Քոնկրեսականներու Աշխատակիցները Պիտի Հետեւին Արցախի Ընտրութեանց

0220Speire-Pallone

0220Speire-Pallone

ՈՒԱՇԻՆԿԹԸՆ, «Ամերիկայի Ձայն».- Միացեալ Նահանգներու շարք մը քոնկրեսականներ յայտարարեցին, որ Արցախի հրաւէրով իրենց աշխատակիցները պիտի ուղարկեն՝ հետեւելու Արցախի Հանրապետութեան 31 Մարտի ընտրութիւններուն:

«Մենք անշուշտ կ՛ուզենք արդար ընտրութիւններ տեսնել Արցախի մէջ, 31 Մարտին, ուրեմն ձեզի տեղեակ կը պահեմ, որ որոշած եմ նաեւ իմ աշխատակիցը ուղարկել ընտրութիւններուն ընթացքին հետեւելու», նշեց հայկական արմատներ ունեցող քոնկրեսական Ճեքի Քանչելեան Սփիր՝ աւելցնելով. «Ատրպէյճան Արցախի անկախութիւնը ճանչնայ կամ ոչ՝ կեանքը հոն պիտի շարունակէ զարգանալ։ Շատ կարեւոր է, որ Արցախի մէջ ժողովրդավարութիւնը կը շարունակէ զարգանալ»:

Պաքուն, որ Արցախի պետութիւնը չի ճանչնար, ընտրութիւնները «գրաւուած տարածքներուն մէջ քաղաքական ցուցադրութիւն» կ՛անուանէ:

Քոնկրեսի աշխատակիցներուն հետ ընտրութիւններուն ընթացքի համակարգում իրականացնելու համար Արցախ պիտի այցելէ նաեւ քոնկրեսական Ֆրանք Փալոնի աւագ խորհրդական Ճէյմզ Ճանսըն, որ կ՛ըսէ. «Ուսումնասիրած եւ տեսած եմ, որ Արցախի նախորդ ընտրութիւնները եղած են ազատ, արդար եւ թափանցիկ բոլոր չափանիշներով: Յոյս ունինք, որ այս անգամ եւս անոնք նոյնպէս ազատ պիտի ըլլան»:

Իր կարգին, Փալոն աւելցուց՝ ըսելով. «Շատ կարեւոր է ամբողջ աշխարհին ցոյց տալ, որ Արցախի մէջ ժողովրդավարութիւն հաստատուած է։ Մենք կ՛ուզենք մատնանշել, որ Արցախի մէջ գործող ժողովրդավարութիւնը կը համապատասխանէ ազատ հասարակութեան բոլոր չափանիշներուն»:

Նշենք, որ հակառակ շարք մը քոնկրեսականներու կեցուածքին, Միացեալ Նահանգներու արտաքին գործոց նախարարութիւնը նախապէս չէ ճանչցած Արցախի տարածքին տեղի ունեցած ընտրութիւններուն օրինականութիւնը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top