«Սանասարեան Խան»ը Դարձեալ Բանավէճի Առարկայ

0000Sanasarian

0000SanasarianՍիրքէճիի մէջ «Սանասարեան խան»ին շուրջ բանավէճերը եւ դատական գործընթացները ատեն առ ատեն կը խօսեցնեն իրենց մասին։ Այս օրերուն դարձեալ օրակարգի վրայ է «Սանասարեան խան»ի պատկանելիութեան հարցը, որովհետեւ լուրեր կը շրջին այն մասին, թէ հայկական պատմական այդ շինութիւնը մօտիկ ապագային պիտի վերաբացուի իբրեւ պանդոկ։

Նոր բանավէճ մը սկսաւ, երբ «Ճէ.Հէ.Փէ.»ցի երեսփոխան Մեհմետ Պեքարօղլու քննադատեց մշակոյթի նախարար Մեհմետ Էրսոյը եւ ըսաւ, որ նախարարութիւնը անտարբեր կը մնայ պատմական շինութիւնները վերականգնելու գործընթացին նկատմամբ։ Պեքարօղլու աւելցուց նաեւ, որ պատմական բազմաթիւ շինութիւններ մեծ վնասներ կրած են վերականգնողական աշխատանքներու ընթացքին։ Այս շինութիւններէն մէկն ալ «Սանասարեան խան»ն է, որ Վագըֆներու ընդհանուր տնօրէնութեան կողմէ վարձու տրուած է, եւ որուն վարձակալը նորոգութիւններ իրականացուցած է՝ վնաս պատճառելով շէնքին պատմական դիմագիծին։

Նախարար Էրսոյ գրաւոր պատասխանեց «Ճէ.Հէ.Փէ.»ցի երեսփոխանին՝ անդրադառնալով նաեւ «Սանասարեան խան»ին։ Էրսոյ նշեց, որ «Սանասարեան խան»ին պատկանելիութեան վերաբերեալ իրաւական գործընթացը կը շարունակուի։ Ան դիտել տուաւ, որ այդ կալուածը կը պատկանի Վագըֆներու ընդհանուր տնօրէնութեան։ «Սանասարեան խան»ը թէեւ դատարանին որոշումով 2018ին վերադարձուած էր Պոլսոյ Հայոց պատրիարքարանին, բայց դատավճիռը բեկանուած էր, եւ խանը նորէն պետականացուած էր։

Ըստ նախարարին՝ «Սանասարեան խան»ին նկատմամբ խախտումները իրականացած են վարձակալին կողմէ։

Յիշեցնենք, որ «Սանասարեան խան»ը 1881ին կառուցուած է Էրզրումցի հայ վաճառական եւ բարերար Մկրտիչ Սանասարեանի կողմէ։ Շէնքը կառուցուած էր, որպէսզի եկամուտ ապահովէր Էրզրումի մէջ բացուած համանուն վարժարանին համար։

Հանրապետութեան հռչակումէն ետք, «Սանասարեան խան»ը անցած էր պետական գանձին ու սկսած էր գործածուիլ իբրեւ բանտ, իսկ աւելի ուշ գործածուած էր իբրեւ դատարանի շէնք։

2018ին դատարանը վճիռ արձակած էր «Սանասարեան խան»ը պատրիարքարանին վերադարձնելու մասին, բայց Վագըֆներու ընդհանուր տնօրէնութեան պահանջով դատավճիռը բեկանուած էր։

 

«ՄԱՐՄԱՐԱ»

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top