇԻՆԿԹԸՆ.- Ամերիկայի Հայ Դատի յանձնախումբի ներկայացուցիչները վերջերս մայրաքաղաք Ուաշինկթընի մէջ հանդիպում մը ունեցան Միացեալ Նահանգներու արտաքին գործոց նախարարութենէն բարձրաստիճան պաշտօնատարներու հետ՝ քննարկելով Արցախի եւ Ատրպէյճանի միջեւ երկարատեւ եւ ժողովրդավար խաղաղութեան համաձայնագիրի մը հասնելու կարելիութիւնները։

Հանդիպման ներկայ էին նախարարութեան Կովկասի հարցերու եւ շրջանային տագնապներու գրասենեակի վարիչ Շերըլ Ֆերնանտեզ եւ ԵԱՀԿի Մինսկի խմբակի ամերիկացի համանախագահ Էնտրու Շոֆըր, ինչպէս նաեւ Ամերիկայի Հայ Դատի յանձնախումբի ատենապետ Րաֆֆի Համբարեան եւ կառավարական հարցերու վարիչ Թերեզա Երիմեան։

«Հայ Դատին համար կարեւոր է ամերիկահայութիւնը յուզող շարք մը հարցերու շուրջ արտաքին գործոց նախարարութեան հետ երկխօսութեան շարունակութիւնը եւ յատկապէս կարեւոր կը նկատենք Արցախի տագնապին շինիչ լուծում մը գտնելու խորհրդակցութիւնները, որպէսզի կարելի ըլլայ երաշխաւորել Արցախի խաղաղութիւնը, Արցախի քաղաքացիներուն բարօրութիւնը եւ բարգաւաճումը», կը յայտնէ Համբարեան՝ աւելցնելով. «Գիտակցելով, որ խաղաղութեան բանակցութեանց սեղանին վրայ յառաջդիմութիւն ապահովելու համար կարեւոր է կայունութիւն հաստատել գետնի վրայ, Միացեալ Նահանգները եւ ԵԱՀԿի մէջ մեր գործակիցները պէտք է աւելի կտրուկ կերպով մօտենան Ատրպէյճանի բռնարարքները եւ սպառնալիքները զսպելու ջանքերուն։ Նաեւ, յաւելեալ միջոցներու պէտք է դիմուի՝ պարտադրելու համար Ատրպէյճանին, որ ընդունի քոնկրեսականներ Ռոյսի եւ Էնկըլի կողմէ առաջադրուած այն պայմանները, որոնց նպատակն է զինադադարը պարտադրել, ինչպէս նաեւ պէտք է փոփոխութեան ենթարկել Մատրիտեան թերի եւ ձախողած սկզբունքները, որպէսզի կարելի ըլլայ հասնիլ երկարատեւ եւ ժողովրդավար խաղաղութեան»։

Յիշեցնենք, որ առաջին անգամ 2015ին առաջադրուած՝ քոնկրեսականներ Ռոյսի եւ Էնկըլի պայմանները կը պահանջեն արձակազէնները եւ ծանր ու արդիական զէնքերը հեռացնել շփման գիծէն, հաստատել նախայարձակը բացայայտող համակարգեր եւ ԵԱՀԿի դէտերու թիւը աւելցնել։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top