Արմէն Սարգսեան Հիւրընկալեց Հայ Եւ Գերմանացի Գիտնականներ

1012Kidnagan

1012Kidnagan

ԵՐԵՒԱՆ, «Արմէնփրէս».- Հայաստանի Հանրապետութեան նախագահ Արմէն Սարգսեան 11 Հոկտեմբերին ընդունեց գերմանական յայտնի «ՏԵԶԻ» (DESY) գիտական-հետազօտական կեդրոնի եւ անոր գործընկերներ՝ Երեւանի «Քենտլ» հետազօտութիւններու հիմնարկի եւ Ա. Ի. Ալիխանեանի անուան ազգային գիտական տարրալուծարանի՝ Երեւանի բնագիտութեան հիմնարկի ներկայացուցիչները:

«ՏԵԶԻ»ի տնօրէններու խորհուրդի նախագահ, փրոֆեսէօր Հելմութ Տոշի գլխաւորութեամբ գերմանացի գիտնականներու խումբը Հայաստան կ՛այցելէ՝ հայ գործընկերներուն հետ ներկայ գիտական համագործակցութիւնը առաւել խորացնելու նպատակով:

Նախագահ Սարգսեան հաստատեց, որ գերմանացի գիտնականները պէտք է վստահ ըլլան, թէ նախագահական աշխատակազմը պատրաստակամ է ամբողջութեամբ աջակցելու իրենց, որպէսզի համագործակցութիւնը աւելի խոր եւ արդիւնաւէտ ըլլայ։

Հելմութ Տոշ տեղեկացուց այցելութեան արդիւնքներուն մասին՝ նշելով, որ արդէն գիտական համագործակցութեան ընդլայնման վերաբերեալ երկու փաստաթուղթեր ստորագրուած է երկու կառոյցներուն հետ։ Անոր համաձայն՝ տակաւին կան ոլորտներ, ուր կարելի է առաւել սերտօրէն համագործակցիլ։ Ան նշեց, թէ համագործակցութիւնը գիտականէն բացի նաեւ կրթական բաղադրիչ ունի, եւ հայ գործընկերներուն հետ պայմանաւորուածութիւն կայ իրականացնելու գիտնականներու փոխանակման, վերապատրաստութեան ծրագիրներ։

«Քենտլ» հետազօտութիւններու հիմնարկի եւ Ա. Ի. Ալիխանեանի անուան ազգային գիտական տարրալուծարանի ներկայացուցիչները եւս տեղեկութիւններ փոխանցեցին համագործակցութեան ուղղութիւններուն մասին:

Հանրապետութեան նախագահը մեծ նուաճում նկատեց գերմանական եւ հայկական գիտական-հետազօտական կեդրոններուն միջեւ ձեռքբերուած համաձայնութիւնները՝ հաստատելով, որ այս ուղին յառաջիկային աւելի պիտի զարգանայ, եւ գործակցութեան նոր ոլորտներ պիտի ստեղծուին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top