Դասական Կիթառի Վարպետ Սարօ Պապիկեանի Աշակերտներուն Ելոյթը

0123Saro

0123Saro

ՌՈԶԱՆՆԱ ՈՒԼԻԿԵԱՆ

 

Շաբաթ, 18 Յունուար, երեկոյեան ժամը 5էն սկսեալ, «Գրիգոր եւ Մարիամ Գարամանուկեան» կեդրոնի «Իսահակ եւ Ժանէթ Քազանճեան» սրահին մէջ տեղի ունեցաւ հանդիպում դասական կիթառի վարպետ Սարօ Պապիկեանի արուեստանոցի աշակերտներուն եւ անոնց ծնողներուն հետ:

Այստեղ անհրաժեշտ է վեր առնել սրահին կարեւորութիւնը՝ իբրեւ Կլենտէյլի հայ համայնքի արժէքները մէկտեղող եւ մշակութային առաքելութիւն ունեցող վայր մը:

Սրահը լեփլեցուն էր. ծնողներ, ընտանիքի անդամներ, մանուկներ, պատանիներ, արուեստասէր ունկնդիրներ:

Հանդիպման բացման խօսքը արտասանեց օրուան գլխաւոր գործող անձը՝ վարպետ կիթառահար Սարօ Պապիկեան, որ բարի գալուստ մաղթեց ներկաներուն, բացատրելով ձեռնարկին նպատակը:

Սարօ երաժշտական գործիքի մը տիրապետումը դիտել տուաւ որպէս ուսուցման  խոր-հրդանիշ: Հանդիպման ընթացքին հանդէս եկան սկսնակ (վեց ամիս) եւ 2 եւ աւելի տարիներու փորձ ձգած մանուկներ եւ պարմաններ: Յայտագիրը հագեցուած էր իւրաքանչիւր աշակերտին համար նախատեսուած 2 օտար եւ 1 հայկական՝ Կոմիտաս Վարդապետէն, ստեղծագործութիւններով:

Աւելի քան 1 եւ կէս ժամ տեւած յայտագիրին մաս կազմեցին 11 նորաբողբոջ մանուկ թէ պատանի խոստումնալից աշակերտներ՝ Յարութ Գարատանեան, Միլենա Մարգարեան, Ռաֆայէլ Մնացականեան, Նաթան Նազարեան, Լեւոն Հայրապետեան, Քեւին Նազարեան, Երուանդ Մաթեւոսեան, Տիգրան Կարապետեան, Շանթ Զէյթունցեան, Աշոտ Կոստանեան եւ Ալեքսանտր Յարութիւնեան: Սարօ Պապիկեան եւս իր մասնակցութիւնը բերաւ զուգանուագով մը:

Ունկնդիրները գոհունակութեամբ եւ ծափողջոյնով գնահատեցին եւ վարձահատույց եղան Սարօ Պապիկեանին, քաջալերեցին, որ իւրաքանչիւր աշակերտի անհատապէս ջամբած էր երաժշտական գիտելիքները:

Խորհրդանշական էին ելոյթները բեմահարթակին վրայ։ Լռութեան մէջ մեղմ, թաւշային թրթիռով հնչեցին կիթառով կատարուած եղանակներ, որոնք ծնունդ առին մանկանց մատներու հպումներէն: Իսկ այն պարմանները, որոնք 2 եւ աւելի տարիներ կը հետեւէին պարապմունքներուն, կրցան աւելի ճարտար ձեւով ներկայացնել իրենց կտորներուն մեղեդիները: Մեր փոքրիկ երաժիշտներուն հոգեկան ու ֆիզիքական աճը դրոշմուած էր անոնց դեմքերուն վրայ։

Յուզիչ էր, երբ ականատեսն ես, թէ ինչպէս հայ մայրերը հայ մշակոյթը ուսուցանելու ու տարածելու առաջնորդած են իրենց երեխաները, որոնք անկեղծ սէր ունին կիթառին հանդէպ։ Իսկ ուսուցման ողջ ընթացքին հետեւելու համար անոնցմէ երկաթեայ կամք կ՛ակնկալուէր։

Հանդիպման աւարտին Սարօ Պապիկեան շնորհակալութիւն յայտնեց ներկայ մայրերուն, մեծ մայրերուն եւ հայրերուն, մեծ հայրերուն, որոնք իրեն վստահած են իրենց զաւակները՝ իրենց դպրոցի դասերէն ետք հաղորդուելու լաւին, օգտակարին, նաեւ՝ հայկական բարերար շունչին:

Ձեռնարկը նուիրուած էր մանուկներուն, որովհետեւ ապագան կը պատկանի մանուկներուն, ու մանուկները ապագան են հայրենքին:

Երիտասարդական այս կեդրոնը իր գործունէութեամբ կ՛ամբողջացնէ գալիք սերունդը կերտելու իր առաքելութիւնը՝ «Ա-ռողջ միտք, առողջ մարմին» սկզբունքով:

Տարիները կ՛անցնին, եւ այս մանուկներուն յուշերուն մէջ վառ կը մնայ ուսուցիչ Սարօ Պապիկեանի կազմակերպած այս ելոյթը՝ իրենց ծնողքին եւ ունկնդիրին ներկայութեամբ։ Հասակ կ՛առնեն, եւ անոնք ալ իրենց կարգին, իրենց արուեստը որպէս ժառանգ կը փոխանցեն գալիք սերունդներուն:

Փոխարժեւորման գեղեցիկ պահ մըն էր հանդիսութեան աւարտը, որ յատկանշուեցաւ շնորհակալութեան եւ շնորհաւորանքի խօսքերով, հիւրասիրութեան ջերմ ու հարազատ մթնոլորտի մէջ, նոր հանդիպման ակնկալիքով:

Վարձքը կատար ծնողներուն, որոնք պատրաստած էին հիւրասիրութիւնը:

Աւարտին՝ աշակերտները գնահատուեցան ծաղկեփունջերով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top