Օտար Ուժերը Պէտք Է Հեռանան Միջին Արեւելքէն. Ռոհանի

0117iran

0117iran

ԹԵՀՐԱՆ, «Ռոյթըրզ».- Իրանի նախագահ Հասան Ռոհանի յայտնեց, որ իր երկիրը զօր. Քասեմ Սիւլէյմանիի ահաբեկումին պիտի հակադարձէ Միացեալ Նահանգները հեռացնելով շրջանէն եւ այդ ուղղութեամբ պիտի աշխատի, որքան որ այդ արշաւը տեւէ:

«Ամերիկեան ուժերը այսօր շրջանին մէջ ապահով չեն, իսկ եւրոպական ուժերը կրնան վաղը ապահով չըլլալ: Օտար ուժերը պէտք է հեռանան Միջին Արեւելքէն։ Արտասահմանի մէջ ոմանք Իրանին վնաս պատճառեցին: Ամերիկան է, որ լարուածութիւնը աճեցուց եւ պատժամիջոցներով ճնշում կը բանեցնէ իրանցի ժողովուրդին վրայ», յայտնեց Ռուհանի՝ շեշտելով. «Ամերիկա պատասխանատու է Իրանի վրայ պարտադրուած պատերազմին եւ պատժամիջոցներով Իրանի դէմ գործուած ոճիրներուն համար։

«Սէուտական Արաբիան եւ սիոնական գոյացութիւնը (Իսրայէլ) հիւլէական համաձայնութենէն դուրս գալ դրդեցին Ամերիկան, եւ վերջինս վնասեց», ըսաւ Ռոհանի՝ աւելցնելով. «Շրջանին մէջ սխալեցան, պատժամիջոցներ հաստատելով սխալեցան եւ սխալեցան նաեւ, երբ զօր. Սիւլէյմանին ահաբեկեցին»:

Յիշեցնենք, որ Բրիտանիա, Ֆրանսա եւ Գերմանիա պաշտօնապէս Իրանը մեղադրեցին իրանեան հիւլէական ծրագիրին վերաբերեալ ծրագիրի պայմանները խախտելու յանցանքով, ինչ որ կրնայ դարձեալ յանգեցնել կարգ մը պատժամիջոցներու վերահաստատման:

Իր կարգին, Իրանի արտաքին գործոց նախարար Մոհամետ Ճաւատ Զարիֆ յայտնեց. «Հիւլէական համաձայնագիրին ապագան կախեալ է Եւրոպայէն։ 2015ին կնքուած հիւլէական համաձայնագիրը լաւագոյն համաձայնագիրներէն մէկն է: Իրաքի մէջ հրթիռային յարձակումի գիշերը զուիցերիացիներուն ճամբով պատգամ մը յղեցինք, թէ տեղի ունեցածը ինքնապաշտպանութիւն է, եւ հետաքրքրուած չենք Միացեալ Նահանգներուն հետ բանակցութիւններով», ըսաւ Զարիֆ:

Միւս կողմէ, Գանատայի արտաքին գործոց նախարար Ֆրանսուա Ֆիլիփ Շամփան յայտարարեց, թէ Գանատա, Աֆղանիստան, Բրիտանիա, Շուէտ եւ Ուքրանիա Իրանէն վնասուց հատուցում կը պահանջեն ուքրանական օդանաւին զգետնումին համար:

Նախարարը յատարարութիւնը կատարեց նշեալ երկիրներու ներկայացուցիչներուն հետ Լոնտոնի մէջ տեղի ունեցած հանդիպումէն ետք:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top