Ս. Խաչի Վերացման Եւ Անուանակոչութեան Տօնակատարութիւն Ս. Խաչ Մայր Տաճարին Մէջ

Holy Cross Name Day1

ՄՈՆԹԵՊԵԼԼՕ.- Կիրակի, Սեպտեմբեր 15ին, Խաչվերացի տօնը հանդիսաւորապէս նշուեցաւ Արեւմտեան թեմի բոլոր եկեղեցիներուն մէջ Ս. պատարագի մատուցումով, «Անդաստան»ի արարողութեան կատարումով եւ ռեհանի օրհնութեամբ։

Այս առիթով, համանուն եկեղեցւոյ անուանակոչութեան օրը, թեմի առաջնորդ Մուշեղ արք. Մարտիրոսեան Մոնթեպելլոյի Ս. Խաչ Մայր տաճարին մէջ պատարագ մատուցանեց եւ յաւուր պատշաճի քարոզեց, իսկ առաջնորդական փոխանորդ Թորգոմ եպս. Տօնոյեան պատարագ մատուցանեց եւ քարոզեց Լաս Վեկասի Ս. Կարապետ եկեղեցւոյ մէջ։

Նշենք, որ Վերացման Ս. Խաչի տօնին թեմին մէջ գործող բոլոր Կիրակնօրեայ դպրոցները կը վերաբացուին։ Հետեւաբար, կիրակնօրեայ դպրոցի տնօրէնները, ուսուցիչները եւ աշակերտները ներկայ գտնուեցան տեղական եկեղեցիներու մէջ մատուցուող Ս. պատարագին եւ Ս. հաղորդութիւն ստացան։

Պատարագին սպասարկեցին եկեղեցւոյ հոգեւոր հովիւ Աշոտ քհնյ. Գամպուրեան եւ սարկաւագները։ Արարողութեան նաեւ մասնակցեցաւ հոգեւոր տեսուչ Միւռոն Ծ. վրդ. Ազնիկեան։ Պատարագին ընթացքին, առաջնորդ սրբազանը կատարեց »Անդաստան«ի արարողութիւնը եւ ռեհաններու օրհնութիւնը, որմէ ետք օրուան պատգամը փոխանցեց։

Ան նախ փառք ու գոհունակութիւն յայտնեց Աստուծոյ, որ անգամ մը եւս համախմբած է բոլորը նշելու Ս. Խաչի Վերացման տօնը, խաչի խորհուրդով լիցքաւորուելու, խաչի զօրութեամբ ամրապնդուելու, խաչին ապաւինելով մեր հաւատքը վերանորոգելու եւ առաջնորդելու յոյսով, բարութեամբ, զոհողութեամբ, հաւատարմութեամբ եւ սիրով։

Այնուհետեւ, առաջնորդ սրբազանը ուրախութեամբ ողջունեց ծխական ընտանիքը, մասնաւորաբար Կիրակնօրեայ վարժարանի տեսչութիւնը, ուսուցչաց կազմը եւ աշակերտութիւնը, որոնք նոր տարին կը սկսին խաչի խորհուրդով գօտեպնդուած։ Ապա ներկայացուց խաչի վերացման ու գերութենէն վերադարձի խորհուրդը։ Ան դիտել տուաւ, որ մենք դարեր շարունակ այս տօնը կը նշենք, որովհետեւ խաչը եկեղեցւոյ հիմքն է եւ բոլոր հաւատացեալներուն յոյսը. խա՛չն է որ վերականգնեց մեզ մահէն դէպի յաւիտենական կեանք։ «Այս տօնը առիթ է վերանորոգուելու եւ մեր կեանքը ապրելու խաչի՛ ճանապարհով, սիրոյ եւ զոհողութեան կեանքով։ Այս տօնը առիթ է դառնալու խաչին՝ յուսահատութեան ժամանակ խաղաղութիւն եւ ապաստան գտնելու, փոթորիկներու մէջ զօրանալու եւ պաշտպանուելու, մեղքի կապանքներէն ազատագրուելու, մեր հոգեւոր քաղցն ու պապակը յագեցնելու եւ իբրեւ վահան ամրութեան՝ մեր հաւատքի ու ազգի բոլոր թշնամիներէն պաշտպանուելու։ Աւելի՛ն. խաչի պատգամը մեզ կը հրաւիրէ ընդօրինակելու Քրիստոսի հաւատարմութիւնն ու հնազանդութիւնը Հօր Աստուծոյ հանդէպ, հաւատքով եւ սիրով նուիրուելու մեր եկեղեցւոյ եւ ազգին, մեր նմաններուն համար զոհաբերուելու եւ մեր տուներն ու ընտանիքները Աստուծոյ խորանի վերածելու», ընդգծեց ան։

Պատարագի աւարտին, առաջնորդը թափօրով ուղղուեցաւ եկեղեցւոյ »Բաղրամեան« սրահը, ուր կատարեց մատաղի օրհնութիւն։ Ապա, տեղի ունեցաւ հաւաքական սիրոյ ճաշ, հիւրընկալութեամբ Տաճարի Տիկնանց միութեան։

Հայր Միւռոնը ողջոյնի եւ բարի գալուստի խօսք արտասանեց, որմէ ետք Մայր տաճարի երիտասարդաց խումբի անդամները խաչին նուիրուած յայտագիր մը ներկայացուցին։

Առաջնորդ սրբազանը անգամ մը եւս շնորհաւորեց ծխական մեծ ընտանիքը Ս. Խաչ Մայր տաճարի անուանակոչութեան առթիւ եւ կոչ ուղղեց բոլորին Ս. Խաչի զօրութեամբ զսպանակուած շարունակելու իրենց առաքելութիւնը եկեղեցւոյ ծառայական կեանքին մէջ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top