Փաշինեան Եւ Էնթընի Պլինքըն Քննարկեցին Ղարաբաղի Տագնապը

0306Antonie

0306Antonie

ԵՐԵՒԱՆ, «Արմէնփրէս».- Հայաստանի վարչապետ Նիկոլ Փաշինեան հեռաձայնային զրոյց մը ունեցաւ Միացեալ Նահանգներու արտաքին գործոց նախարար Էնթընի Պլինքընի հետ:

Խօսելով երկկողմանի յարաբերութիւններուն մասին` վարչապետ Փաշինեան բարձր գնահատեց Միացեալ Նահանգներու կողմէ Հայաստանին տրամադրուող մնայուն աջակցութիւնը եւ ԵԱՀԿի Մինսքի խումբին մէջ Միացեալ Նահանգներուն ունեցած դերակատարութիւնը: Կողմերը անդրադարձան պատերազմէն ետք տարածաշրջանին մէջ տիրող իրավիճակին:

Ընդգծուեցաւ ԵԱՀԿի Մինսքի խումբի համանախագահութեան ծիրին մէջ խաղաղ գործընթացի վերսկսման անհրաժեշտութիւնը: Միացեալ Նահանգներու արտաքին գործոց նախարարին ուշադրութիւնը յատկապէս հրաւիրուեցաւ Ատրպէյճանի կողմէ գերիներու, պատանդներու եւ պահուող այլ անձերու անյապաղ վերադարձի անհրաժեշտութեան վրայ:

Այդ պարունակին մէջ, ամերիկեան կողմը շեշտեց Մինսքի խումբի համանախագահութեան գործունէութեան կարեւորութիւնը եւ պատրաստակամութիւն յայտնեց՝ շարունակելու իր դերակատարութիւնը հակամարտութեան կարգաւորման ուղղութեամբ:

Պլինքըն ընդգծեց Հայաստանի հետ գործընկերային յարաբերութիւններու զարգացման կարեւորութիւնը: Ան բարձր գնահատեց ժողովրդավարութեան առումով Հայաստանի արձանագրած ձեռքբերումները եւ վստահեցուց, որ Միացեալ Նահանգները պիտի շարունակէ  բարեփոխումներու համար Հայաստանին տրամադրուող օժանդակութիւնը:

Երկուստեք կարեւոր նկատեցին համագործակցութիւնը Հայաստանի մէջ օրէնքի գերակայութեան ամրապնդման, փտածութեան դէմ պայքարի, արդարադատութեան համակարգի եւ ոստիկանութեան բարեփոխումներու ուղղութեամբ:

Փաշինեան շնորհակալութիւն յայտնեց ամերիկեան կողմի գնահատականներուն եւ բարեփոխումներու մարզին մէջ օժանդակութիւն տրամադրելու պատրաստակամութեան համար:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top