Ծանր Է Դպրոց Փակելու Հետեւանքը

0000AGBU-HS-Protest

0000AGBU-HS-Protest

ՊՈԼԻՍ, «Ակօս».- Փասատինայի հայկական միակ երկրորդական վարժարանը փակելու ՀԲԸՄի որոշումը ցնցած ըլլալ կ՛երեւի ամբողջ Սփիւռքը եւ Հայաստանը: Սակայն վարժարան կորսնցնելու ցաւը ամէնէն շատ ընդվզեցուցած եւ խոցած է ծնողները, շրջանաւարտները եւ անշուշտ աշակերտութիւնը: Վերջինները դարձած են ցուցարարներ, ընկերային ցանցերու վրայ հայկական վարժարանը եւ հայեցի դաստիարակութիւնը պաշտպանելու ելած ինքնակոչ վահաններ եւ հանրահաւաքներու կազմակերպիչներ: Ստորեւ թարգմանաբար կը հրատարակենք աշակերտի մը նամակը (անունը ծածկելով) ուղղուած Հայաստանի Հանրապետութեան վարչապետ Նիկոլ Փաշինեանին:

Յարգելի վարչապետ Փաշինեան,

Ձեր գլուխ հանած Թաւշեայ յեղափոխութիւնը ոգեւորութեան մեծ ալիք մը ստեղծած է իմ եւ իմ նման բիւրաւոր հայ երիտասարդներու մօտ: Ես իր մայրենիին, մշակոյթին, պատմութեան եւ քրիստոնէական հաւատքին հպարտօրէն փարած ամերիկահայ երիտասարդ մըն եմ: Սակայն այդ զգացումներս խորտակուած են՝ լսելով 13 տարիներէ ի վեր ինծի եւ իմ նմաններուն հայեցի ուսում ջամբող Վաչէ եւ Թամար Մանուկեան երկրորդական վարժարանի փակուելու մասին լուրը: Մեր դպրոցը կը պատկանի Հայկական Բարեգործական Ընդհանուր Միութեան եւ հիմա մատնուած է իր առաքելութիւնը դադրեցնելու շեմին: Եթէ իրականանայ այդ որոշումը, փակուած պիտի ըլլայ Կլենտէլի եւ Փասատինայի միակ հայկական երկրորդական վարժարանը: Նշեմ, որ Կլենտէլը աշխարհի վրայ Հայաստանէն ետք ամենահոծ հայ բնակչութիւն ունեցող քաղաքն է:

Ձեզի կը դիմեմ, որովհետեւ հաւատացած եմ, որ դուք աշխարհի ամենահեղինակաւոր հայն էք, որ կարողութիւնը ունի այս խենթութիւնը վերացնելու: Քանի մը ամիսներ առաջ Լոս Անճելըսի ձեր ելոյթին ընթացքին ըսած էիք, թէ հայ ըլլալ ոչ թէ Հայաստան ապրիլ կը նշանակէ, այլ Հայաստանով ապրիլ: Ես ձեր այս պատգամը շարժման կոչ մը ըլլալով ընկալած եմ: Թէ՛ դպրոցս եւ թէ միւս դպրոցները կամուրջ մըն են մեր եւ Հայաստանի միջեւ: Ուսուցիչները ամէն օր մեզ կը յուշեն, թէ ով ենք եւ ուրկէ եկած ենք: Մեզի կը փոխանցեն հայ ըլլալու իմաստը: Կը սորվեցնեն, թէ ամերիկեան սփիւռքին մէջ մեր վրայ դրուած պարտականութիւն մըն է իմանալ մայրենին: Եթէ յանկարծ փակուի մեր դպրոցը, ես պիտի հարկադրուիմ ոչ-հայկական դպրոց մը յաճախելու: Այդ պայմաններուն մէջ ո՞վ հայերէնով պիտի դաստիարակէ զիս: Ո՞վ պիտի ուսուցանէ մեր պատմութիւնը, գեղարուեստը եւ աւանդոյթները: Ոչ ոք անշուշտ:

Համայն աշխարհի վրայ հայերը յաջողած են տնտեսական ու քաղաքական բազմաբնոյթ դժուարութիւնները յաղթահարել եւ իրենց գոյութիւնը պահել ո՛չ թէ դպրոց փակելով, այլ նոր դպրոցներ կառուցելով:

Յարգելի վարչապետ, ձեզմէ կը խնդրեմ, որ միջամտէք այս հարցին եւ արգելք ըլլաք մեր սիրելի վարժարանին փակուելուն: Դպրոցին փակուիլը շատ ծանր հետեւանքներ պիտի ունենայ ապագայ սերունդներուն համար: Կը կարծեմ, թէ նման քայլ մը պիտի վնասէ հայ ինքնութեան յարատեւումին: Քանի մը սերունդներու տեւողութեամբ կրնանք կորսնցնել դարերով կուտակուածը:

 

Յարգանօք՝ ՀԲԸՄի Վաչէ եւ Թամար Մանուկեան Վարժարանի Թ. դասարանի աշակերտ մը

Կլենտէյլ, Քալիֆորնիա

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top