Լոս Անճելըսի Իրաքահայերու Միութեան Շաբաթօրեայի 42րդ Կրթաշրջանը

1124Janoyan1

1124Janoyan1

Ամերիկայի շատ մը նահանգներու նման, Քալիֆորնիոյ մէջ եւս կրթական կեանքը մեծ դժուարութիւններով կ՛ընթանայ։ Շուրջ ինն ամիսներէ ի վեր, բազմաթիւ ընտանիքներ, ուսուցչուհիներ եւ տնօրէններ մարտահրաւէրներու դէմ յանդիման կը գտնուին։ Դասաւանդութիւնները առցանց տեղի կ՛ունենան։ Աշակերտները ստիպուած են տուն մնալ եւ տունէն դասերուն հետեւիլ, որովհետեւ դպրոցները փակ են, պսակաձեւ ժահրին պատճառաւ։

Լոս Անճելըսի մէջ գործող Իրաքահայերու Հայ Ընտանեկան Շաբաթօրեայ վարժարանը եւս այսպիսի դժուարութեան դիմաց կը գտնուի։ Մարտ ամիսէն ի վեր, դպրոցին շէնքը փակուած ըլլալով, դպրոցին ժրաջան տնօրէնութիւնը եւ ուսուցչական կազմը անմիջապէս գործի անցան եւ պատրաստեցին առցանց դասաւանութեան անհրաժեշտ քայլերը։

Յիշենք, թէ Լոս Անճելըսի մէջ գործող Իրաքահայերու միութիւնը 42 տարիէ ի վեր կը պահէ այս վարժարանը, ուր  4-14 տարեկան փոքրիկներ, ամէն Շաբաթ օր, օրական երկու ժամը հայերէն լեզու, ասմունք, երգ եւ հայոց պատմութիւն կը սորվին։ Դպրոցը իր գոյութեան առաջին օրէն մինչեւ այսօր, անվճառ է։ Աշակերտները միայն արձանագրութեան գումար մը կու տան, եւ ամբողջ տարին առանց թոշակ վճարելու այս դպրոցը կը յաճախեն։

Ամենայն հպարտութեամբ կու գանք ըսելու, թէ դպրոցին մէջ կամաւորաբար կը ծառայեն Հայաստանի, Լիբանանի եւ Սուրիայի լաւագոյն կրթական հաստատութեանց  շրջանաւարտներէն՝ խումբ մը երիտասարդներ, գլխաւորութեամբ համակ նուիրում եւ Ամերիկեան համալսարանէն M.A. վկայականով շրջանաւարտ Անահիտ Թովմասեան-Խաչատուրեան։ 42 տարիներու ընթացքին այս դպրոցը յաճախած են 1700է աւելի հայորդիներ, որոնց սիրտը, հոգին եւ միտքը լեցուած է հայրենասիրութեամբ, ազգասիրութեամբ եւ հայու հաւատքով։

1124Janoyan2Շաբաթ, Սեպտեմբեր 12ին, մեր դպրոցի 42 կրթաշրջանը սկսաւ, իսկ Հոկտեմբեր 17ին տեղի ունեցաւ վարժարանի կրթաշրջանը սկսման եւ Մշակոյթ օրուան պաշտօնական տօնակատարութիւնը։

Այդ օր, դպրոցի աշակերտութիւնը իրենց թանկագին ուսուցչուհիներուն ղեկավարութեամբ տասնեակ մը արտասանութիւններ, խօսքեր եւ երգեր երգելով ոգեկոչեցին հայ գիրերու եռանուն ստեղծիչներուն Ս. Մեսրոպ Մաշտոցի, Ս. Սահակ Կաթողիկոսի եւ Վռամշապուհ արքայի անունները։

Իսկ Ս. Զատկուայ առիթով դարձեալ տեղի ունեցաւ առցանց տօնակատարութիւն մը, որ պզտիկներուն բացատրուեցաւ Ս. Յարութեան տօնին նշանակութիւնը եւ հաւկթախաղի աւանդական տօնակատարութիւնը։ Այս բոլոր միջոցառումներուն տնօրէնութեան եւ ուսուցչական կազմին կողքին ներկայ եղած են Իրաքահայերու միութեան այս վարժարանի հիմնադիր՝ Խաչիկ Ճանոյեան եւ միութեան Կեդրոնական վարչութեան ժրաջան ատենապետուհի տոքթ. Մարալ Անճարօղլեան։

Ջերմօրէն կը շնորհաւորենք այս վարժարանի բոլոր պատասխանատուները, ազգանուէր այս գործին համար։ Տնօրէնուհի Անահիտ Թովմասեան-Խաչատուրեանին այս անձնուրաց ծառայութեան եւ նուիրումին համար։

Փառք ու պատիւ մեր դպրոցի բոլոր ծնողներուն, որոնք այս դժուարին պայմաններուն տակ, ուրախութեամբ յանձն կ՚առնեն ամէն Շաբաթ այս զոհողութիւնը կրկին իրենց զաւակները նման հայրենասիրական եւ ազգային դպրոց կը բերեն։ Մեր ծնողները իրապէս արժանի են Մեսրոպ Մաշտոցի եւ ոսկէ դարու բոլոր թարգմանիչներուն օրհնութեանց եւ գնահատանքին։

 

(Թղթակցութիւնը՝ վարժարանէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top