ՖԻՆԻՒԼի Խաղաղապահ Ուժերուն Հայկական Ջոկատը՝ Անթիլիասի Մէջ

0000ANTILIAS1

0000ANTILIAS1

 

ԱՆԹԻԼԻԱՍ.- Շաբաթ, 12 Հոկտեմբերին, Լիբանանի հարաւը տեղակայուած ՖԻՆԻՒԼի միջազգային խաղաղապահ ուժերուն հայկական ջոկատը, գլխաւորութեամբ Լիբանանի մօտ Հայաստանի դեսպան Վահագն Աթաբէկեանի՝ այցելեց Արամ Ա. կաթողիկոսին:

Դեսպան Աթաբէկեան խօսք առնելով՝ զինուորներուն յայտնեց, որ անոնք կը գտնուին հայապահպանման կարեւորագոյն կեդրոնին մէջ, որ ո՛չ միայն Լիբանանի մակարդակով, այլ աշխարհասփիւռ հայութեան համար կենսական դերակատարութիւն ունի, ապա հրաւիրեց վեհափառ հայրապետը ուղղելու իր խօսքը:

Վեհափառ հայրապետը ուրախութիւն յայտնեց անգամ մը եւս հայոց բանակի զինուորներուն հետ ըլլալուն համար եւ ընդգծեց, որ իւրաքանչիւր հայ զինուոր հերոս մըն է՝ պատրաստ իր կեանքը զոհելու հայրենիքի ազատութեան համար, եւ սա հայրենասիրութեան, հաւատքի, նուիրումի ու յանձնառութեան արտայայտութիւն է՝ վկայակոչելով հայոց պատմութեան սրբագոյն պատերազմներէն Վարդանանց պատերազմը, ուր նոյնիսկ ուժերու անհաւասարակշռութիւնը եւ ֆիզիքական ծանր կորուստները արգելք չհանդիսացան գերագոյն յաղթանակ արձանագրելու: Վեհափառ հայրապետը աւելցուց, որ թերեւս այսօր եւս մեր դէմ կը պարզուին ծանր զէնքեր, ի մասնաւորի Ատրպէյճանի կողմէ, սակայն մենք ունինք մեր հաւատքը, կամքն ու վճռակամութիւնը:

«Մենք բարձրագոյն աստիճանի նախանձախնդրութիւն ունինք հայ զինուորին եւ բանակին հանդէպ եւ պատրաստ ենք ամէն իմաստով զօրավիգ կանգնելու անոնց, որովհետեւ հայոց բանակի հզօրացումը Հայաստանի, Արցախի եւ համայն Սփիւռքի հզօրացումն է», նշեց վեհափառ հայրապետը՝ աւելցնելով. «Ուրախ եմ, որ դուք՝ իբրեւ խաղաղապահ ուժ, կը գտնուիք հարաւային Լիբանան: Թող աշխարհը ականատես ըլլայ, որ մինչ Սուրիոյ մէջ թուրք բանակը մարդ կը ջարդէ «խաղաղութեան» անուան տակ, հայոց բանակը խաղաղութեան կը մղէ հարաւային Լիբանանը»:

Աւարտին, վեհափառ հայրապետը զինուորներուն նուիրեց աղօթագիրքեր եւ խաչեր:

Նշենք, որ ջոկատը շրջեցաւ Մայրավանքին շրջափակը, այցելեց Մայր տաճար, Հայաստանի Հանրապետութեան անկախութեան 100ամեակի յուշակոթողը, յարգանքի տուրք մատուցեց Հայոց ցեղասպանութեան նահատակներուն՝ Սրբոց նահատակաց մատրան առջեւ:

Ջոկատը նաեւ այցելեց Ս. Աստուածածին վանքը, Հայոց Ցեղասպանութեան որբերու «Արամ Պէզիքեան» թանգարանը, Հայկազեան համալսարանը, հայ կաթողիկէ համայնքի Ս. Փրկիչ եկեղեցին եւ Զմմառու վանքը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top