Այդքա՞ն Միայն

ԵԽԽՎի փաստահաւաք առաքելութեան հարաւային Կովկաս ու յատկապէս Նախիջեւան այցելութեան յետաձգումը մեզի պարզապէս զարմանք կը պատճառէ: Փաստահաւաք առաքելութիւն՝ ստուգելու, թէ առհասարակ ի՞նչ կացութեան մէջ են պատմա-մշակութային յուշարձանները հարաւային Կովկասի երկիրներուն մէջ եւ յատկապէս՝ Նախիջեւանի հայկական յուշակոթողները:

Աշխարհին ծանօթ է (բայց կ’երեւի՝ ոչ եւրոպական պաշտօնական կառոյցներուն) Նախիջեւանի հայկական խաչքարերու ջարդը, որ տեղի ունեցաւ օր ցերեկով, օրին նաեւ՝ լուսանկարուած եւ նկարահանուած՝ իրանեան սահմանէն:

Բայց մեզի կրկնակի զարմանք կը պատճառէ Հայաստանի պատասխանը՝ ի լուր եւրոպական պաշտօնական պատուիրակութեան այցելութեան յետաձգումին: «Կը ցաւինք»:

ՀՀ արտաքին գործոց նախարարութեան բանբեր Վլատիմիր Կարապետեան իր յայտարարութեան մէջ «կը ցաւի», որ ատրպեճանական կողմի տարած հետեւողականօրէն ապակառուցողական ճիգերուն հետեւանքով, այս այցելութիւնը տեղի պիտի չունենայ: Կարապետեանի յայտարարութիւնը կարդալէ ետք ունեցանք նոյնիսկ այն տպաւորութիւնը, որ կարծէք հայկական պաշտօնական կողմը շատ ալ շահագրգռուած, մտահոգուած, կամ ընդվզած չէ Օ’Հարայի պատուիրակութեան այցի յետաձգումով: Պարզապէս՝ սորի, որ այդպէս ստացուած է:

Ըստ երեւոյթին, Հայաստանի պաշտօնատարները նման պարագաներու դիւանագիտական քաղաքավարութիւնը սկսած են շփոթել մեղմաբանութիւններու հետ: Քաղաքավար բառամթերք գործածելը չի հակասեր ջղուտ կեցուածքի: Վլատիմիր Կարապետեանի «կը ցաւինք»ին կրնա՛ր յաջորդել «եւ մտահոգ ու ընդվզած ենք» տողը: Որովհետեւ թէ՛ մտահոգիչ է եւրոպական այս անտարբեր կեցուածքը՝ ի տես մեր դարաւոր յուշարձաններու օր-ցերեկով սրբապղծումին եւ թէ միաժամանակ՝ ընդվզեցուցիչ:

Հայաստանի արտաքին գործոց նախարարութեան այս յայտարարութիւնը կարդալէ ետք, Օ’Հարա շատ հաւանաբար ոչ իսկ վայրկեան մը տրամադրեց յետաձգումին պատճառով ստեղծուելիք կացութիւնը դիմագրաւելու համար: Իսկ Օ’Հարայի համար՝ ինչո՞ւ մտածել կամ մտահոգուիլ, երբ Երեւան պարզապէս… «ցաւ կը յայտնէ» եւ ուրիշ ոչինչ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top