Ռուբէն Յովսէփեանի 80ամեակի Նշում Երեւանի Մէջ

1018ruben

1018ruben

Գրող, հրապարակախօս, հասարակական-քաղաքական գործիչ, բազմաթիւ վէպերու թարգմանիչ, թատերագիր եւ ՀՅԴ Բիւրոյի նախկին անդամ  Ռուբէն Յովսէփեանի 80ամեակին առիթով, Երեւանի մէջ կազմակերպուեցաւ յիշատակի երեկոյ մը, որուն ներկայ եղան անոր ընկերները եւ մտերիմները։ Ձեռնարկին ընթացքին գնահատուեցաւ Յովսէփեանի ստեղծագործական եւ հասարակական-քաղաքական երկարամեայ ուղին:

Յուշ-երեկոյին խօսք առաւ Համազգայինի Կեդրոնական վարչութեան ատենապետ Մկրտիչ Մկրտիչեան եւ ՀՅԴ Բիւրոյի անդամ Արսէն Համբարձումեան։

Մ. Մկրտիչեան ըսաւ, որ իր մահէն ետք տեղի ունեցած այս ձեռնարկին վեր պիտի առնուին Ռուբէն Յովսէփեանի յատկութիւնները եւ կատարած գործը, մանաւանդ որ իրեն նմանները կը գործեն շուքի մէջ, ուրեմն հասարակութեան պարտականութիւնն է այսպիսի անհատներու քարոզչութիւնը ինք ստանձնել, որովհետեւ անոնք հասարակութեան ծառայած են:

«Մարդկայնութիւնն ու հայրենասիրութիւնը Ռուբէն Յովսէփեանի հիմնական յատկանիշները կազմած են արդէն իր աւելի քան եօթանասունամեայ գիտակից կեանքին ընթացքին. անոնք փառաւոր կերպով կը ճառագայթեն յաւերժութեան համար իր կողմէ մեզի ժառանգ թողուած գործերուն մէջ: Պատանիներն ու երիտասարդները պէ՛տք ունին Ռուբէն Յովսէփեանի նման օրինակելի բնորդներու», դիտել տուաւ Մկրտիչեան:

Ապա ան խօսեցաւ հայրենասիրութիւն բուրող Յովսէփեանի գործին, անտեղիտալի հայրենասէրի յատկութեան մասին։

«Հայրենասէր արուեստագէտ Ռուբէն Յովսէփեանի հիմնական թեմաները, թէ՛ գրականութեան, թէ՛ ֆիլմարուեստի մէջ, երեխան է ու տարիքոտը՝ բիձան: Այստեղ գեղեցիկ խօսքով եւ զգացումով արտայայտուող պատգամ կայ, որ կարծես կ՛ըսէ. «Ամբողջ մեր սէրն ու խնամքը երեխային, ամբողջ մեր սէրը, երախտագիտութիւնն ու յարգանքը՝ երէցին», մէկ խօսքով ճանչնալ ու յարգել անցեալը՝ պատրաստելու համար ճիշդ ապագան», յայտնեց բանախօսը:

Ան աւելցուց, որ Ռ. Յովսէփեան կրաւորական հայրենասէր չէր, «այլ գործօն մասնակցութիւն բերած է հայկական հասարակութիւնը, հայկական պետութիւնը բարձրացնելու համազգային ճիգին. Հայաստանի Ազգային ժողովի, ՀՅԴ Բիւրոյի, Համազգայինի Կեդրոնական վարչութեան տարիներու վրայ երկարող անդամակցութիւնը ժամանակ խլած են հայկական գեղարուեստին ծառայելու իր հիմնական առաքելութենէն: Այս ձեւով, ան միայն հայ գրականութեան, հայկական ֆիլմարուեստին ծառան չէ, այլ մտաւորական՝ Հայաստանի համալսարանի հիմնադիր Նիկոլ Աղբալեանի՛ բնորոշումով՝ ըստ որուն, զարգացած մարդը պէտք է լծուի իր նմաններուն եւ իր հասարակութեան բառին լայն իմաստով մշակութային բարձրացման աշխատանքին: Այդ պաշտօնը Ռ. Յովսէփեան կատարած է նուիրումով՝ զայն ընդունելով իբրեւ իր գործունէութեան գլխաւոր առանցքներէն մէկը», եզրափակեց Մ. Մկրտիչեան։

Արսէն Համբարձումեան իր խօսքին մէջ շեշտեց, որ Ռուբէն Յովսէփեան մշակոյթի մարդ էր, բառին բուն իմաստով՝ մտաւորական։ Գրող, թարգմանիչ, խմբագիր, բեմագիր, քաղաքական գործիչ, բայց նախ եւ առաջ՝ մտաւորական, որ իր մէջ կը խտացնէ հայ մարդուն ազգային, բարոյական ու գեղագիտական արժէքները։

Ըստ անոր՝ Յովսէփեան «մարդաբան» էր, «մարդկանց տեսնելու, զգալու, հասկանալու զարմանալի յատկութիւն ունէր։ Եւ պատահական չէ, որ իր ստեղծագործութիւնների առանցքում հէնց մարդն է՝ իր աշխարհընկալմամբ ու իր կենցաղով»։

Համբարձումեան նշեց, որ Ռուբէն Յովսէփեան համեստ էր, կը նախընտրէր լուռ գործել։ «Խորապէս ազգային էր՝ մինչեւ վերջին նեարդը, բայց զերծ ազգային սնապարծութիւնից, համամարդկային արժէքների ճշմարիտ գնահատող»։

Անդրադառնալով անոր կուսակցական կեանքին ու գործին՝ բանախօսը դիտել տուաւ, որ Յովսէփեան մեծ դերակատարութիւն ունեցաւ Հայաստանի մէջ Դաշնակցութեան վերընձիւղման մէջ, որովհետեւ Ռուբէն Յովսէփեան տեսակին պահանջ կար այն ատեն եւս։

«Հակառակ այն իրողութեան, որ Ռուբէն Յովսէփեանը երկար տարիներ եղել է Դաշնակցութեան ղեկավար մարմինների անդամ՝ չի դարձել կուսակցական ֆունկցիոներ (պաշտօնեայ-Խմբ.), այլ իր մտաւորական տեսակով, լայնախոհութեամբ ու շրջահայեցութեամբ նոր հորիզոններ է բացել Դաշնակցութեան մտածողութեան մեջ։ Ինչպես միւս ասպարէզներում, քաղաքականութեան մեջ եւս Ռուբէն Յովսէփեանն իր գործի, ընդհանուր գործի ազնուականն ու մշակն էր՝ սկզբունքային, ուղղամիտ, խոսքի մեջ ժլատ, գործի մեջ՝ շռայլ։ Անկախ ունեցած հանգամանքից ու զբաղեցրած դիրքից՝ միշտ հանձնառու ու պարկեշտ», եզրափակեց Արսէն Համբարձումեան։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top