Էնսինոյի Ս. Նահատակաց Եկեղեցւոյ Օծման 56րդ Ամեակի Ճաշկերոյթը

0000HolyMartyrs 56th2

0000HolyMartyrs 56th2ԷՆՍԻՆՕ.- Շաբաթ, 9 Նոյեմբերին, Էնսինոյի «Աւետիսեան» սրահին մէջ տեղի ունեցաւ տեղւոյն Ս. Նահատակաց եկեղեցւոյ օծման 56ամեակի ճաշկերոյթը, հովանաւորութեամբ եւ ներկայութեամբ Արեւմտեան թեմի առաջնորդ Մուշեղ արք. Մարտիրոսեանի։ Ձեռնարկը կազմակերպուած էր եկեղեցւոյ հոգեւոր հովիւին, Հոգաբարձութեան եւ 56ամեակի յանձնախումբին կողմէ, իսկ հիւրընկալութիւնը ստանձնած էր տէր եւ տիկին Ժոզէֆ եւ Նորա Սիմոնեան ամոլը։

Ներկայ էին առաջնորդական փոխանորդ Թորգոմ եպս. Տօնոյեան, Ազգային վարչութեան ատենապետ Կարօ Էշկիեան, Ֆերահեան Ազգային վարժարանի եւ Մարի Գապայեան նախակրթարանի ներկայացուցիչները, Սան Ֆերնանտօ հովիտի քոյր միութիւններու եւ կազմակերպութիւններու ներկայացուցիչներ, բարերարներ ու բարեկամներ։

Յայտագիրը սկիզբ առաւ հոգեւոր հայրերու սեղաններու օրհնութեամբ։

Ապա, հոգեւոր հովիւ Ռազմիկ Ա. քհնյ. Խաչատուրեան ողջոյնի խօսքով հանդէս եկաւ եւ երախտիքի խօսքեր արտասանեց առաջնորդ սրբազան հօր, Կրօնական ժողովին եւ Ազգային վարչութեան, որոնք միշտ զօրավիգ կանգնած են եկեղեցւոյ եւ ծխական շրջանի աշխատանքներուն։ Ապա ան շնորհակալութեան խօսք ուղղեց հիւրընկալ ամոլին եւ բոլոր նուիրեալներուն։

Հոգաբարձութեան խօսքը արտասանեց ատենապետ Յովիկ Պետեւեան, որ անդրադարձաւ անցած 56 տարիներու իրագործումներուն, որոնք արդիւնք էին անսակարկ ծառայողներու նուիրուածութեան։ Ան գնահատեց բոլոր անոնք, որոնք իբրեւ հոգեւոր սպասարկուներ կամ աշխարհականներ իրենց մասնակցութիւնը բերած են Սան Ֆերնանտօ հովիտի ազգային հաւաքական կեանքին եւ իրենց անսակարկ ծառայութեամբ գաղութի կեանքը աւելի եւս ջերմացուցած ու լուսաւորած են։

Այնուհետեւ, առաջնորդը, հոգեւոր հովիւին ու Հոգաբարձութեան ատենապետին ընկերակցութեամբ՝ արծաթապատ երկաթագիր «Մատեան Ողբերգութեան» («Նարեկ») գիրքը նուիրեցին Նորա Սիմոնեանին, որ շնորհակալութիւն յայտնեց իւրօրինակ յուշանուէրին եւ երեկոյի հիւրընկալութեան առիթին ընձեռնման համար, ինչպէս նաեւ գնահատեց եկեղեցւոյ մէջ տարուող հսկայական աշխատանքները։ Ան նոյնպէս երախտագիտութիւն յայտնեց առաջնորդ սրբազան հօր՝ իր օրհնութեան եւ առաջնորդութեան համար, ինչպէս նաեւ հոգեւոր հովիւին, Հոգաբարձութեան եւ յարակից մարմիններուն՝ անոնց նուիրեալ ծառայութեան համար։

Պաշտօնական յայտագիրը եզրափակուեցաւ առաջնորդին պատգամով։ Ան նախ շնորհաւորեց եւ գնահատեց հոգեւոր հովիւը՝ անցնող աւելի քան քսան տարիներու եկեղեցանուէր ծառայութեան համար, ինչպէս նաեւ դրուատեց նախկին եւ ներկայ Հոգաբարձութեանց ու Տիկնանց միութեանց անդամները, եկեղեցւոյ բոլոր նուիրեալները եւ երեկոյի կազմակերպիչները։ Սրբազանը իր պատգամը կեդրոնացուցած էր Ս. Գրային հետեւեալ համարներուն վրայ. «Աւելի սէր ունեցէք, որովհետեւ սէրը ամէն ինչի ամբողջացուցիչ շաղախն է», «Թզենիին հոգ տանողը անոր պտուղը կ՛ուտէ եւ իր տէրը պահպանողը պատիւ կը գտնէ» եւ «Ինչ որ ալ ընէք՝ սրտանց ըրէք, այնպէս՝ ինչպէս պիտի ընէիք Տիրոջ, եւ ոչ՝ մարդոց»։

«Այս երեկոյեան պատգամը ուղղուած է բոլորիս, որովհետեւ տարեդարձները ուխտի վերանորոգութեան պահեր եւ առիթներ են, որպէսզի մենք նժարի վրայ դնենք մեր ծառայութիւնը եւ հաւատաւոր առաքելութիւնը եւ եթէ երբեք բացթողումներ ունեցած ենք, զանոնք սրբագրենք եւ սիրտով, հոգիով ու միտքով շարունակենք մեր ծառայութիւնը։ Երբ բանի մը ձեռնարկենք եւ ամբողջական սիրով ըլլայ այդ մէկը, ամէն թերութիւն եւ բացթողում երկրորդական կը մնայ, որովհետեւ սէրը ամէն բան կը ծածկէ իր երկայնամտութեամբ եւ համբերութեամբ, եւ ամէն բան շիտակ ուղիին մէջ կը դնէ», ընդգծեց ան։

«Գնահատելով բոլորին նուիրումը եւ ծառայութիւնը, առաջնորդը յորդորեց, որ բոլորը անխտիր իրենց ծառայութեան ուխտը սիրով վերանորոգեն, աւելցնելով, որ այն հոգածութիւնը, զոր կը տածեն եկեղեցւոյ եւ վարժարանին նկատմամբ, անպայմանօրէն անոր արդիւնքը պիտի տեսնեն, այնպէս ինչպէս թզենիին հոգ տանողը անոր պտուղը կը ճաշակէ եւ իր տէրը պահպանողը պատիւ կը գտնէ։ «Իմ մաղթանքր եւ աղօթքն է, որ ինչ որ ընենք սրտանց ընենք, նախ Աստուծոյ համար ընենք, Աստուծոյ կողմէ շնորհք գտնելու համար, եւ ոչ թէ մարդոց կողմէ փառք եւ պատիւ փնտռելու», նշեց ան։ Սրբազանը իր խօսքը եզրափակեց՝ մաղթելով, որ ծխական ընտանիքը շարունակէ յաջողութիւններ եւ նորանոր բարձունքներ նուաճել իր առաքելութեան մէջ, իսկ գնահատեց եւ օրհնեց Սիմոնեան ընտանիքը՝ հիւրընկալութեան եւ առատաձեռնութեան համար։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top