Գերագոյն Հոգեւոր Խորհուրդի Ժողովը Դատապարտեց Ատրպէյճանի Սանձնազերծած Պատերազմական Գործողութիւնները

0815Hokevor

0815Hokevor

ԷՋՄԻԱԾԻՆ, «Արմէնփրէս».- Մայր Աթոռ Սուրբ Էջմիածինի մէջ, նախագահութեամբ Գարեգին Բ. Ամենայն հայոց կաթողիկոսին, 11-13 Օգոստոսին տեղի ունեցաւ Գերագոյն հոգեւոր խորհուրդի ժողով:

Ժողովի օրակարգային հարցերու քննարկումէն առաջ ժողովականները իրենց աղօթքը բարձրացուցին Լիբանանի մէջ պայթումին իբրեւ հետեւանք զոհուած անձերուն, որոնց կարգին հայորդիներուն համար` վշտակցութիւն յայտնելով անոնց հարազատներուն, զօրակցութիւն` Լիբանանի ժողովուրդին: Այս գծով յայտնուեցաւ, որ Ամենայն Հայոց կաթողիկոսը մնայուն կապի մէջ եղած է Մեծի Տանն Կիլիկիոյ Արամ Ա. կաթողիկոսի հետ` տեղեկանալու տիրող իրավիճակին եւ հայ համայնքին կարիքներուն մասին: Առ ի զօրակցութիւն տեղւոյն հայ համայնքին՝ Մայր Աթոռ Սուրբ Էջմիածինին կողմէ Մեծի Տանն Կիլիկիոյ կաթողիկոսութեան փոխանցուած է 100,000 տոլարի գումար:

Ժողովի օրակարգին վրայ ընդգրկուած էին եկեղեցւոյ թեմական, կրթական, ընկերային եւ եկեղեցաշինական ծրագիրներուն վերաբերող հարցեր, հայրենական-ազգային կեանքի զանազան խնդիրներ:

Գերագոյն հոգեւոր խորհուրդը նախ անդրադարձ կատարեց Յուլիսին Տաւուշի մարզին մէջ` հայ-ատրպէյճանական սահմանին ծաւալած ռազմական գործողութիւններուն, անոնց  իբրեւ հետեւանք սահմանամերձ բնակավայրերուն հասած վնասներուն, ինչպէս նաեւ այս գծով տարբեր երկիրներու մէջ հայ եւ ատրպէյճանական համայնքներուն միջեւ տեղի ունեցած բախումներուն:

Ժողովը դատապարտեց Ատրպէյճանի զինուած ուժերուն կողմէ Հայաստանի Հանրապետութեան հանդէպ սանձնազերծուած սադրիչ պատերազմական գործողութիւնները` կարեւոր նկատելով այս առնչութեամբ միջազգային հանրութեան գնահատականները եւ ԵԱՀԿ Մինսկի խումբի համանախագահող երկիրներու ջանքերը:

Ամենայն հայոց կաթողիկոսը իր գնահատանքը փոխանցեց թեմակալ առաջնորդին եւ թեմի հոգեւորականաց դասին` ջանադիր ծառայութեամբ հայոց բանակին եւ սահմանամերձ համայնքներուն ազգաբնակչութեան զօրավիգ եւ նեցուկ ըլլալուն համար:

Մասնաւոր քննութեան առարկայ դարձան Վիրահայոց թեմի Ջաւախքի շրջանին մէջ հայ համայնքին մէջ վերջին օրերուն տեղ գտած անցանկալի զարգացումները: ԳՀԽ անդամները ցաւ յայտնեցին կատարուածին առնչութեամբ` կոչ ուղղելով ջաւախահայութեան պահպանելու միասնութեան ոգին: Ընդգծուեցաւ Ջաւախքի փոխառաջնորդութեան հոգեւոր դասի հետեւողական ջանքերուն անհրաժեշտութիւնը` ի խնդիր համայնքին մէջ համերաշխութեան եւ խաղաղութեան վերականգնման:

Գերագոյն հոգեւոր խորհուրդը անդրադարձ կատարեց նաեւ կրթութեան, գիտութեան եւ մարմնակրթութեան նախարարութեան կողմէ հրապարակուած Հանրակրթութեան պետական չափորոշիչի եւ Հանրակրթական պետական առարկայական չափորոշիչներու նախագիծերու շուրջ արտայայտուած հանրային բազմաբնոյթ մտահոգութիւններուն:

Գերագոյն հոգեւոր խորհուրդը՝ իր համամտութիւնը յայտնելով չափորոշիչներու նախագիծերուն վերաբերեալ Մայր Աթոռի կրթական հարցերով ենթախումբի արտայայտած դիրքորոշումներուն՝ մտահոգութիւն արտայայտեց ԿԳՄՍ նախարարութեան լիազօր մարմիններու հետ գործակցութեան եւ կառուցողական երկխօսութեան բացակայութեան առնչութեամբ: Խորհուրդի անդամները արձանագրեցին, որ յիշեալ գործընթացի վերջնարդիւնքի պատասխանատուութիւնը սոսկ պետական մարմիններունը չէ, նաեւ բոլոր համազգային կառոյցներու ու հաստատութիւններուն է, քանի որ կրթական բարեփոխումները պէտք է միտուած ըլլան ազգային ինքնութեամբ, հոգեւոր-ազգային արժեհամակարգը կրող քաղաքացիի կերտման:

Գերագոյն հոգեւոր խորհուրդը նաեւ զեկոյց լսեց Մայր Տաճարի նորոգութեան ընթացքին վերաբերեալ:

«Քորոնա» ժահրին դէմ պայքարի ծիրին մէջ զեկուցուեցաւ, որ համավարակի հետեւանքներու յաղթահարման ի նպաստ առ այսօր Մայր Աթոռի կողմէ նախաձեռնուած ընկերային աջակցութեան, առողջապահական եւ կրթական ծրագիրներու արժէքային համագումարը կազմած է 494,183,292 հայաստանեան դրամ: Հայաստանի եւ Արցախի մէջ պարէնային սնունդի բաշխման ծրագիրի ծիրին մէջ աջակցութիւն ցուցաբերուեցաւ 69,724 անձի:

Ժողովը ամփոփուեցաւ Գարեգին Բ. Ամենայն Հայոց կաթողիկոսին օրհնութեան խօսքով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top