Հանրապետականները Մերժեցին Նոր Փաստեր Նկատի Առնել Թրամփի  Դատավարութեան Ընթացքին  

0123impeach

0123impeach

ՈՒԱՇԻՆԿԹԸՆ, «Պի.Պի. Սի.».- Ինչպէս կ՛ակնկալուէր, Միացեալ Նահանգներու Ծերակոյտի հանրապետական մեծամասնութիւնը 21 Յունուարին մերժեց նախագահ Տանըլտ Թրամփի պաշտօնազրկումը պահանջող դեմոկրատ քոնկրեսական-դատախազներուն 11 առաջարկները, որուն հետեւանքով դեմոկրատ ծերակուտականները դարձեալ յայտարարեցին, թէ դատավարութեան արդարութիւնը կասկածի տակ է եւ տեղի ունեցածը իրականութիւնը ծածկելու փորձ մըն է։

Դեմոկրատները կը պնդեն, որ պէտք է լսել միջադէպին հետ անմիջական կապ ունեցող անձերուն վկայութիւնները, պարզելու համար, թէ նախագահը իր անձնական նպատակներուն համար շահագործա՞ծ է իր լիզօրութիւնները։ Անոնք կը պահանջեն յատկապէս Թրամփի հետ սերտօրէն աշխատած ազգային ապահովութեան նախկին խորհրդական Ճան Պոլթընի եւ Սպիտակ տան աշխատակազմի ղեկավարի պաշտօնակատար Միք Մալվեկնիի վկայութիւնները լսել:

Սակայն, Սպիտակ տունէն, արտաքին գործոց նախարարութենէն եւ այլ մարմիններէ յաւելեալ փաստերու եւ վկաներու տուեալները նկատի ունենալու դեմոկրատներուն առաջարկները մերժուեցան Ծերակոյտին մէջ 53-47 առաւելութիւն ունեցող հանրապետականներուն կողմէ, որոնք կը պնդեն, թէ նախագահին արարքները պաշտօնազրկումի պատիժին պէտք չէ առաջնորդեն։

«Մեր ժողովրդավարութիւնը պիտի նեխի, եթէ պարզուի, որ օտար քաղաքացիները կրնան միջամտել մեր ընտրութիւններուն եւ կրնան որոշել ընտրութիւններու արդիւնքը», յայտարարեց Ծերակոյտին մէջ դեմոկրատ փոքրամասնութեան ղեկավար Չաք Շումըր:

Նշենք, որ Ծերկոյտին մէջ դատավարութեան 21 Յունուարի նիստը շարունակուեցաւ մինչեւ յաջորդ օրուան առաւօտեան ժամը 2: Յառաջիկայ օրերուն, երկու կողմերը պիտի ներկայացնեն իրենց ամբաստանութիւնները եւ պաշտպանողականները։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top