Սուրիոյ Հարցով Ռուսիա Եւ Թուրքիա Չեն Կրցած Համաձայնիլ

0220lavrov

0220lavrov

ՄՈՍԿՈՒԱ, «Ռոյթըրզ».- Ռուսիոյ արտաքին գործոց նախարար Սերկէյ Լաւրով յայտարարեց, որ Մոսկուայի մէջ, Չորեքշաբթի, Փետրուար 19ին, Սուրիոյ հարցով Թուրքիոյ հետ բանակցութիւններուն ընթացքին կարելի չէ եղած համաձայնութիւն գոյացնել:

Լաւրով յայտնեց, որ Սուրիոյ կառավարական ուժերը հաւատարիմ են իրենց ստորագրած համաձայնութիւններուն, սակայն իրաւուքն ունին նաեւ պատասխանելու իրենց դէմ կատարուող սադրիչ գործողութիւններուն, յիշեցնելով, որ Հալէպի նոր ազատագրուած գիւղերուն վրայ ահաբեկչական ուժերը դարձեալ յարձակած են, սակայն ետ մղուած են Չորեքշաբթի օր։

Նախարարը շեշտեց նաեւ, որ «Ճապհաթ Նուսրա»ի զինեալները Թուրքիոյ հսկողութեան տակ գտնուող Իտլիպէն կը շարունակեն յարձակումներ գործել նաեւ ռուսական ուժերուն վրայ:

Իր կարգին, Ռուսիոյ նախագահի մամլոյ խօսնակ Տմիթրի Փեսքով նշեց, որ Թուրքիոյ կողմէ Սուրիոյ կառավարական ուժերուն վրայ ռազմական գործողութիւններու շարունակութիւնը տարածաշրջանին համար «վատագոյն բեմագրութիւնը» պիտի հանդիսանայ։

Յատկանշական է, որ Չորեքշաբի օր Մոկուայի մէջ կայացած հանդիպումէն առաջ իսկ, Թուրքիոյ արտաքին գործոց նախարար Մեւլուտ Չաւուշօղլու հաւանական նկատած էր, որ ռուս-թրքական բանակցութիւններուն ձախողութեան պարագային, յառաջիկայ օրերուն Թուրքիոյ եւ Ռուսիոյ նախագահներ՝ Ռեչեփ Թայիփ Էրտողանի եւ Վլատիմիր Փութինի միջեւ տեղի պիտի ունենայ հանդիպում մը, որուն ընթացքին ղեկավարները պիտի քննարկեն Իտլիպի կացութիւնը:

Թրքական պատուիրակութիւնը, զոր կը գլխաւորէ արտաքին գործոց փոխնախարար Սետաթ Էօնալ, Փետրուար 17էն ի վեր կը գտնուէր Մոսկուա։

Լաւրովի յայտարարութենէն ետք, Թուրքիոյ նախագահի խօսնակ Իպրահիմ Քալըն յայտնեց. «Մոսկուայի բանակցութիւնները մեզի բաւարարող արդիւնքի չեն հասած: Մեզի ներկայացուած քարտէսն ու պայմանները չենք ընդունիր», առանց մանրամասնելու, սակայն բանակցութեան մօտիկ աղբիւրներ կը կը յայտնեն, որ Անգարայէն կը պահանջուի Իտլիպի իր դիտակէտերը տեղափոխել։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top