Պատմութեան Թանգարանին Յանձնուեցան Զօրավար Անդրանիկի Սուրը Եւ Շքանշանները


ԵՐԵՒԱՆ, «Արմէնփրէս».- Զօրավար Անդրանիկի սուրը եւ շքանշանները Նոյեմբեր 29ին յանձնուեցան Հայաստանի պատմութեան թանգարանին: Անոնք գնուած էին պաշտպանութեան նախարար Սերժ Սարգսեանի նախաձեռնութեամբ՝ պետական միջոցներով՝ պաշտպանութեան նախարարութեան գումարներով:

«Ինձ էր դիմել Ֆրանսայի՝ ազգութեամբ հայ քաղաքացի, ասելով, որ մի բրիտանացի ցանկանում է վաճառել Անդրանիկի թուրը եւ մարտական պարգեւները: Բնականաբար, ես անտարբեր չէի կարող լինել: ՀՀ նախագահի հաւանութիւնը ստանալուց յետոյ, ինչպէս տեսնում էք, այդ մասունքները Հայաստանում են», պարգեւները յանձնելէ յետոյ լրագրողներուն ըսաւ պաշտպանութեան նախարարը եւ աւելցուց, որ Անդրանիկը արժանի է, որ իր մասունքները պետութեան կողմէ Հայաստան բերուին. «Ես կարծում եմ, որ մեր մեծերի մասունքները պիտի հանգրուանեն Հայաստանում: Ի վերջոյ, մենք պէտք է մի տեղ հաւաքենք մեր սրբագոյն իրերը», ըսաւ ան:

Նշենք, որ ձեռք բերուած են զօրավար Անդրանիկի բոլոր վեց մարտական պարգեւները՝ Պատերազմական խաչի 2րդ աստիճանի շքանշանը, (պարգեւատրուած է յունական բանակի հրամանատարութեան կողմէ 1920 թուականին), Ս. Ստանիսլաւի 2րդ աստիճանի շքանշանը (1915ին Վանայ լիճի հարաւային ափին տեղի ունեցած մարտի համար), Ս. Գրիգոր Լուսաւորիչի առաջին աստիճանի շքանշանը (պարգեւատրուած է Գէորգ Ե. կաթողիկոսի կոնդակով՝ հայրենիքին մատուցած ծառայութիւններուն, նաեւ Մանչեսթըրի մէջ եւ այլուր հայ գաղթականներուն համար հանգանականութիւն կազմակերպելու համար), Ս. Վլատիմիրի 4րդ աստիճանի շքանշանը (Պիթլիս քաղաքի համար թրքական ուժերուն դէմ մղած պայքարին ցուցաբերած քաջութեան համար), Գէորգիեւեան 2րդ աստիճանի խաչը (1915ին Վանի եւ շրջակայ գիւղերու պաշտպանութեան համար), Պատուոյ լեգէոնի ասպետի շքանշանը (պարգեւատրուած է 1919ին Ֆրանսայի կողմէ՝ ազատութեան գործին մատուցած ծառայութիւններուն եւ քաջութեան համար):

Թանգարանին մէջ կը ցուցադրուին նաեւ Անդրանիկի այլ անձնական իրերը, նամակները եւ լուսանկարներու հաւաքածոն:

Leave a Reply