Ուաշինկթըն Դարձեալ Կը Խօսի «Սուրիոյ Կողմէ Քիմիական Զէնքերու Օգտագործման» Մասին

ՈՒԱՇԻԿԹԸՆ, «Ռոյթըրզ».- Միացեալ Նահանգներու արտաքին գործոց նախարարութիւնը հաղորդագրութիւն մը հրապարակելով յայտարարեց. «Սուրիոյ նախագահ Պաշշար Ասատի վարչակարգին կողմէ Սուրիոյ մէջ քիմիական զէնքերու օգտագործումով պատերազմական ոճիրներ գործելուն փաստեր ունինք։ Քիմիական զէնքերու օգտագործումը մեր արդի պատմութեան մէջ զոհեր ու ահաւոր վէրքեր կը պատճառէ»:

Նախարարութիւնը նշեց, որ Միացեալ Նահանգներ կը զօրակցին քիմիական զէնքի արտադրութեան ու օգտագործման ամբողջական արգիլման եւ կոչ կ՛ուղղէ քիմիական զէնքերու վերաբերեալ համաձայնութիւնը ամբողջական կերպով գործադրելու:

Միացեալ Նահանգներու արտաքին գործոց նախարարութիւնը նաեւ ցաւ յայտնեց, որ «աշխարհի վրայ տակաւին կան վայրեր, ուր քիմիական զէնքերը առանց պատիժի կ՛օգտագործուին»:

«Ասատ պատասխանատու է անսահման ահաւորութեամբ արարքներու, որոնցմէ մէկ քանին համազօր են պատերազմական ոճիրներու եւ մարդկութեան դէմ ոճիրներու, եւ այդ ահաւոր արարքները կը ներառեն քիմիական զէնքերու օգտագործումը», նշեց նախարարութիւնը՝ Սուրիոյ վարչակարգին կոչ ուղղելով դադրեցնելու արգիլեալ զէնքերու օգտագործումը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top