Ազգային Վարժարաններու Խնամակալ Մարմինին Քարոզարշաւը Եւ Կրթանպաստի Ֆոնտի Հաստատումը

0605Board of Regents

0605Board of Regents (1)Աւելի քան կէս դարէ վեր, Արեւմտեան Ամերիկայի մէջ Ազգային վարժարանները կը գոյատեւեն անխափան ընթացքով: Ազգային վարժարանները յարատեւ վերելք արձանագրելով՝ կերտած են հայ սերունդներ, որոնք իրենց ազգային դիմագիծով, ոգիով, կրթութեամբ եւ գիտակցութեամբ անբողջական հայեր եւ պարկեշտ ամերիկացի քաղաքացիներ են:

Խնամակալ մարմինը աչալրջութեամբ եւ բծախնդութեամբ կը հետեւի առաւել քան 3050 հայ աշակերտներու կրթութեան ու մանաւանդ հայեցի դաստիարակութեան: Ամէն ճիգ ի գործ կը դնէ աշակերտութինը եւ վարժարանները գերազանցօրէն ծաղկեցնելու համար: Մեր առաքելութիւնն է՝ կերտել հայ մարդը, որ թէեւ կ՛ապրի հայրենիքէն հեռու, սակայն կ՛ապրի ընձիւղուած՝ «հոգեւոր հայրենիք» ըմբռնումին հետ եւ տոգորուած ազգային ինքնութեան համեստ եւ արդար հպարտութեամբ:

Մեր վարժարանները ազգային դիմագիծով կերտուած ազնիւ փաղանգներ տրամադրած են մեր ազգին, միշտ կը մնան պատնէշի վրայ՝ ծառայելով ազգին, հայրենիքին եւ գաղութին:

Այսօր, համաճարակին պատճառած ծանր պայմաններուն մէջ անգամ մեր վարժարանները կը շարունակեն իրենց կրթական, դաստիարակչական եւ ազգային առաքելութիւնը: Հարկ կը համարենք մեր վարժարաններուն տարիներու արգասաբեր ընթացքին, յաղթական աւանդին եւ անոնց շնորհալի հունձքերուն մասին խօսիլ ու զանոնք ներկայացնել արժանավայել կերպով: Այս իմաստով՝ կը ներկայացենք տեսաժապաւէններու շարք մը՝ հաւատալով, որ Ազգային վարժարաններու ձեռքբերումները եւ մարտահրաւէրները գաղութին սեփականութիւնը պէտք է դարձնել: Յոյս ունինք, որ մեր գաղութը այս օրերուն առաւել եւս նեցուկ պիտի կանգնի մեր վարժարաններուն: Այսօր զօրակոչի կ՛ենթարկենք մեր բարոյական եւ նիւթական բոլոր հնարաւորութիւնները՝ պահպանելու համար Հայ Սփիւռքին ողնայարը համարուող Ազգային վարժարանը եւ Հայ Ազգի ապագան՝ հայ աշակերտը:

Տնտեսական ճգնաժամը մեղմացնելու համար հիմնուած Աշակերտական Կրթանպաստ Ֆոնտը, պիտի ծառայէ Ազգային վարժարաններու աշակերտութեան կարիքներուն: Հայ ընտանիքները անմասն չմնացին համաճարակին անախորժ ազդեցութիւններէն: Հետեւաբար, նպատակայարմար էր այս օրերուն ստեղծել այնպիսի դրութիւն մը, որուն նպաստով օժանդակած պիտի ըլլանք մեր աշակերտներուն, որոնց ընտանիքները անմիջականօրէն կրած են եւ պիտի կրեն համաճարակին հետեւանքները: Հայ աշակերտին արդար իրաւունքն է բարձր մակարդակով ուսում եւ կրթութիւն ստանալը, տիրող պայմաններուն թելադրանքէն անկախ: Վստահ եղէք, որ ձեր նուիրատուութիւնները անմիջականօրէն պիտի նպաստեն մեր աշակերտներուն կրթական կարիքներուն:

Յարգելի հայրենակիցներ, Ազգային վարժարանները կանգուն են մեր բոլորին միացեալ եւ գիտակից կեցուածքներով: Վեց տասնամեակներու մեր փորձը ամրակուռ խարիսխ մըն է, Ազգային վարժարանի անգնահատելի առաքելութեան շարունակութեան համար: Նեցուկ կանգնինք մեր աշակերտներուն, ապահովելու համար անոնց բարձր կրթութիւնը եւ հայեցի դաստիարակութիւնը:

Այցելեցէք մեր կայքը՝ www.prelacyschools.org, եւ կատարեցէք ձեր առատաձեռն նուիրատուութիւնը:

 

ԱԶԳԱՅԻՆ ՎԱՐԺԱՐԱՆՆԵՐՈՒ ԽՆԱՄԱԿԱԼ ՄԱՐՄԻՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top