Սուրիացիները Գետնախնձորներ Նետեցին Հեռացող Ամերիկացիներուն Վրայ

1022kurds

1022kurds

ԱՔՉԵՔԱԼԷ, «Էյ.Փի.».- 21 Հոկտեմբերին, հիւսիսային Սուրիոյ Գամիշլի քաղաքէն հեռացող ամերիկեան ուժերը տեղացիներուն կողմէ գետնախնձորներով յարձակումներու թիրախ դարձան։

«Մուկերու պէս փախուստ կու տան», ըսաւ քաղաքացի մը, մինչ ուրիշներ անգլերէնով կը պոռային. «Ամերիկան ստախօս է», համեմուած հայհոյանքներով։

Անցնող շաբաթավերջին, թրքական ուժերը քանի մը առիթներով խախտեցին ամերիկացիներուն հետ իրենց գոյացուցած զինադադարի պայմանները։

Սուրիական պետական «Սանա» լրատու գործակալութիւնը հաղորդեց, որ թրքական բանակը եւ անոր վարձկանները 20 Հոկտեմբերին մուտք գործեցին Սուրիոյ Հասաքէ գիւղական շրջանին մէջ գտնուող Ռաս Ուլ Այն քաղաքը, ուրկէ հեռացած էին քրտական ուժերը եւ քիւրտ քաղաքայիններուն մեծ մասը, իսկ «Մայատին»ը հաղորդեց, որ Հալէպ եւ Ռաքքա նահանգներուն մէջ գտնուող ամերիկեան ուժերը հեռացած են նշեալ նահանգներէն:

Ամերիկեան ուժերը 60 ինքնաշարժներով եւ բեռնակառքերով շրջանէն հեռացան Հալէպի արեւելեան գիւղական շրջանին մէջ գտնուող Սարին օդակայանէն: Անոնք Այն Արապի օդակայանէն հեռանալէ առաջ հրկիզեցին թղթածրարներ եւ փաստաթուղթեր:

Հասաքէի հիւսիսային գիւղական շրջանի Խարապ Ճիր ռազմակայանին մէջ գտնուող ֆրանսական ուժերը իրենց կարգին հեռացան շրջանէն:

Ամերիկեան զինուորական ուժերը շրջանէն կը հեռանան Իրաքի ուղղութեամբ:

Միացեալ Նահանգներու պաշտպանութեան նախարարութիւնը հաղորդեց, որ կը քննուի քիւրտերու հակակշիռին տակ գտնուող քարիւղի հանքերուն պաշտպանութեան համար փոքրաթիւ ամերիկեան ուժ մը շրջանին մէջ պահելու հարցը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top