Ամանորեայ Հանդէս ՀՕՄի «Անահիտ Մէյմարեան» Շաբաթօրեայ Վարժարանին

0000ARS Anahid Meymarian School2

ԷՆՍԻՆՕ.- 21 Դեկտեմբերի առաւօտուն, բացառիկ եռուզեռ կը տիրէր Ֆերահեան Ազգային վարժարանին մէջ: Այդ օր, ՀՕՄի «Անահիտ Մէյմարեան» շաբաթօրեայ վարժարանի աշակերտները աւելի ուրախ տրամադրութեամբ եկած էին դպրոց տօնելու իրենց նախասիրած տօնը՝ Կաղանդը:

Տօնական օրերու նախօրեակին, տնօրէնուհին եւ ուսուցչական կազմը աշխատեցան աշակերտներուն հոգիները լեցնել Կաղանդի եւ Ս. Ծնունդի հայկական սովորութիւններով եւ աւանդութիւններով: Անոնք Ծն-նդեան խորհուրդով լեցուած՝ ուղղուեցան Ֆերահեան Ազգային վարժարանի «Աւետիսեան» սրահը, ուր պիտի կատարուէր օրուան յատուկ հանդէսը:

Ներկայ էին ՀՕՄի «Անահիտ» մասնաճիւղի վարչական կազմը, Շաբաթօրեայ վարժարանի յանձնախումբի անդամները, մեր յարգելի ծնողները, շատ սիրելի ՀՕՄուհիներ եւ հիւրեր:

Հանդէսին բացման խօսքը կատարեց տնօրէնուհի Աշխէն Փափազեան: Ան ողջունեց ՀՕՄի վարչական կազմին ներկայութիւնը, յանձնախումբի անդամները, որոնք միշտ թիկունք կանգնած են իրենց եւ բարի գալուստ մաղթեց ծնողներուն, որոնք եկած էին իրենց սրտահատորներուն կատարումները վայելելու:

«Այս օրերուն, ամբողջ աշխարհը կը տօնէ Նոր տարին եւ Ս. Ծնունդը, որոնք ուրախութեամբ կը լեցնեն մեր սիրտերը: Հին տարուան փորձառութիւններէն կը սորվինք եւ կը մաղթենք, որ չարը երթայ եւ նոր տարուան հետ բարին գայ», ըսաւ ան եւ շեշտեց, որ հայ ժողովուրդը իր մշակոյթին պահպանութեամբ պահած է իր ինքնութիւնը ու յիշեցուց հին ժամանակներու նոր տարին՝ Նաւասարդեան տօնը, որ կը զուգադիպէր Օգոստոս 11ին:

Յայտագիրը շարունակուեցաւ խմբերգով՝ «Պատրաստել Ենք Նոր Տարուայ Հանդէս», առաջնորդութեամբ երգի ուսուցչուհի Անժելա Եկորեանի:

Մանկապարտէզի Ա. եւ Բ. խմբակները մանկական քնքշութեամբ կատարեցին ոտանաւորներ, որուն յաջորդեց «Նոր Տարի» խմբերգը:

Ա. եւ Բ. կարգերու աշակերտները կատարեցին ոտանաւորներ՝ «Ձմեռ Պապի» եւ «Հովիւներ Ենք Մենք», որուն յաջորդեցին «Տօնածառ» եւ «Դինգ-Դոնգ» երգերը:

Բարձր կարգի աշակերտները ասմունքեցին Մ. Իշխանի շատ նշանաւոր դարձած «Նամակ Կաղանդ Պապային» ոտանաւորը:

Գաթրին Հայրապետեանի կողմէ պատրաստուած հայկական պարը ալ աւելի խանդավառեց մթնոլորտը:

Յաջող ոտանաւորներ էին «Եղեւնին» եւ «Ձիւնին Մէջէն» ասմունքները:

Տեղի ունեցաւ պատկերաւոր ներկայացում մը՝ «Փոքրիկ Եղեւնին», թէ ինչպէս եղեւնին դարձած է տօնածառ եւ եղած անտառին ամէնէն գեղեցիկ ծառը:

Նուէրներով լեցուն տոպրակով եկած Կաղանդ պապային այցելութեան ընթացքին, մեծ ու փոքր՝ բոլորը մանկացած, զանգակներու ղօղանջով, հրճուանքով լեցուցին սրահը, խանդավառութեամբ երգելով Կաղանդի յատուկ երգեր:

Հանդէսի աւարտին, վարչութեան ատենապետուհի Շաքէ Թոքաթլեան գնահատանքով արտայայտուեցաւ կատարուած բացառիկ աշխատանքին, շնորհաւորեց տնօրէնուհին եւ ուսուցչուհիները, վարչութեան կողմէ յուշանուէրներ յանձնեց անոնց: Ան շեշտեց շաբաթօրեայ վարժարաններուն կարեւորութիւնը, օտար վարժարան յաճախող հայ աշակերտներուն, որոնք առիթը չունին ամէնօրեայ վարժարաններու հարազատ միջավայրին մէջ գտնուելու:

Եղաւ ճոխ հիւրասիրութիւն առատաձեռն ծնողներու կողմէ:

Արժանի է յիշել, որ ՀՕՄուհի Արաքս Խանպապեան սիրայօժար կերպով նուիրեց Կաղանդ պապային կողմէ տրուած նուէրները, իսկ Սոնա Թիթիզեան նուիրեց 100 տոլար:

Վարձքը կատար բոլոր անոնց, որոնք այսպիսի յաջող հանդէս մը կազմակերպեցին:

 

(Թղթակցութիւնը՝ ՀՕՄի «Անահիտ» մասնաճիւղէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top