Աշխատանքային Քննարկում Շաբաթնօրեայ Վարժարանների

0119dio

0119dioՅունուարի 9ին եւ Յունուարի 16ին, Արեւմտեան թեմի առաջնորդ Յովնան արք. Տէրտէրեանի ատենապետութեամբ տեղի ունեցան թեմի շաբաթնօրեայ վարժարանների հոգեւոր հովիւների, տնօրէնների եւ ուսուցիչների վարժարանների տեղեկատուական քննարկումներ՝ նպատակ ունենալով ամփոփել նախորդ ուսումնական բարդ կիսամեակը եւ ուրուագծելու յառաջիկայ անելիքները։

Առաջնորդն իր խօսքում նշեց, որ 2020ի Մարտ ամսից շաբաթնօրեայ մէկօրեայ դպրոցների դասերը դարձան առցանց, եւ հաւանաբար մինչեւ յառաջիկայ Մայիս-Յունիս մեծ փոփոխութիւնների ակնկալիք չկայ։ Ծանր է անշուշտ նման պայմաններում կանոնաւոր դասընթաց ունենալ, սակայն այլ ճանապարհ չկայ՝ ըստ հնարաւորին պիտի շարունակել դասերը, քանզի «եթէ դպրոցների եւ աշակերտների հետ կապ չլինի, մէկ տարուայ բացը ու վնասը ազդելու է գալիք 10 տարուայ վրայ», եզրակացրեց սրբազանը։ Նա նաեւ շնորհակալութիւն յայտնեց տնօրէններին, ուսուցիչներին՝ ներկայ կացութեան մէջ աշխատանքը շարունակելու համար՝ նշելով, որ «դպրոցը հայ եկեղեցու կողքին հաւասար առաքելութիւն է»։

Քննարկումներին ներկայ տնօրէններն ու ուսուցիչները խօսեցին իրենց փորձառութեան եւ դասերն աւելի արդիւնաւէտ դարձնելու մասին։ Դպրոցների մեծ մասը դասերը շարունակում են առցանց, եւ դրա պատճառով գրեթէ ամէնուր պակասել է աշակերտների թիւը։ Կան որոշ բացառութիւններ, ուր հնարաւոր է եղել ապահովել աշակերտների բացօթեայ ներկայութիւն, բնականաբար պահպանելով բոլոր կանոնները։

Սրբազանը յանձնարարեց ի մասնաւորի նախապատրաստուել գալիք Զատկական տօներին միասնաբար առցանց միջոցառում կազմակերպելուն։ Պէտք է շարունակուի նաեւ «Նամակ զինուորին» ծրագիրը, եւ Արցախեան ազատամարտի մասնակիցներին հասցէագրուած աշակերտների նամակները պիտի տեղադրուեն զինուորին ուղարկուելիք նուէրի մէջ, որպէս «Սփիւռքից եկած աղօթք»։ Առ ի տեղեկութիւն ներկաներին՝ առաջնորդ սրբազանը ներկայացրեց նաեւ Արեւմտեան թեմի այն ծրագրերի մասին, որոնք միտուած են աջակցելու Արցախից տեղահանուածներին եւ առհասարակ Արցախին։

 

(Քաղուած առաջնորդարանի թղթակցութենէն)

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top