Փասատինայի Ս. Սարգիս Եկեղեցւոյ Անուանակոչութեան Տօնակատարութիւն

0000ST SARKIS CHURCH NAME DAY12

ՓԱՍԱՏԻՆԱ.- Կիրակի, 9 Փետրուարին, Փասատինայի Ս. Սարգիս եկեղեցին եպիսկոպոսական Ս. պատարագով եւ մատաղօրհնէքով նշեց իր անուանակոչութեան տօնը։ Այս առիթով, Արեւմտեան թեմի առաջնորդ Մուշեղ արք. Մարտիրոսեան պատարագ մատուցանեց, իր պատգամը ուղղեց եւ մատաղի օրհնութիւնը կատարեց։ Ս. սեղանին սպասարկեց եկեղեցւոյ հոգեւոր հովիւ՝ Պօղոս քհնյ. Պալթայեան։ Ներկայ էին եկեղեցւոյ ժողովականութեան անդամներ, եկեղեցւոյ գլխաւոր բարերար՝ տէր եւ տիկին Սարգիս եւ Սիւզան Կիտցինեան ամոլը եւ ընտանիքի անդամներ ու հաւատացեալներու հոծ բազմութիւն մը։

Անուանակոչութեան տօնին առիթով, առաջնորդը նախ ողջունեց եւ շնորհաւորեց ծխական համայնքը, բարերարներն ու հաւատացեալները եկեղեցւոյ, ապա, հրաւիրեց բոլորը՝ Ս. Սարգիս զօրավարին բարեխօսութիւնը խնդրելու։ Խօսելով Ս. Սարգիսի կեանքին, հալածանքին եւ նահատակութեան մասին՝ ան նշեց, որ Ս. Սարգիս երկրաւոր թագաւորին հաւատարիմ զինուորը եղաւ, բայց մանաւանդ Երկնաւոր Թագաւորին հաւատարիմ զինուորը մնաց եւ իր նահատակութեամբ՝ իր հաւատքը պաշտպանեց, արդարութեան պսակին արժանանալով։ Սրբազանը ընդգծեց, որ Ս. Սարգիսին համար երկրաւոր փառքը ոչնչնութիւն էր, որովհետեւ ինք կորստական կերակուրին կարեւորութիւն չէր ընծայեր, այլ այն կերակուրին, որ յաւիտենական կեանքին համար վերապահուած էր։

«Ս. Սարգիսին օրինակով, մենք եւս մեր կեանքը պէտք է յոյսով սպառազինուած ու հաւատքով բոցավառուած առաջնորդենք եւ խնդրենք Տիրոջմէ, որ մեր հաւատքը, յոյսը եւ սէրը աւելցնէ՝ Իր պատուիրանները պահելու համար։ Իւրաքանչիւրիս համար հաւատքը թող ըլլայ պաշտպանութեան վահան եւ յոյսը՝ սաղաւարտ փրկութեան», ըսաւ առաջնորդը։

Պատարագին աւարտին տեղի ունեցան հոգեհանգստեան պաշտօն եւ մատաղի օրհնութիւն։ Աղօթք բարձրացուեցաւ եկեղեցւոյ անդրանիկ հոգեւոր հովիւին, բարերար ամոլի ծնողքին, երեսփոխաններու, Հոգաբարձութեան ու Տիկնանց միութեան եւ եկեղեցւոյ բոլոր ննջեցեալ սպասարկողներու հոգիներու խաղաղութեան համար։

Ապա, «Ուրախ Լեր» շարականին երգեցողութեամբ, սրբազանը թափօրով առաջնորդուեցաւ եկեղեցւոյ գաւիթը, ուր արարողութիւնը վերջ գտաւ «Կիլիկիա» երգով ու հայրապետական մաղթերգներով եւ Հայաստանի քայլերգով։

 

ՃԱՇԿԵՐՈՅԹ

 

Այնուհետեւ, ներկաները ուղղուեցան դէպի «Յովհաննէս եւ Հռիփսիմէ Ճիվելէկեան» երիտասարդական կեդրոնը, ուր այս առիթով տեղի ունեցաւ սիրոյ ճաշ։ Յայտագիրը սկիզբ առաւ բացման աղօթքով։

Յանուն Հոգաբարձութեան՝ ատենապետ Յակոբ Ետալեան բարի գալուստ մաղթեց առաջնորդին եւ ներկաներուն, շնորհաւորեց Սարգիս եւ Մարտիրոս անունները կրողները, շնորհակալութիւն յայտնեց մատաղի հովանաւոր Մակի Իլանճեանին ու բոլոր նուիրատուներուն, ինչպէս նաեւ Տիկնանց օժանդակ մարմինին ժրաջան անդամուհիներուն։

Ճաշին ընթացքին ներկաները վայելեցին հայկական ժողովրդային երգերու փունջ մը, կատարողութեամբ եկեղեցւոյ դպրաց դասի անդամներուն եւ ղեկավարութեամբ դպրապետ Երուանդ սրկ. Քէշիշեանի, իսկ փոքրիկներ Լորի եւ Սագօ Կիտցինեաններ բանաստեղծութիւններով հանդէս եկան։

Հոգեւոր հովիւը երախտագիտութիւն յայտնեց առաջնորդին, որ անգամ մը եւս նախագահեց եկեղեցւոյ անուանակոչութեան տօնակատարութեան եւ փոխանցեց իր հայրական պատգամը եւ օրհնութիւնները, ինչպէս նաեւ շնորհակալութիւն յայտնեց Հոգաբարձութեան, Տիկնանց միութեան, դպրաց դասին ու բոլոր նուիրատուներուն՝ իրենց ծառայութեան ու աջակցութեան համար։

Յայտագիրը վերջ գտաւ սրբազան հօր պատգամով։ Ան մատնանշեց, որ մեր նուիրումը, զոհողութիւնը եւ ծառայութիւնը պէտք է Աստուծոյ փառքին համար ըլլան եւ ոչ թէ մեր նմաններուն կողմէ մեր հասցէին ուղղուած գովաբանութեամբ։ Ան վերահաստեց, որ հակառակ իր քաջութեան եւ կոչումներուն՝ Ս. Սարգիսը մնաց մեր Տիրոջ խոնարհ ծառան եւ երբեք իր հաւատքէն ու սկզբունքներէն չշեղեցաւ։ Այնուհետեւ, ան յորդորեց ներկաներուն այս տօնը վերածել հաւատքի խոստովանութեան եւ ուխտի վերանորոգութեան առիթ՝ Ս. Սարգիսի օրինակին հետեւելով։ Առաջնորդը գնահատեց հոգեւոր հովիւը, Հոգաբարձութիւնը, Տիկնանց միութիւնը, Ս. խորանի սպասարկողները եւ դպրաց դասը, անգամ մը եւս շեշտելով, որ ծառայութիւնը մեր անձը գովաբանելու առիթ կամ միջոց պէտք չէ ըլլայ։ Մէջբերելով «Ինչ որ ցանես, զայն կը հնձես» առածը, ան կոչ ուղղեց՝ միշտ սէր, բարութիւն եւ ծառայութիւն ցանելու։ Սրբազանը խօսքը աւարտեց՝ իր օրհնութիւնները փոխանցելով բոլորին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top