Կառավարութիւնը Լիբանանէն Ժամանողները Ընդունելու Համար Ծրար Կը Պատրաստէ

0814Zareh

0814Zareh

ԵՐԵՒԱՆ․- Հայաստանի կառավարութիւնը կը պատրաստէ ծրար մը, որ կարենայ ըստ արժանուոյն ընդունիլ Լիբանանէն Հայաստան եկողները, այսօր տեղի ունեցած մամլոյ ասուլիսի մը ընթացքին յայտնեց Հայաստանի Սփիւռքի գործերու գլխաւոր յանձնակատար Զարեհ Սինանեան:

«Մենք պէտք է կարենանք ըստ արժանուոյն ընդունիլ անոնք, որոնք կը փափաքին գալ Հայաստան, ապրիլ այստեղ, դառնալ հասարակութեան լիիրաւ անդամներ, քաղաքացիներ, հարկ վճարողներ, զինուորներ, եւ փորձենք միասին կերտել մեր երազած հայրենիքը», ըսաւ Սինանեան:

Պատասխանելով այն հարցումին, թէ Հայաստան լիբանանահայերու նկատմամբ հայրենադարձութեան քաղաքականութիւն կ՛իրականացնէ՞, Սինանեան պատասխանեց՝ ըսելով,  որ հայրենադարձութեան քաղաքականութեան պարագային պետութիւնը թելադրողի դեր ունի: Այսինքն՝ կը ստեղծէ այն իրավիճակը, որուն իբրեւ արդիւնք մարդիկ կ՛ուզեն վերադառնալ հայրենիք: «Այս պարագային, իրականութեան մէջ մենք դիտորդի դերի մէջ ենք: Ժամանակի ընթացքին մեր կամքէն անկախ ստեղծուած են հանգամանքներ, որոնք յանգեցուցած են այս իրավիճակին: Լիբանանի տնտեսական ճգնաժամը, դրամատնային համակարգի կաթուածահար վիճակը: Այնտեղ կայ զանազան երկիրներու շահերու բախում: Մարդոց մօտ լուրջ վախ կայ, որ կրնան ունենալ Սուրիոյ քաղաքացիական պատերազմը յիշեցնող երեւոյթներ: Աւելցնենք «Քորոնա» ժահրով պայմանաւորուած հարցերը: Պայթումն ալ վերջին հարուածն էր: Առ այս, ունինք այն, ինչը ունինք», ըսաւ ան։

Յանձնակատարը նկատել տուաւ, որ Լիբանանէն դուրս գալու տրամադրութիւնները կային տակաւին 2019էն սկսեալ, եւ ան ներկայացուց այդ թուականին տեղի ունեցած հարցախոյցին տուեալները: 521 մասնակցողներուն 58 տոկոսը նշած էր, որ մօտիկ ապագային պիտի լքէ Լիբանանը: Անոնց զգալի մէկ հատուածը ըսած էր, որ կը մտածէ Հայաստան գալու մասին:

«Մենք՝ իբրեւ պետութիւն պատասխանատւութիւն կը կրենք մեր քաղաքացիներուն նկատմամբ: Դեսպանութեան տուեալներուն համաձայն՝ Լիբանանի մէջ 25 հազար Հայաստանի քաղաքացիներ կան. մենք պատասխանատւութիւն ունինք մեր հայրենակիցներուն նկատմամբ», աւելցուց Սինանեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top