«Օքսֆորտ» Համալսարանին Մէջ՝ «Քրիստոնեայ Ներկայութիւնը Արաբական Ծոցի Տարածաշրջանին Մէջ» Նիւթով Դասախօսութիւն

0000OXFORD

0000OXFORD

Անգլիոյ «Օքսֆորտ» համալսարանի Արեւելեան ուսումնասիրութեան բաժանմունքին կազմակերպութեամբ՝ «Արեւելեան Քրիստոնէութիւնը» բնաբան-նիւթին ուսումնասիրութեան նուիրուած դասախօսական-հաւաքներու ծիրին մէջ, որ անցեալ ութ տարիներուն վրայ երկարած ծրագիր-յայտագիրներէն մին է նոյն համալսարանին, Երեքշաբթի,  25 Փետրուարին տեղի ունեցաւ «Քրիստոնեայ ներկայութիւնը Արաբական ծոցի տարածաշրջանին մէջ» նիւթով դասախօսութիւնը համալսարանին սրահին մէջ: Դասախօսն էր Արաբական Ծոցի երկիրներու Աստուածաշունչի ընկերութեան ընդհանուր քարտուղար դոկտ. Հրայր Ճէպէճեան:

Դոկտ. Հրաչ Չիլինկիրեան, որ համալսարանին Արեւելեան ուսումնասիրութեան բաժանմունքի դասախօսական կաճառի գործօն անդամներէն է՝ ներկայացուց  օրուան դասախօսը:

Դոկտ. Ճէպէճեան մօտաւորապէս մէկ ժամ տեւողութեամբ ներկայացուց նախ Արաբական ծոցի պատմական-քաղաքական եւ ընկերային-տնտեսական տուեալները, ապա՝ քրիստոնեայ եկեղեցւոյ եւ համայնքին կազմաւորումը Ք.Ե. վաղ չորրորդ դարէն սկսեալ, եւ հասնելով մինչեւ Իսլամական ներխուժումը տարածաշրջանին մէջ Ք.Ե. 629 թուականին:

Ան մատնանշեց, թէ Քրիստոնեայ եկեղեցին Իսլամական տիրապետութեան ժամանակամիջոցին, շրջանին մէջ մնացած է մինչեւ իններորդ դարը, ապա անյայտացած: Ան տուաւ անյայտացումին պատմական-գիտական տուեալները եւ ապացոյցները: Այնուհետեւ ան մատնանշեց, թէ ինչպէս քրիստոնեայ ներկայութիւնը դարձեալ մուտք գործած է տարածաշրջանին մէջ, 1497ին, երբ փորթուգալցի հետազօտողներ հասած եւ այս երկիրները:

Դոկտ. Ճէպէճեան վեր առաւ քրիստոնեայ ներկայութեան ծաւալած գործունէութիւնը անգլիական գաղութատիրութեան ժամանակաշրջանին, հասնելով մինչեւ Ամերիկացի միսիոնարները, որոնք տասնիններորդ դարէն սկսեալ մեծ նպաստ եւ ներդրում ունեցած են այս երկիրներուն ընկերային կեանքի բարելաւման, ի մասնաւորի կրթական եւ բժշկական բնագաւառներուն մէջ:

Ան ընդարձակ տեղեկութիւն տուաւ այսօրուան քրիստոնեայ եկեղեցւոյ մասին։

Դասախօսութենէն ետք գործադրուեցաւ հարցում-պատասխանի բաժինը։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top