Աւետարանչականի Սիրոյ Ազդեցութիւնը Վազաշէնի Ընտանիքին Վրայ՝ Նոր Տուն Եւ Տան Հօր Վերադարձը

0000Vazashen3

0000Vazashen3

ԵՐԵՒԱՆ.- «Հետք» լրատուական կայքը Օգոստոս 2018ին գրած էր Հայաստանի Տաւուշի մարզի սահմանամերձ Վազաշէն գիւղին մէջ իր երեք փոքր զաւակներուն հետ ապրող Արմենուհի Յակոբեանի ընտանիքին մասին: Գիւղին դիրքը հազիւ քանի մը հարիւր մեթր հեռաւորութեան վրայ է թշնամիի կրակոցներէն, ինչ որ աւելիով կը բարդացնէ արդէն իսկ օրուան ապրուստը ապահովելու դժուարութիւններ դիմագրաւող Վազաշէնի բնակիչներուն կեանքը:

Արմենուհիին ամուսինը ստիպուած էր Ռուսիա մեկնիլ աշխատանք ճարելու համար, որպէսզի իր ընտանիքին ապրուստը ապահովէ: Արդէն 15 տարիներէ ի վեր ընտանիքը կը բնակէր գիւղի մուտքին՝ խարխուլ շէնքի մը երկրորդ յարկին վրայ գտնուող երկու սենեականոց տան մը մէջ, բնակութեան համար վատ պայմաններով, ինչպէս՝ վառելանիւթի չգոյութիւն, անձրեւային փոթորիկներու ժամանակ տանիքէն ջուրի խուժում եւ փլատակ աստիճաններ:

Հարցը ոչ միայն որեւէ ժամանակ փուլ գալու վտանգ դիմագրաւող շէնքի վիճակն էր, այլ նաեւ անոր դիրքն էր՝ գիւղին մուտքին, հանդիսանալով հակառակորդին անմիջական թիրախ։ Շէնքին պատերուն վրայ կային հին եւ նոր հրացանի գնդակներու հարուածներու հետքեր: Ընտանիքը ստիպուած էր հակառակորդին կողմը գտնուող պատուհանները միշտ ծածկուած պահել, որպէսզի թշնամին չտեսնէ տան լոյերը: Իսկապէս Աստուծոյ մէկ հրաշքն էր, որ ընտանիքը այդքան երկար ժամանակ կրցած էր գոյատեւել այդ շէնքին մէջ: Ընտանիքը տնտեսական կացութեան պատճառով չէր կրցած աւելի ապահով տուն փոխադրուիլ, ո՛չ Վազաշէնի, ո՛չ ալ հարեւան այլ գիւղի մը մէջ: Արմենուհին ոչ մէկ ելք կը գտնէր իր ընտանիքը այս իրավիճակէն դուրս բերելու համար:

Երբ Ամերիկայի Հայ Աւետարանչական Ընկերակցութիւնը (ԱՀԱԸ) իմացաւ այս ընտանիքին իրավիճակին մասին, անմիջապէս իր օգնութեան ձեռքը երկարեց՝ անոր գիւղէն տուն ապահովելով, ինչպէս նաեւ անհրաժեշտ շինանիւթեր գնելով տան վերանորոգման աշխատանքներուն համար: Այս բոլորին իբրեւ արդիւնք՝ ընտանիքի հայրը կրցաւ Ռուսիայէն տուն վերադառնալ եւ սկսաւ տան վերանորոգման աշխատանքներուն:

ԱՀԱԸի բարեգործութեան այս սիրոյ արտայայտութիւնը երկկողմանի ազդեցութիւն ունեցաւ: Ընտանիքը այժմ ունի ապահով տուն, եւ տան հայրը Ռուսիայէն վերադարձած է տուն եւ միացած իր ընտանիքին:

ԱՀԱԸը շնորհակալութիւն կը յայտնէ այն բոլոր նուիրատուներուն, որոնք մեծ զոհողութիւններու գնով հնարաւորութիւն կու տան Յակոբեան ընտանիքին եւ իրենց նման այլ ընտանիքներու՝ յաղթահարելու կենցաղային դժուարութիւնները եւ ապրելու բարեկեցիկ կեանք մը:

 

(Թղթակցութիւնը՝ ԱՀԱԸէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top