Իրա՞ւ, Պարոն Սարքոզի

Քիչ չի պատահիր, որ մեծ մարդիկ մեծ գիւտեր կ’ընեն: Իսկական մեծերը իրենց գիւտերու մեծ բնոյթին պատճառով իսկապէս մեծ կը դառնան: Իսկ ուրիշներու մեծութիւնը, նայած իրենց գիւտին, կը չակերտուի ու նոյն այդ մեծ նկատուած մարդիկը՝ կը ճղճիմնան:

Չակերտուած «մեծութիւն» պէտք է նկատել Ֆրանսայի նորընտիր նախագահ Նիքոլայ Սարքոզին:

Նայեցէք, թէ ինչ կ’ըսէ Եւրոպայի երկու գերպետութիւններէն մէկուն՝ Ֆրանսայի նախագահը, Տարֆուրի մէջ վերջին տարիներուն տեղի ունեցող ցեղասպանութեան հարցը Փարիզի մէջ քննարկող խորհրդաժողովին ընթացքին. «Իբրեւ մարդ արարածներ եւ իբրեւ քաղաքագէտներ, մենք պէտք է լուծենք Տարֆուրի տագնապը, լռութիւնը կը սպաննէ: Մենք կ’ուզենք զօրաշարժի ենթարկել միջազգային համայնքը ըսելու՝ «Բա՛ւ է այլեւս»:

Իսկ Ամերիկայի պետական քարտուղար Քանտըլիզա Ռայս, նոյնքան տիեզերացունց յայտարարութիւն մը կատարած է ըսելով, որ «մենք պէտք է կրկնապատկենք մեր ճիգերը»:

Տարֆուրի մէջ 2.5 միլիոն տեղահանուածները, անասելի ջարդերու-ցեղասպանութեան զոհ գացած 200,000 անմեղ քաղաքայիններու հարազատները ինչպէ՞ս կ’ուզէք, որ ընկալեն մեծերու այս «մեծութիւնները»: Կ’արժէր Ռայսի եւ Սարքոզիի արձանները բարձրացնել Տարֆուրի անապատներուն մէջ, աւազաբլուրի մը վրայ, եւ այնքան հսկայ, որ երեւի նկատուին անջրպետին մէջ երկրի ծիրին շուրջ թաւալող միջազգային աստղանաւու անձնակազմին կողմէ:

Եւ տակաւին լալ-ողբա՞լ, քուրջեր հագնելով գլխուն մոխի՞ր ցանել կրկնելով, որ մէկուկէս միլիոն մարդ ցեղասպանութեան ենթարկեցին աշխարհի աչքին առջեւ եւ ոչ ոք մատը մատին դպցուց:

Այդ օրերուն համաշխարհային պատերազմ էր, իսկ հիմա՞ ինչ: Աշխարհի գերհզօրներուն ո՞վ կ’արգիլէ, որ մարդասիրական իրենց ամենավե՜հ զգացումները եւ յայտարարութիւնները գործի վերածեն Տարֆուրի մէջ:

Պարոն Սարքոզի (կամ մատամ Ռայս), լո՞ւրջ էք, երբ կ’ըսէք, որ պէտք է լուծէք եղեր Տարֆուրի տագնապը…

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top