«Յատուկ Խնամքի Կարօտ Հայորդիներու Տարուան» Հայրապետական Պատգամի Ընթերցում Թեմի Եկեղեցիներուն Մէջ

0000SPECIAL NEEDS3

ԼԱ ՔՐԵՍԵՆԹԱ.- Կիրակի, 12 Յունուարին, Արամ Ա. կաթողիկոսի «Յատուկ խնամքի կարօտ հայորդիներու տարուան» պատգամը ընթերցուեցաւ Անթիլիասի Ս. Գրիգոր Լուսաւորիչ Մայր տաճարին մէջ, ինչպէս նաեւ Արեւմտեան թեմի եկեղեցիներուն մէջ։

Առաջնորդ Մուշեղ արք. Մարտիրոսեան հանդիսապետեց Քրեսենթա հովիտի Հայց. առաքելական եկեղեցւոյ Ս. պատարագին, ներկայ հաւատացեալները հաղորդակից դարձուց կաթողիկոսին պատգամին եւ նոյն ժամանակ կոչ ուղղեց մեր ժողովուրդի զաւակներուն՝ գործնապէս զօրակցելու խնամքի կարօտ հայորդիներու։

Պատարագը մատուցանեց եկեղեցւոյ հոգեւոր հովիւ Ղեւոնդ քհնյ. Քիրազեան: Ներկայ էին Ազգային վարչութեան փոխատենապետ Մհեր Տէր Օհաննէսեան, երեսփոխաններ, Հոգաբարձութեան եւ յարակից մարմիններու անդամներ, համայնքի խնամքի կարիք ունեցող երեխաներ՝ իրենց ծնողներուն հետ, ինչպէս նաեւ հաւատացեալներու բազմութիւն մը:

«Հայր Մեր»էն առաջ, «Ուրախ լեր» շարականի երգեցողութեամբ, հոգեւոր հովիւը վեհափառ հայրապետին հռչակագիրը հանդիսաւոր կերպով յանձնեց առաջնորդ սրբազան հօր:

Առաջնորդը նախ շնորհաւորեց ծխական համայնքի Նոր Տարին եւ Ս. Ծնունդը, ապա փոխանցեց իր օրհնութիւնն ու բարեմաղթութիւնները։ Ան նշեց, որ վեհափառին հռչակագիրին ընդառաջ, Ազգային առաջնորդարանի այս տարուան օրացոյցը ձօնուած է «Յատուկ խնամքի կարօտ հայորդիներու տարուան», որ կը սկսի Քրիստոսի պատգամ-հրաւէրով. «Ինծի՛ եկէք դուք բոլորդ, յոգնածներ եւ բեռնաւորուածներ եւ ես հանգիստ պիտի տամ ձեզի»։

Անդրադառնալով վեհափառին պատգամին, առաջնորդը լուսարձակի տակ բերաւ մեր ժողովուրդին անբաժան մասնիկ եղող՝ յատուկ խնամքի կարօտ հայորդիները, որոնք պէտք է մեր գուրգուրանքի առարկան դառնան՝ առանց խտրականութեան։ Այլ խօսքով՝ մեր ընկերութեան եւ հաւաքական կեանքին մէջ անոնք պէտք է ունենան հաւասար իրաւունքներ եւ կարելիութիւններ։ Ապա, ան օրհնեց խնամքի կարիք ունեցող հրաշք երեխաները, անոնց նուիրեալ ծնողները, Կիրակնօրեայ վարժարանի սիրասուն փոքրիկները եւ ներկայ հաւատացեալները:

Աւարտին, արտասանուեցաւ Հայ եկեղեցւոյ պարզ բայց խորիմաստ բժշկութեան աղօթքը՝ «Ով Տէր մեր Աստուածը, Քու ժողովուրդէդ փարատէ ցաւերը եւ բժշկէ հիւանդութիւնները», որով վեհափառը աւարտած էր իր հռչակագիրը։

«Տէր ողորմեա»էն առաջ, հոգեւոր հովիւը, յանուն Քրեսենթա հովիտի եկեղեցւոյ մեծ ընտանիքին, ողջունեց առաջնորդը եւ խնդրեց ներկաներէն, որ «Տէր ողորմեա»ի պահուն աղօթք բարձրացնեն առ Աստուած, առաջնորդին քաջառողջութեան եւ արեւշատութեան համար, շարունակելու իր հովուական սրբազան առաքելութիւնը Արեւմտեան թեմին մէջ՝ ի փառս Աստուծոյ եւ ի պայծառութիւն Հայց. առաքելական եկեղեցւոյ:

Պատարագի աւարտին, դպրաց դասը երգեց «Խորհուրդ մեծ» շարականը՝ անգամ մը եւս աւետելով Քրիստոսի հրաշափառ Ս. Ծնունդն ու Յայտնութիւնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top