«Ասպարէզ»ի Խմբագիրներուն Կոչը՝ Ընթերցողներուն

«Ասպարէզ»
«Ասպարէզ»

«Ասպարէզ»

Արդէն վեց շաբաթ է որ «Քորոնա» ժահրի համաճարակին օրըստօրէ սրող տագնապին պատճառով «Ասպարէզ»ը՝ տնօրէնութեան որոշումով, ամբողջովին կանգնեցուցած է իր ամէնօրեայ գրասենեակային աշխատանքները եւ անցած հեռակայ դրութեամբ գործելու ձեւին: Այս աննախընթաց իրավիճակին պատճառով, «Ասպարէզ»ը հարկադրաբար որոշեց դադրեցնել իր տպագիր օրինակին հրատարակութիւնը:

Այդուհանդերձ, անցնող վեց շաբաթներու ժամանակամիջոցին, «Ասպարէզ»ը շարունակեց ամէնօրեայ երկլեզու լրատուութեան գործը առցանց՝ «Ասպարէզ»ի կայքին եւ ելեկտրոնային նամակներու միջոցաւ: Աշխատեցանք օրը օրին եւ ժամը ժամուն մեր ընթերցողներուն ուշադրութեան յանձնել համաճարակի տագնապին վերաբերող քաղաքային, գաւառային, նահանգային եւ դաշնակցային պետական մարմիներու ցուցմունքները եւ որոշումները:

Ջանացինք օրին մեր ընթերցողներուն փոխանցել Հայաստանի, Արցախի եւ Սփիւռքի այլ գաղթօճախներու մէջ համաճարակի տագնապին զարգացումները: Անդրադարձանք Արցախի համապետական ընտրութիւններուն ընթացքին: Ներկայացուցինք տագնապալի այս օրերուն կարիքաւոր հայորդիներու օժանդակութեան համար մեր համայնքին մէջ ստեղծուած Աշխատանքային յանձնախումբի աշխատանքները: Համապարփակ լրատուութեամբ ներկայացուցինք Հայաստանի եւ աշխարհի տարածքին Ապրիլեան ոգեկոչական ձեռնարկները, ինչպէս նաեւ առցանց հարթակներու վրայ ուղղակի սփռումով փոխանցեցինք Սուրբ Զատկուան տօնին առիթով Արեւմտեան թեմի առաջնորդին մատուցած պատարագը: Այս բոլորը կարելի եղաւ իրագործել տնային ինքնամեկուսացումի դժուար պայմաններուն մէջ, շնորհիւ մեր անձնակազմին նուիրումին ու տարած տքնաջան աշխատաններուն: Միաժամանակ, չենք ուզեր մոռնալ եւ երախտապարտօրէն կը յիշենք մեր աշխատակիցները, որոնք իրենց մնայուն յօդուածագրութեամբ մեծապէս ճոխացուցին «Ասպարէզ»ի «էջերը»:

Մեզի համար մեծապէս քաջալերիչ էր նաեւ տեսնել մեր ընթերցողներուն զօրակցութիւնը «Ասպարէզ»ին, տագնապալի այս օրերուն: Քաջալերիչ էր տեսնել մեր բաժանորդներուն յանձնառութիւնը ոչ միայն օրին կատարելու բաժանորդութեան իրենց վճարումները, այլեւ՝ յաւելեալ գումարներով նուիրատուութիւն կատարելու, որպէսզի «Ասպարէզ»ը շարունակէ իր առաքելութիւնը: Անոնց բարի եւ քաջալերական գրութիւնները ու հեռաձայնի պատգամները իսկապէս գօտեպնդիչ են ամէն առումով:

Կասկած չունինք, անշուշտ, որ բոլորս դատապարտուած ենք կրելու այս համաճարակին ահաւոր հետեւանքները, առնուազն մինչեւ մօտաւոր ապագայ: Ներկայ պայմաններուն պատճառով , դժբախտաբար, կարելի չեղաւ հրատարակել Ապրիլեան մեր բացառիկը: Իսկ տարբեր հաստատութիւններու հետ մեր ծանուցումներու պայմանագիրները առկախուեցան հասկնալի պատճառներով: Ներկայի իրերու դրութենէն մեկնելով՝ այնպէս կը թուի, որ տնային ինքնամեկուսացումը պիտի շարունակուի եւս քանի մը շաբաթներ, եթէ ոչ աւելի, լուրջ դժուարութեան առջեւ դնելով 112 տարուան «Ասպարէզ» հաստատութիւնը:

Այսօր, այս առիթով կ՛ուզենք անգամ մը եւս վստահեցնել մեր ընթերցողներուն, ծանուցողներուն եւ զօրակցողներուն, որ «Ասպարէզ»ը ամէն ժամանակէ աւելի յանձնառու է շարունակելու լարտուուական իր գործը:

Այսօր, կը դիմենք ձեզի, որ ձեր զօրակցական նուիրատուութիւններով կարելի դարձնէք յաղթահարել այս դժուար պայմանները, առիթ ընծայելով 112ամեայ այս հաստատութեան՝ շարունակելու իր առաքելութիւնը: Հաճեցէք սեղմել այս կոճակը կատարելու համար ձեր մէկ անգամուան կամ ամսական նուիրատուութիւնը:

Առողջութիւն եւ ապահովութիւն կը մաղթենք բոլորիդ:

Արման Պաղտոյեան

Արա Խաչատրեան

 

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top