Քալիֆորնիոյ Մէջ՝ Պաշտամունքի Վայրերը Հանրութեան Առջեւ Մասնակիօրէն Բանալու Որոշում

0527california
0527california

Զբօսավայրերը աւելի ապահով դարձնելու հնարք մը Սան Ֆրանսիսքոյի մէջ

ՍԱՔՐԱՄԵՆԹՕ.- Քալիֆորնիոյ նահանգապետ Կեւըն Նիւսըմ Երեքշաբթի օր յայտարարեց, որ «Քորոնա» ժահրի համաճարակին տարածումը զսպելու նպատակով, առաւել քան երկու ամիս որդեգրուած ֆիզիքական հեռաւորութիւն պահպանելու օրէնքները աստիճանաբար մեղմացնելու քայլերուն ծիրին մէջ, եկեղեցիներուն, մզկիթներուն, սինակոկներուն եւ կրօնական պաշտանմունքի այլ վայրերուն պիտի արտօնուի իրենց դռները մասնակիօրէն վերաբանալ հանրութեան առջեւ։

Պաշտամունքի վայրերը այս հանգրուանին արտօնութիւն պիտի ունենան ընդունելու 100 անձեր կամ սրահին համար նախապէս արտօնուած քանակին քառորդը՝ այն, որ աւելի քիչ է։

Նահանգապետը յիշեցուց, որ դիմակներ կրելու, ապահով հեռաւորութիւն պահպանելու եւ շարք մը այլ պայմաններ ի զօրու պիտի մնան՝ դարձեալ շեշտելով, որ տեղական մարմինները այս իրաւասութիւնը կրնան փոփոխութեան ենթարկել, նկատի ունենալով տեղւոյն պայմանները։

Յիշեցնենք, որ Քալիֆորնիոյ նահանգային մարմինները որոշած են վերաբանալու արտօնութիւն տալ բոլոր այն վաճառատուներուն, որոնք շարք մը պայմաններ կը գոհացնեն։

Միւս կողմէ, Լոս Անճելըս գաւառի իշխանութիւնները 26 Մայիսի յետմիջօրէին յայտարարեցին, թէ նախորդող 24 ժամերուն ընթացքին, «Քորոնա» ժահրով վարակուած 27 քաղաքացիներ մահացած են գաւառին տարածքին եւ արձանագրուած են վարակման 1843  նոր պարագաներ։

Ցարդ Լոս Անճելըս գաւառի տարածքին արձանագրուած են  47,822 վարակումներ եւ 2143 մահեր, որոնց 93 տոկոսը առողջական այլ բարդութիւններ ունէր։ Քննութիւններուն թիւը կը հասնի 514,000ի, որոնցմէ 8 տոկոսը վարակակիր եղած է. սահմանգիծ մը, որուն կամ անկէ նուազին պահպանումը տնտեսութիւնը վերաբանալու չափանիշ սահմանուած է գաւառին իշխանութիւններուն կողմէ։

Լոս Անճելըս գաւառի հանրային առողջապահութեան ծառայութիւններուն կարելի է ծանօթանալ՝ այցելելով www.publichealth.lacounty.gov կայքը։

Քալիֆորնիոյ տարածքին վարակուածներուն թիւը կը մօտենայ 100,000ի եւ արձանագրուած են 3852 մահեր։ Միացեալ Նահանգներու մէջ այդ թիւերը յաջորդաբար՝ 1․73 միլիոն եւ 100,886 են։

Միացեալ Նահանգներէն ետք վարակուածներու մեծագոյն թիւը ունեցող Պրազիլի մէջ վարակումներու աճը կը շարունակուի եւ հասած է 394,507 ի, իսկ մահերուն թիւը՝ 24,600ի։

Աշխարհի տարածքին արձանագրուած են 5․73 միլիոն վարակումներ եւ 353,896 մահեր։ Ապաքինած են մօտաւորապէս 2․5 միլիոն վարակուածներ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top