«Ես Հաւատում Եմ, Որ Այս Օրերը Լինելու Են Բեկումնային». Արայիկ Յարութիւնեան՝ Շուշիէն

1030Arayig

1030Arayig

ՇՈՒՇԻ, «Արմէնփրէս».- Արցախի Հանրապետութեան նախագահ Արայիկ Յարութիւնեան Արցախի Շուշի քաղաքէն հանդէս եկաւ տեսաուղերձով, որուն մէջ ան շեշտեց, որ յառաջիկայ օրերուն պէտք է բեկում մտցնել ճակատին վրայ: Ան ընդգծեց, որ կը հաւատայ հայ ժողովուրդի յաղթանակին ու կոչ ուղղեց միաւորուելու, կռուելու ու պատժելու թշնամին։

«Սիրելի՛ հայրենակիցներ, քոյրեր եւ եղբայրներ՝ Արցախում, Հայաստանի Հանրապետութիւնում եւ Սփիւռքում ապրող իմ լաւ բարեկամներ: Ինչպէս 1992 թուականին, երբ սկսուեց մեր յաղթարշաւը Շուշիի ազատագրումից, այսօր էլ մեր յաղթարշաւը պայմանաւորուած է Շուշիի պաշտպանութիւնից: Թշնամին գտնւում է այստեղից ընդամէնը մի քանի կիլոմեթր հեռաւորութեան վրայ, առաւելագոյնը՝ 5: Եւ թշնամու գերնպատակն է գրաւել Շուշին, տիրանալ Շուշիին: Ինչպէս ասում են՝ ով տիրում է Շուշիին, տիրում է Արցախին: Եւ ուզում եմ, որ գիտակցենք այս պահը, գիտակցենք, եւ ոչ միայն լոկ խօսքերով, այլ անմիջական մասնակցենք Շուշիի պաշտպանութեանը: Իմ կեանքում առաջին անգամ ես եղել եմ Շուշիում 1992 թուականի Մայիսի 8ին եւ առաջիններից եմ եղել, որ մտել եմ Ղազանչեցոց եկեղեցի, համբուրել եմ խաչը: Այսօր համբուրել եմ խաչը, աղօթել եմ, մոմ եմ վառել յանուն մեր յաղթանակի: Իրականում ես հաւատում եմ, որ մենք յաղթելու ենք, իրականում ես հաւատում եմ, որ այս օրերը լինելու են բեկումնային: Դրա համար մեզ պէտք է միաւորուել, դրա համար պէտք է կռուել, դրա համար պէտք է պատժել թշնամուն: Բայց դրա համար պէտք է նաեւ ժամ առաջ հասնել Արցախ: Իհարկէ, սա խուճապային ելոյթ չէ, հակառակը: Նորից կրկնում եմ՝ հաւատում եմ մեր յաղթանակին: Եւ օրերի ընթացքում պէտք է բեկում մտցնենք ճակատում եւ պէտք է պատժենք հակառակորդին հէնց Շուշիի դարպասներում: Եկէք միաւորուենք եւ միասին կռուենք: Իհարկէ, հասկանում ենք, գիտակցում ենք ամէն ինչ, բայց եկէք նաեւ մեր ամենամեծ առաքելութիւնը կատարենք, յանուն հայրենիքի, յանուն մեր ապագայի, յանուն մեր սերունդների: Յաղթանակը մերն է լինելու, համոզուած եղէք, ես հաւատում եմ մեր յաղթանակին», ըսաւ Արային Յարութիւնեան:

Untitled

Արայիկ Յարութիւնեան տեսաուղերձին կից նաեւ կատարծ է հետեւեալ գրառումը. «Այսօր՝ այս վճռորոշ պատմական պահին, երբ թուրք-ադրբեջանական ու ահաբեկչական հրոսակախմբերը իրենց ողջ ռազմական ռեսուրսներով յարձակուել են Արցախ աշխարհի վրայ՝ նպատակ ունենալով հազարամեակներով իր բնօրրանում ապրող արցախահայութեանը բնաջնջելու կամ վտարելու սեփական հայրենիքից, մենք կենաց-մահու կռիւ ենք տալիս՝ բոլոր առումներով անհաւասար պայմաններում: Այժմ նրանք սպառնում են մեր հայրենիքին ու գոյութեանը ոչ միայն ողջ առաջնագծի երկայնքով, այլ նաեւ լրջագոյն ռազմական ռեսուրս են ներդրել Շուշիի ուղղութեամբ՝ նպատակ ունենալով ամէն գնով տիրել հայոց հպարտ բերդաքաղաքին: Շուշին լոկ քաղաք չէ, այն հայ ժողովրդի սեփական բնօրրանում ապրելու վճռականութեան խորհրդանիշն է, հայ ժողովրդի յաղթանակների խորհրդանիշը: Շուշին համայն հայութեան բաբախող սիրտն է: Որպէս Արցախի գերագոյն գլխաւոր հրամանատար՝ եւս մէկ անգամ կոչ եմ անում՝ միացէ՛ք, միասին պաշտպանենք մեր Շուշին, մեր Արցախը, մեր ազգային արժանապատուութիւնը»։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top