Հայոց Ցեղասպանութեան Նիւթով Աշակերտական Յատուկ Դաստիարակչական Ելոյթ

0000HOUNASDAN

0000HOUNASDAN

Հայոց Ցեղասպանութեան 105րդ եւ հրէական Ողջակիզման 75րդ տարելիցներուն առիթներով, ՀՅԴ Յունաստանի Հայ Դատի յանձնախումբը եւ ՀՅԴ Յունաստանի Երիտասարդական Միութիւնը, ընդառաջելով իրենց ուղղուած յատուկ հրաւէրին՝ Երեքշաբթի, 18 Փետրուարի առաւօտուն ներկայ գտնուեցան Լաղոնիսիի մէջ գտնուող Քալիվիայի թիւ 2 երկրորդական պետական վարժարանը: Երկու կարեւոր պատմական փաստերուն անդրադառնալու եւ պատմական տուեալներուն ու անոնց յետագայի հետեւանքներուն շուրջ աշակերտութիւնը իրազեկելու ու դաստիարակելու համար, կրթարանի ուսուցչական կազմը, առաջնորդութեամբ՝ տնօրէնուհի տիկին Ֆ. Մարղիորայի եւ բանասէր տիկին Աննա Փոլիթուի, նախապատրաստական լայն աշխատանք մը գլխաւորած էին նախորդող օրերուն, դպրոցի աշակերտներուն տարբեր տեսակի աշխատանքներ յանձնելով:

Այսպէս, անոնց Ա. Բ. եւ Գ. դասարաններէն խմբակներ, տեսերիզներ պատրաստած էին, վերապրածներու յուշեր ձայնագրելով կամ արտասանութիւններ գրի առած ու բանաստեղծական կտորներ ընտրած էին, իրենց աշխատանքներուն ընդմէջէն սորվելով ու դաստիարակուելով պատմական յստակ տուեալներու միջոցով: Աշակերտները եւ իրենց ուսուցչուհիները, խօսելով մարդկութեան դէմ գործուած ահաւոր երկու ոճիրներուն մասին՝ նկարագրեցին հայերուն ու հրեաներուն դէմ իրագործուած բռնութիւնները, նշելով, թէ մարդկութիւնը երբեք չի կրնար մոռնալ կամ անտեսել նման չարիք, ոչ ալ կրնայ հանդուրժել մոլեռանդութեան եւ ցեղապաշտութեան ծայրայեղ երեւոյթներ:

Վարժարանի ամփիթատրոնին մէջ հաւաքուած 275 աշակերտները, ուշադրութեամբ հետեւեցան նիւթերու ներկայացման:

ՀՅԴ Հայ Դատի յանձնախումբի ներկայացուցիչ Հռիփսիմէ Յարութիւնեան եւ ՀՅԴ Երիտասարդական Միութեան ներկայացուցիչ Նանօր Էրջէնեան խօսեցան Հայոց Ցեղասպանութեան իբրեւ արդիւնք՝ հայութեան կրած տառապանքներուն մասին, նկարագրեցին պատմական դէպքերը, ինչպէս նաեւ ներկայացուցին նոր սերունդներուն կողմէ շարունակուող հայութեան պահանջատիրական պայքարի հանգրուանները: Ընկերուհիները շեշտեցին Հայոց Ցեղասպանութեան միջազգային ճանաչման անհրաժեշտութիւնը, հետեւանքներու վերացման գործընթացը եւ ժխտումին դէմ պայքարելու մեր ժողովուրդին եւ երիտասարդութեան պատրաստակամութիւնը: Հարցումներու պատասխանելով՝ անոնք անդրադարձան յունահայ գաղութի իրավիճակին, մշակութային հարցերուն, հայ եւ յոյն ժողովուրդներուն միջեւ բարեկամութեան թեմաներու:

Զրոյցին աւարտին ցուցադրուեցաւ կարճ երիզ մը՝ Սփիւռքի գաղութներուն մէջ Ապրիլեան ոգեկոչման ձեռնարկներէ ու ժողովրդային քայլարշաւներէ տեսագրուած:

Պէտք է նշել ցուցաբերուած հետաքրքրութեան բարձր մակարդակը աշակերտներուն մօտ, որոնք հաւաքի վերջաւորութեան առանձին զրոյցներով եւս շարունակեցին տեղեկութիւններ քաղել երկու ընկերուհիներէն:

Մեկնելէ առաջ, անակնկալ մը ներկայացուցին աշակերտները երկու հիւրերուն՝ զանոնք հրաւիրելով դպրոցի ռատիոկայանը, ուր հայկական բանաստեղծութեամբ եւ հայկական երգերով ճոխ բովանդակութեամբ մշակութային յայտագիր մը պատրաստած էին եւ նոյն պահուն (live) զայն սփռեցին եթերով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top