Անցնող 2 Տարիներուն Պետական Հաստատութիւններու Մէջ Առանց Աշխատելու Վարձատրուած Են 543 Անձեր

1213Bedagan

1213Bedagan

ԵՐԵՒԱՆ, «Արմէնփրէս».- Հայաստանի գլխաւոր դատախազութիւնը յատուկ ուշադրութիւն կը դարձնէ հանրապետութեան ուսումնական հաստատութիւններուն, ինչպէս նաեւ ընդհանրապէս պետական կառոյցներուն մէջ փտածութեան եւ կաշառակերութեան երեւոյթներու բացայայտման։

Հայաստանի գլխաւոր դատախազութեան փտածութեան յանցագործութիւնները հետապնդող վարչութիւնը բացայայտած է, որ 1 Յունուար 2018էն մինչեւ 20 Նոյեմբեր 2019 երկարող ժամանակաշրջանին, Հայաստանի պետական կառավարման եւ Տեղական ինքնակառավարման մարմիններուն կամ անոնց ենթակայ կառոյցներուն մէջ արձանագրուած, սակայն աշխատանքի չյաճախած կամ փաստացի աշխատանք չկատարած աշխատողներուն եւ անոնց անունով ձեւակերպուած աշխատավարձերու արձանագրուած յափշտակութեան կամ փտածութեան դէպքերուն վերաբերեալ յարուցուած են 254 քրէական գործեր: Անոնց 129ը կամ մօտաւորապէս 51 տոկոսը կը վերաբերէին կրթական, հիմնականին մէջ հանրակրթական հաստատութիւններու մէջ արձանագրուած աշխատողներուն:

Նշեալ անձերը տուեալ կազմակերպութիւններու ղեկավարներուն հետ ընկերական, բարեկամական կամ այլ յարաբերութիւններու հիման վրայ կոչուած են աշխատանքի, սակայն անոնք կա՛մ ընդհանրապէս աշխատանքի չեն ներկայացած եւ կամ իրենց վերապահուած աշխատանքային պարտականութիւնները չեն կատարած, սակայն գանձումներ կատարած են։ Քիչ չեն դէպքերը, երբ աշխատանքի ընդունուելէ կարճ ժամանակ ետք արձակուրդ առած են, բայց եւ այնպէս շարունակած են պաշտօնեայ նկատուիլ։

Յարուցուած նշեալ 254 քրէական գործերով յայտնաբերուած են արձանագրուած, սակայն աշխատանքի չյաճախած կամ փաստացի աշխատանքը չկատարած 543 անձեր: Անոնցմէ 222ը կամ 41 տոկոսը հանդիսացած են կրթական հաստատութիւններու մէջ արձանագրուած աշխատողներ:

Քրէական գործերուն հիման վրայ, այս յանցանքներէն եկած վնասը, նախնական հաշիւներով, կազմած է շուրջ 1,390,329,391 դրամ, որմէ պետութեան ունեցած վնասը՝ 1,035,253,643 դրամ է, իսկ համայնքներունը՝ 355,075,748 դրամ։

Պետութեան կրած վնասէն վերականգնուած է 415,555,554 դրամ, իսկ համայնքներուն՝ 93,233,387 դրամ, ընդ որում՝ ընդհանուր վնասէն 356 միլիոն դրամը եղած է կրթական հաստատութիւններուն մէջ արձանագրուած աշխատողներուն մասով, որմէ վերականգնուած է 101.4 միլիոն դրամը։

Հայաստանի գլխաւոր դատախազը յանձնարարած է շարունակել հետաքննութիւնները եւ անհրաժեշտ քայլերու դիմել։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top