Հայաստանի Քիւրտերը Նամակ Կը Յանձնեն Ամերիկեան Դեսպանատան

1016kurd1

1016kurd1

ԵՐԵՒԱՆ, «Արմէնփրէս».- Հայաստանի մէջ քրտական համայնքի ներկայացուցիչները 15 Հոկտեմբերին հանրահաւաք կատարեցին Հայաստանի մէջ Միացեալ Նահանգներու դեսպանատան դիմաց՝ դատապարտելով գերտէրութիւններուն անտարբերութիւնը Սուրիոյ մէջ քիւրտերուն նկատմամբ թրքական բանակին ռազմական գործողութիւններուն վերաբերող։

«Բոլորս մէկ մարդու նման կը դատապարտենք թրքական իշխանութիւններու ցեղասպան, մարդասպան քաղաքականութիւնը: Կոչ կ՛ուղղենք ամբողջ աշխարհի միջազգային հանրութեան՝ գերտէրութիւններուն՝ մէկ անգամուան համար մէկ վայրկեան մէկդի դնել իրենց գերակայ շահերը, նաւթային եւ ռազմական մթերքներ ծախելու շահերը եւ բռնել թուրքերու արիւնոտ, ցեղասպան ձեռքը եւ ըսել՝ բաւական է 100 տարին անգամ մը ցեղասպանութիւն կատարէք տարբեր ժողովուրդներու դէմ», ըսաւ Հայաստանի Ազգային ժողովի քիւրտ պատգամաւոր Կնեազ Հասանով:

Ան նշեց, որ թրքական իշխանութիւնները այսօր որդեգրած են ողջ աշխարհի քիւրտերը վերացնելու քաղաքականութիւն, կ՛ուզեն քրտական հողերը վերցնել եւ այնտեղ տեղաւորել 3 միլիոնէ աւելի իսլամներ: «Ատիկա հետագային չարիք պիտի ըլլայ ամբողջ աշխարհի ժողովուրդներուն, որոնց կարգին՝ Միացեալ Նահանգներու եւ Ռուսիոյ համար։ Մենք այսօր հաւաքուած ենք ու կը դատապարտենք Միացեալ Նահանգներու ճիշդ քաղաքականութիւնը քիւրտ ժողովուրդին նկատմամբ: Կը դիմենք միջազգային հանրութեան, մեծ պետութիւններուն: Կը դատապարտենք միջազգային հանրութեան խուլ ու համր ձեւանալը, գերտէրութիւնները՝ որոնց կարգին նաեւ Միացեալ Նահանգները, որոնք քիւրտերը մինակ ձգեցին թրքական թնդանօթներուն դէմ», շեշտեց Հասանով:

«Քիւրտիստանի կոմիտէ»ի նախագահ Սլօ Դրբոյեան Հայաստանի քրտական համայնքին կողմէ նամակը յանձնեց Միացեալ Նահանգներու դեսպանատան աշխատակիցներուն, որոնք խոստացան աւելի ուշ անպայման պատասխանել:

«Արմէնփրէս»ին հետ ունեցած զրոյցին ընթացքին Դրբոյեան նշեց, որ նամակին մէջ ներկայացուցած են իրենց պահանջները, որոնց գլխաւորն է փակել Թուրքիոյ օդային ճամբաները՝ աւելցնելով, որ պէտք է քայլերու ձեռնարկուի Թուրքիոյ նախագահ Էրտողանի այդ քաղաքականութեան դէմ պայքարելու համար:

Հանրահաւաքի մասնակիցները բարձրացուցին իրենց ազգակիցներուն նկարները, անոնք կը վանկարկէին՝ «Էրտողան՝ մարդասպան»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top