Յ. Տէր Խաչատուրեան. «Դաշնակցութիւնը Կը Ծառայէ Հայաստանի Եւ Հայութեան Ազատագրութեան Դատին»  

1016Hagop

 

1016Hagop

ԵՐԵՒԱՆ.- ՀՅԴ Բիւրոյի ներկայացուցիչ Յակոբ Տէր Խաչատուրեան «Երկիր»ի եւ «Ապառաժ»ի հետ ունեցած անջատ զրոյցներուն ընթացքին անդրադարձաւ Արցախի բարեկամներու համաժողովին նախաձեռնելու անհրաժեշտութեան եւ Դաշնակցութեան յառաջիկայ աշխատանքներուն:

«Ես կը կարծեմ, որ չափազանց կարեւոր է Արցախի բարեկամներու համաժողովի կազմակերպումը, որուն հիմնական նպատակն է համախմբել բոլոր այն քաղաքական, մշակութային, ակադեմական եւ այլ ոլորտներու ու բնագաւառներու ղեկավարները, որոնք արտերկրի հայութեան ի նպաստ աշխատանքներ կը ծաւալեն: ՀՅԴ Հայ Դատի յանձնախումբերու պատասխանատուները այդ առումով խթան կը հանդիսանան այդ աշխատանքներուն՝ ի մի հաւաքելով այս մարդիկը եւ ապահովելով անոնց միջեւ կապը: Իսկ այդ յարաբերութիւններու պաշտօնականացումը կը հաստատուի այս համաժողովով՝ հռչակագիրի ընդունման ճանապարհով: Համաժողովին իբրեւ արդիւնք ստեղծուած ցանցը տեղեկութիւններ փոխանակելու, ծրագիրներ մշակելու եւ համադրուած ձեւով ծրագիրներ իրականացնելու նպատակին պիտի ծառայէ:

«ՀՅ Դաշնակցութիւնը յանձն առած է այս գործը՝ մղուելով իր ծրագիրէն եւ յատուկ նպատակներէն: Դաշնակցութիւնը կը ծառայէ Հայաստանի ու հայութեան ազատագրութեան դատին եւ հետեւողական է այս գերնպատակին՝ անկախ իր քաղաքական դիրքէն եւ մանրուք հաշիւներէ: ՀՅ Դաշնակցութիւնը գոյութիւն ունեցած է Հայաստանի անկախութենէն առաջ եւ գոյութիւն ունենալու է անկախ իշխանութեան մաս կազմելու կամ չկազմելու հանգամանքէն», «Ապառաժ»ին ըսաւ Յակոբ Տէր Խաչատուրեան:

«Երկիր»ին հետ զրուցելով՝ ան դիտել տուաւ, որ, թէեւ ոչ բռնի յայտարարութիւններով, բայց իրականութեան մէջ՝ բռնի ձեւերով, մարդոց պաշտօններէն հեռացնելը ընդունելի մարտավարութիւն չէ։ ՀՅԴ Բիւրոյի ներկայացուցիչ Յակոբ Տէր Խաչատուրեան նկատել տուաւ, որ միջոցները, որոնք երբեմն կը գործադրուին Հայաստանի իշխանութիւններու կողմէ, դատարաններու գրաւումը եւ այլն, բնականաբար, սովորական գործընթացներ չեն, եւ այդ մասին ՀՅԴն իր տեսակէտը յայտնած է ուղղակիօրէն վարչապետին՝ ըսելով, որ բարեփոխումներու կարիք կայ, բայց անոնք պէտք է ըլլան համախոհութեամբ, խորհրդարանական եւ արտախորհրդարանական ուժերու հետ քննարկումներով:

«Բազմիցս յայտարարած ենք, որ իշխանութեան երեք ճիւղերը պէտք է անկախ ըլլան եւ հակակշռեն մէկը միւսին. պէտք է զգոյշ ըլլալ, որ իսկապէս տարանջատուած ըլլան եւ մանաւանդ, արդարադատութեան համակարգը անկախ գործէ», ընդգծեց ան:

Անդրադառնալով վարչապետ Փաշինեանի՝ «Արցախը Հայաստան է եւ վերջ»՝ ստեփանակերտեան յայտարարութեան հետեւանքներուն, Յակոբ Տէր Խաչատուրեան ըսաւ. «Բնականաբար, ՀՅԴին համար ալ Արցախը Հայաստան է եւ վերջ, բայց քանի կայ բանակցային գործընթաց, եւ մտադիր ենք, որ Արցախն ալ միանայ բանակցային սեղանին, լուծման փնտռտուքի միտում կայ: Եւ բնականաբար, երբ կը յայտարարես այդ կցկտուր կեցուածքի մասին՝ անիկա խաղաղութեան գործընթացին չի նպաստեր: Բայց ատիկա ոչ մէկ ձեւով չի նսեմացներ այն մօտեցումը, որ մեզի համար ընդունելի է՝ ոչ մէկ զիջում Արցախի հողէն»:

«Բացարձակ իմաստով խնդիր չունինք այդ մօտեցումին հետ, որ, բանակցային իմաստով կրնայ դժուարութիւններ յառաջացնել, բայց ատիկա ալ քաղաքական լուծում կը պահանջէ, եւ պէտք է օգնել Հայաստանի Հանրապետութեան, որ լուծումը գտնէ», նկատել տուաւ ՀՅԴ Բիւրոյի ներկայացուցիչը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top