99րդ Ողջոյնը

Երէկ, Օգոստոս 14ին, լռիկ-մնջիկ, «Ասպարէզ» դարձաւ 99 տարեկան: Ֆրեզնոյի մէջ 1908 Օգոստոս 14ին ծնած այս թերթը իր առաջին իսկ համարով կ’ողջունէր իր ընթերցողները եւ կ’եզրակացնէր ըսելով. «… մեր անկեղծ ջանքը պիտի ըլլայ մենք զմեզ սրբագրել եւ միշտ յառաջ երթալ դէպի զարգացում ու կատարելութիւն, որուն կը ձգտինք ու կը յուսանք հասնիլ անկեղծ օժանդակութեամբ այն հասարակութեան, որուն կը նուիրենք մեր թերթը»:

Ահաւասիկ, 99 տարի. շաբաթաթերթ, եռօրեայ, ապա՝ օրաթերթ, անգլերէնով շաբաթաթերթ, ապա՝ երկլեզու օրաթերթ: Ասոնք եղան «Ասպարէզ»ի կենսագրութեան հիմնական հանգրուանները:

Յառաջիկայ տարի այս թերթը պիտի դառնայ 100 տարեկան: Իրեն արդէն նախորդած են ուրիշներ եւս, ինչպէս «Հայրենիք»ը, եւ յուսալից ենք, որ յառաջիկային ուրիշներ եւս մէկ դարու պատմութիւն կ’ունենան իրենց ետին:

Օրաթերթի մը երկարակեաց բնոյթը ցուցանիշ է ընթերցողին գուրգուրանքին, որովհետեւ թերթը ամէն բանէ առաջ կը պատկանի ընթերցողին, ժողովուրդին: Դաշնակցական թերթը օրինականօրէն կը պատկանի տուեալ շրջանի դաշնակցական մարմինին: Սակայն լայն առումով՝ ան կը հրատարակուի ժողովուրդին համար, հետեւաբար, անոր տէրը նաե՛ւ ժողովուրդն է:

Ամէն օր «Ասպարէզ» ինքզինք կը գտնէ գլխագիր հարցադրումի մը դէմ յանդիման, յար եւ նման այն ծառաներուն, որոնց պահ տրուած էին տաղանդներ: Եւ երբ տէրը վերադառնայ, պիտի հարցնէ իր ծառաներուն, թէ ի՞նչ ըրին իրենց տրուած տաղանդներով: Վայ «Ասպարէզ»ին, եթէ նմանի այն ծառային, որ իր ստացածը եղածին պէս վերադարձուց:

Ինչպէս «Ասպարէզ»ի Հրատարակչական ընկերութիւնը վերոնշեալ մէջբերումով կը հաստատէ, մենք եւս կը փորձենք քալել նոյն այդ ուղիէն:

Այնպէս որ, մեր հարիւրերորդ տարուան սեմին՝ մեր 99րդ տարեկան ողջոյնը կը փոխանցենք մեը ընթերցողներուն, մեր «տէրերուն», որոնց անվերապահ զօրակցութեան արդիւնքն է այս թերթի 99 տարիներու կեանքը, որ կը յուսանք պիտի շարունակուի նաեւ յառաջիկայ տասնամեակներուն:

Կը փորձենք ըլլալ «բարի եւ հաւատարիմ ծառան» հայ ժողովուրդին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top