Սուրիական Ուղղաթիռ Մը Եւս Վար Կ՛առնուի

0215syr

0215syr

ԹՐՔԱԿԱՆ ՅԱՐՁԿՈՒՄՆԵՐԸ ԿԸ ԴԱՏԱՊԱՐՏՈՒԻՆ

 

ԵՐԵՒԱՆ, ՀԱԼԷՊ, «Ազատութիւն», «Գանձասար».- Սուրիոյ Իտլիպ նահանգին մէջ շարունակուող ռազմական ընդհարումներուն ընթացքին, սուրիական բանակը 14 Փետրուարին կորսնցուց ուղղաթիւ մը եւս, որ այս շաբթուան ընթացքին երկրորդ զգետնուած ուղղաթիռը հանդիսացաւ։

Թրքական «Անատոլու» գործակալութիւնը կը հաղորդէ, որ շարժական կայանէ մը արձակուած հրթիռով հարուած ստացած ուղղաթիռը ինկաւ Հալէպ նահանգին մօտերը եւ անոր օդաչուները սպաննուած են: Առաջին ուղղաթիռը զգետնուած էր 11 Փետրուարին:

Նաեւ, Հինգշաբթի, 13 Փետրուարին, զինուորական աղբիւր մը հաղորդեց, որ գիշերուան ժամը 11:45ին, Իսրայէլ սուրիական գրաւուած Կոլանէն հրթիռներ արձակեց Դամասկոսի ուղղութեամբ: Սուրիական հակաօդային պաշտպանութեան համակարգերը դէմ դրին հրթիռներուն եւ վար առին անոնց մեծամասնութիւնը:

Միւս կողմէ, Սուրիոյ պետական լրատու գործակալութիւնը հաղորդեց, որ թրքական զինուորական ուժերը կը շարունակեն յարձակիլ դէպի Իտլիպ յառաջացող սուրիական բանակին վրայ: Անոնք թիրախ կը դարձնեն նաեւ խաղաղ բնակչութիւնը եւ զինուորական կեդրոններ, որուն հետեւանքով այդ շրջանի ահաբեկչական շարժումը սկսած է վերակենդանանալ:

Սուրիոյ արտաքին գործոց նախարարութիւնը հանդէս եկաւ հաղորդագրութեամբ մը, որուն մէջ կ՛ըսուի. «Սուրիա խստիւ կը մերժէ սուրիական հողերուն վրայ թրքական ուժերուն ներկայութիւնը, զայն միջազգային օրէնքի խախտում եւ Սուրիոյ գերիշխանութեան սպառնալիք համարելով»: Նախարարութիւնը շեշտեց, որ թրքական ուժերուն ապօրինի ներկայութիւնը կը հակասէ Իտլիպի ապահով գօտիին շուրջ Ասթանայի եւ Սոչիի համաձայնութիւններուն եւ կը բացայայտէ Թուրքիոյ նախագահ Էրտողանի թշնամական վարքագիծը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top