ՈՒՔՐԱՆԻԱ Նախագահը Կազի Մատակարարման Հարցով Ռուսիոյ Հետ Բանակցելու Կոչ Կ’ընէ Վարչապետին

ՔԻԵՒ, «Ռոյթըրզ».- Վճարումներու վերաբերեալ վէճի մը պատճառով ռուսական «Կազփրոմ» ընկերութեան կողմէ Ուքրանիոյ մատակարարուած կազի քանակը նուազեցնելու որոշումէն ետք, Ուքրանիոյ նախագահ Վիքթոր Եուշչենքօ Չորեքշաբթի, Մարտ 5ին վարչապետին թելադրեց անմիջապէս Ռուսիոյ հետ բանակցութիւններու վերսկսիլ։

«Կազփրոմ» Ուքրանիոյ կազի մատակարարումը 50 առ հարիւրով նուազեցուց եւ սպառնաց յաւելեալ կրճատումներ կատարել, եթէ պարտքերու փակում չկատարուի եւ 2008 թուականի համար համաձայնագիր մը չկնքուի։ Ռուսական ընկերութիւնը կը յայտնէ, որ Քիեւ 600 միլիոն տոլարի պարտք ունի։

Ուքրանիոյ վարչապետ Եուլիա Թիմոշենքօ իր գլխաւորած նախարարաց խորհուրդին յայտնեց, որ Ուքրանիա պիտի յարգէ ռուսական կազի Եւրոպա արտածման իր պարտաւորութիւնները եւ պիտի մնայ «վստահելի գործընկեր» մը։

Թիմոշենքոյին ուղղուած նամակի մը մէջ Եուշչենքօ դարձեալ քննադատեց անոր գլխաւորած կառավարութեան բանակցութիւնները վարելու կերպը եւ կոչ ուղղեց ուքրանական պետական «Նաֆթկազ» ընկերութեան եւ «Կազփրոմ»ի միջեւ նոր բանակցութիւններու սկսելու, մատակարարման ապահովման համար։ «Միակ իրական միջոցը բանակցութիւններու շարունակումն է», ըսաւ ան։

Ուքրանիոյ նախագահը ըսաւ, թէ «Նաֆթկազ»ին անմիջապէս ցուցմունք պէտք է տրուի Ռուսիոյ նախագահ Վլատիմիր Փութինի հետ Յունուարին կայացած համաձայնութեան հիման վրայ վճարումները կատարելու։

Ուքրանիոյ նախագահին ու վարչապետին միջեւ տարակարծութիւնները սկսած են դարձեալ սրիլ: Վարչապետը Դեկտեմբերին իշխանութեան վերադարձաւ:

Ռուսիոյ նորընտիր նախագահ եւ «Կազփրոմ»ի նախագահ Տիմիթրի Մետւետեւ Երեքշաբթի Ուքրանիոյ նախագահին յայտնեց, որ առկախ մնացած հարցերու լուծման համար արագ պատասխան մը կը սպասէ։

Եուշչենքօ բանակցութիւններու ընթացքին Թիմոշենքոյի կառավարութեան ընթացքը նկարագրեց իբրեւ «անճիշդ եւ անյարմար»։ «2008ի համար կազի մատակարարման փոխադարձ հասկացողութիւններու չենք հասած եւ համաձայնութիւններ չեն կնքուած», ըսաւ ան։

«Նաֆթկազ»ի կողմէ կատարուած այն ակնարկներէն ետք, թէ ինք դէպի Եւրոպա ռուսական կազի մատակարարումը պիտի խանգարէ, եթէ ուքրանական պահանջներուն գոհացում չտրուի, Թիմոշենքօ ըսաւ. «Ուքրանիա վստահելի գործընկեր մըն է։ Դէպի եւրոպական երկիրներ բնական կազ արտածելու մեր յանձնառութիւններէն մէկ գիծ անգամ պիտի չշեղինք։ «Նաֆթկազ»ին պիտի ստիպենք, որ կառավարական ցուցմունքներուն հիմամբ վճարումներ կատարէ։ Ասիկա կացութենէն ելք մը պիտի ապահովէ», ըսաւ ան։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top