Ցաւալի Այս Դէպքին Էջը Փակեցինք․ Լիբանանի Մօտ Միացեալ Նահանգներու Դեսպան

0630leb

0630leb

ՊԷՅՐՈՒԹ, «Ազդակ»․- Լիբանանի արտաքին գործոց նախարար Նասիֆ Հըթթի երէկ նախարարութեան կեդրոնին մէջ ընդունեց Լիբանանի մօտ Միացեալ Նահանգներու դեսպան Տորըթի Շիան, որուն հետ քննարկեց անոր դէմ Սուրի մէջ հրատապ հարցերու դատաւոր Մոհամետ Մազեհի կողմէ արձակուած դատական վճիռը։

Հանդիպումին ընթացքին Հըթթի ընդգծեց, որ խօսքի եւ մամլոյ ազատութիւնը սուրբ իրաւունք է: Ան դեսպանին հետ քննարկեց լիբանանեան իրադարձութիւնները, երկկողմանի յարաբերութիւնները` ընդգծելով Լիբանանի եւ Միացեալ Նահանգներու կառավարութիւններուն միջեւ բոլոր մարզերուն պարագային գործակցութիւնը ամրապնդելու անհրաժեշտութիւնը` Լիբանանը իր դիմագրաւած տագնապէն դուրս բերել կարենալու համար:

Հանդիպումէն ետք Շիա յայտնեց, որ արտաքին գործոց նախարարին հետ հանդիպումը դրական էր` նշելով, որ այդ հանդիպումին ընդգծուեցաւ Լիբանան-Ամերիկա երկկողմանի յարաբերութիւններուն կարեւորութիւնը թէ՛ Լիբանանի եւ թէ Միացեալ Նահանգներու համար:

«Հիմնական հարցը, զոր քննարկեցինք իմ դէմ արձակուած դատական վճիռն էր: Ցաւալի այս դէպքին էջը փակեցինք, որպէսզի բոլորս կեդրոնանանք իսկական տագնապին` Լիբանանի տնտեսական տագնապին լուծման վրայ», ըսաւ Շիա:

Ան հաստատեց, որ Միացեալ Նահանգները պիտի շարունակէ օժանդակել Լիբանանին, այնքան ատեն որ կառավարութիւնը տագնապին դրդապատճառները լուծելու քայլերու կը դիմէ:

Նշենք, որ դատաւորը դեսպանին հետ հարցազրոյց կատարելը եւ անոր յայտարարութիւնները սփռելը արգիլող դատական վճիռ արձակած էր, հակադարձելով «Հըզպալլա»ի դէմ անոր կարարած պնդումներուն։

Աւելի կանուխ, տեղեկատուութեան նախարարութիւնը դիտել տուած էր, որ օրէնքով դատաւորը իրաւունք չունի տալու այնպիսի որոշում, որովհետեւ ասիկա լրագրութեան ազատութեան ոտնակոխում է։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top