25 Նորագիրներ Միացան Հայ Յեղափոխական Դաշնակցութեան Շարքերուն

0129ARFDAY3

0129ARFDAY3

 

ԷՆՍԻՆՕ.- Շաբաթ, 25 Յունուարի յետմիջօրէին, Էնսինոյի Ազգային Ֆերահեան վարժարանի «Տիգրանեան» սրահին մէջ, 24 հայորդիներ Հայ Յեղափոխական Դաշնակցութեան շարքերուն միացան, ընկերական լայն շրջանակի մը ներկայութեան տալով իրենց երդումը:

Դաստիարակչական յատուկ ծրագիրին հետեւած երիտասարդ մը եւս աւելի ուշ պիտի տայ իր երդումը, միանալով այս խումբին:

Երդման հանդիսաւոր արարողութեան բացումը կատարեց նորագիրներու կուսակցական նախապատրաստական աշխատանքները կազմակերպած յանձնախումբի անդամ Արամ Մանուկեան: Ան ներկայացուց նորագիրները եւ հրաւիրեց կնքահայրը՝ ՀՅԴ Արեւմտեան Ամերիկայի Կեդրոնական կոմիտէի նախկին անդամ Արթօ Քէօլէյեանը, որ իր պատգամը փոխանցէ եւ առնէ անոնց երդումը՝ Դաշնակցութեան դրօշին, ծրագիրին, կանոնագիրին եւ մարտունակութեան խորհրդանիշին վրայ:

Նորագիրներուն յղած իր խօսքին մէջ, Արթօ Քէօլէյեան, ըսաւ. «Կեդրոնական կոմիտէին որոշումով դուք հաւաքաբար կը պատկանիք Ռոստոմի սերունդին: Ռոստոմի ամենաամբողջական եւ կատարեալ բնութագիրը Սիմոն Վրացեան կատարած է՝ գրելով. «Եթէ Քրիստափորը եղաւ ՀՅ Դաշնակցութեան միտքն ու կամքը, եւ Զաւարեանը նրա սիրտն ու խիղճը, Ռոստոմը ե՛ւ միտքն էր, ե՛ւ կամքն ու խիղճը՝ Դաշնակցութիւնն ինքը, իր բովանդակ էութեամբ»: Ռոստոմ կը հաւատար կենդանի գործի, իրեն համար չկար գործին մեծն ու պզտիկը, խոնարհն ու շքեղը»: Ան յիշեցուց իր վրայ խոր ազդեցութիւն ձգած Նիկոլ Աղբալեանի այս միտքը. «Դաշնակցութիւնը լաւատես երազողների խմբակցութիւն չէ, այլ հանրային պայքարի կազմակերպութիւն: Նա ճիգի եւ աշխատանքի կուսակցութիւն է», շեշտելով նորագիրներուն, որ ըլլան «պատրաստակամ՝ մասնակցելու որեւէ աշխատանքի, որ կը հետապնդէ հաւաքական շահերը, Դաշնակցութեան ծրագիրի եւ գաղափարաբանութեան հաւատամքով»:

Ան աւելցուց. «Կ՛ուզեմ որ անդրադառնաք Դաշնակցականի անկեղծութեան ուժին: Անկեղծութիւնը եւ պարկեշտութիւնը յարգանք կը պարտադրեն. անոնք աշխատանքը աւելի արդիւնաւէտ կը դարձնեն: Դուք այսօր ձեր իսկ կամքով կը դառնաք Դաշնակցութեան անկե՛ղծ զինուորներ»։

Երդման արարողութիւնը աւարտեցաւ Դաշնակցութեան քայլերգին խմբերգումով: Ապա, ներկայ շարքային ընկերները, որոնց մէջ նկատառելի էր իրենց զաւակներուն ստանձնած յանձնառութեամբ հպարտ ծնողներուն թիւը, շնորհաւորեցին նորագիրները:

ՀՅԴ Արեւմտեան Ամերիկայի Կեդրոնական կոմիտէին կողմէ նորագիրներուն պատգամ փոխանցեց դոկտ. Ռազմիկ Շիրինեան։

Երդման արարողութենէն ետք, Ֆերահեան Ազգային վարժարանի «Աւետիսեան» սրահին մէջ, առաւել քան 700 մասնակցողներու ներկայցութեամբ տեղի ունեցաւ ՀՅԴ Օրուան խրախճանքը, որուն հանդիսավարն էր Միրնա Քասսամանեան։ Ան իր խօսքին մէջ ըսաւ. «Հայ Յեղափոխական Դաշնակցութեան օրն է այսօր. 130 ամեայ՝ սակայն հոգիով միշտ երիտասարդ եւ պանծալի կուսակցութեան մը տարեդարձն է այսօր»։ Խօսելէ ետք ժողովուրդին ու հայրենիքին ծառայելու մտայղացումով առաջնորդուող Դաշնակցութեան լայնածաւալ աշխատանքներուն եւ նպատակասլաց ծրագիրներուն մասին՝ ան աւելցուց. «Միասնաբար շարունակենք Հայ Յեղափոխական Դաշնակցութեան անխափան երթը, մնալով Հայ Դատի հաւատարիմ ջահակիրները, որոնք կը ծառայեն հայ ազգին եւ Հայաստան աշխարհին, ու վճռական են այդ ջահը փոխանցելու գալիք սերունդին՝ Հայոց եկեղեցւոյ, հայկական դպրոցներու եւ Դաշնակցական ակումբներու եւ միութիւններու միջոցաւ: Թող որ Հայ Յեղափոխական Դաշնակցութեան 130ամեայ անմար ջահը լուսաւորէ հայ ժողովուրդին միտքերը՝ մտածելու եւ աշխատելու հայօրէն, ի նպաստ Հայաստանին, Արցախին եւ սփիւռքահայութեան»:

Ան նաեւ բացատրեց «Հայրենիքիս համար, Ժողովուրդիս հետ» նշանաբանով Դաշնակցութեան օրուան տօնակատարութիւնը այս տարի շրջանի պատկերասփիւռի կայաններէն եւ համացանցի միջոցաւ սփռելու որոշումը:

Նշենք, որ Դաշնակցութեան օրուան տօնակատարութեան մէկ ժամեայ յայտագիրը սփռուեցաւ Կիրակի, 26 Յունուարի երեկոյեան ժամը 6ին։ Զայն կարելի է դիտել՝ այցելելով https://youtu.be/wW5IRowyz6o կայքէջը։

 

 

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top